Rev 1 | TmfSC | STEP | Koka hengka vakkahak anak aktalhesammalhka nietnek qaselha apvetaskeskama Eniapom Neten Jesucristo akmak’akha ta ngkotnek angketvai’a lhmankek ham kakpota elvetaskesek apkellasennaikama. Netamen apkapaso lhta Jesucristo lhema ángel kakpota esantengkesek ania’a m’a apkasennaikama apankok apvesai’a Juan.

‏ Revelation of John 1

Aklheianma apvalhok Juan

1 Koka hengka vakkahak anak aktalhesammalhka nietnek qaselha apvetaskeskama Eniapom Neten Jesucristo akmak’akha ta ngkotnek angketvai’a lhmankek ham kakpota elvetaskesek apkellasennaikama. Netamen apkapaso lhta Jesucristo lhema ángel kakpota esantengkesek ania’a m’a apkasennaikama apankok apvesai’a Juan. 2 Netamen ma’a Juan aplhenekho mokhom aptemakha apaivoma Eniapom Neten kanhan Jesucristo, aplhenekho nhan ma’a aklhamakho qaselha apvetai’a m’a. 3 Aktaqmelakho nkek enenlhet apto apkelietsatema mota vakkahak anak, apkailhemo nhan ania’a akmak’akha ta ngkotnek aklhenammalhka nak kanhan apkeliehekho, ngkanek ketsek anke nkaimelhka nkovak hata qaselha aklheianma vakkahak anak.

Aklheianma apvalhok Juan 7 iglesias

4 Ko’o Juan nlhenkek evalhok siete iglesias akieto iokhalhma Asia, askeltavek ko’o enmankok takha altaqmanma apkellaniemhaikama kanhan altaqmelaikama apvalho’ok. Koka nkelleniemai’ak ma’a apto nak apnema, apnemo nhan tep nak nanek, apvekta ta nhan. Kanhan siete espíritus allelto m’a alloma mota naqtek aptanema apveske. 5 Aniem’o nhan ma’a Jesucristo apto apvetaiangko panke, aplhenekho mota nhan akto have niapak ankek, apto lhta nhan aplhatekhangveiam apmanie apieseksek apkenmaskengvaiakmo, aptemo nhan takhaplhet’ok ma’a apkelveskaie lhmankek ham. Avanhek ankek hengellamelaiam Jesucristo, malha hengellalhnaskeskama lhta nhan engelvalho’ok malha alpaiseiam aniem’o nellanekamok ngkollatsekama, aniem’o lhta nhan akiangkenammalhka ema apankok ma’a. 6 Hengeltemeskaske lhta nhan malha apkeliav’akha apkelveskaie ennengko’o kakpota nhan sacerdotes kakpota angellasennama mota m’a Eniapom Neten apto apiapom ma’a. Ka ngkanek na ntasek ellaho mota apvesai’a m’a, etlhenama mota akietnema neten apankek apientalhnemo kanhan apmopvana panke metka akvaiam annelha aliekaikamok iantelhkapa. Amen. 7 Elhiemok hata Cristo aiseksek iephopai’a, etakpok hata lhmankek ham, elvetak hata nhan apkellelto lhta apkeliaqlhai’a akvakmo akteiapvakmo nepketama napokha, lhamakho apkellavakha lhmankek ham eliapqalhek hata aniem’o m’a. Hai’, hata ngkotnek ma’a. Amen.

8 Lhna aptemak Apveske apto vanlha lhema aphapak aknema apmopvana apanke:

—Ko’o nak asto alfa kakpota nhan omega, ko’o asto enemelha kanhan aktakha nnelha, asto asnema nenvanlha nak, asnemo nhan tep nak nanek, asvekta ta nhan —lhna aptemak.

Akvetai’a apaqtek Juan Enenlhet Apketka

9 Ko’o Juan asto elialheng’a ketlhengkap, nengelelto nhan nennemolhema akieto nak aptemakha apveske Eniapom Neten. Aslengaiangkek na lhemek akientalhnema ketlhengkap, nengetlhevaikamok na nengeliennaktema kakpota angelvaskapok ma’a.

Asne lhta ko’o m’a akieto akiaqiema lhepop iemmen nekhav’ak akvesai’a Patmos aniem’o aspaieskama mota ania’a apankok Eniapom Neten, kanhan ania’a aktemakha asvetaiangko lhta Jesucristo. 10 Aknem apanko lhta ntak Apveske m’a, mpelapkaske lhta akvo’o aklanei’o evalhok apmopvana Espíritu, asleng’a lhta nema aliatekama netamen ko’o, akiennaktema nkek akpaivoma malha trompeta la’a, 11 lhta ntak heiano:

—Etalhes no lhema vakkahak aktakha la apvetai’a, etsaskes hata 7 iglesias akieto m’a iokhalhma akiav’akha Asia, ka alvesai’a hengke’e: Efeso, Esmirna, Pergamo, Tiatira, Sardes, Filadelfia kakpota nhan Laodicea —lhta ntak nema aliatekama netamen ko’o.

12 Aspengkalhke lhta m’a asmahai’a ata niekhe apto apkeliatekama, asvet’a alhta 7 alhvo’ok alapommatkeskama alienmoma oro nkoie. 13 Aiseksek alhta asvetak ma’a malha enenlhet apketka la’a, aptalhnema lhtoka apvenaktema apvekho apmankok nepva’ak, aptetema lhtoka apiapnama akieto apneniek, alienmoma oro nke lhta m’a. 14 Anmopai’a nke lhta apva’a m’a, malha lhta lana apmopei’o panke nak, malha lhta nhan ieiam appok anak, apaqto’ok alhto ka malha talha aleivoma. 15 Alapommatema nke lhta nhan apmanko’ok ma’a, malha lhta kto nak tavapak bronce neksa akhanemmalhka la aimenek kanhan nema alalhnaskama la’a aiempek, nkoihek anke lhta apaivoma m’a malha lhta kto nak iemmen akiav’akha la aksepkanma aiempek. 16 7 iav’a lhta apmaikama apmek akiennakha, apatong alhta ntepak pelettav akpeivoma hanet nekha nema anmalhnongkoma ahanto’ok, apommatma lhta napa’at malha lhta aknem katelho nak.

17 Asiaqnenke lhta ko’o akieto apmanko’ok akpelapkeso asvetai’a m’a, malha asketsepma lhta stak. Ka apekkeno lhta apmek akiennakha tekhelhet ko’o, lhta aptak heiano:

—Meniaga, ko’o asto enemelha kanhan aktakha nnelha. 18 Asto ehalhnankok, asketsepme lhta ko’o sekhe lhta, kolhva koka astakhek ehalhnankok metka akvaiam annelha ta aliekaikamok iantelhkapa, nietnek na llave ankok ngkolatsenkolha apkeletsepma. 19 Etalhes lheiap aktakha apvetai’a lhamakho qaselha aktakha nak kolhvave nak, kakpota nhan qaselha nkovak hata. 20 Kolhva smak’ak alpeiveskasekhak aktemakha lhkek apvetai’a, 7 iav’a lhkek apietkesammap 7 ángeles apketlhelhma’ak amota 7 iglesias, koka 7 alhvo’ok lhek alapommatkeskama apietkesammap ma’a 7 iglesias.