Rev 11 | TmfSC | STEP | Netamen kno lhta heiangko lhema iamet atkok nema alietkeskama ankok, lhta ntak heiano: —Eniakha elietkeskakha ta Eniapom Neten apnemakha kakpota nhan alvanlhemmalhkelha nak qaselha, elietset hata nhan enenlhet’avok apkellelto apkelteklheikamok aptapno’ok napaqtek Eniapom Neten aniem’o apkellai’o m’a.

‏ Revelation of John 11

Apkanet enenlhet apkeliamo aptemakha Eniapom Neten

1 Netamen kno lhta heiangko lhema iamet atkok nema alietkeskama ankok, lhta ntak heiano:

—Eniakha elietkeskakha ta Eniapom Neten apnemakha kakpota nhan alvanlhemmalhkelha nak qaselha, elietset hata nhan enenlhet’avok apkellelto apkelteklheikamok aptapno’ok napaqtek Eniapom Neten aniem’o apkellai’o m’a. 2 Koka melietkes ankek avhak pa’at anak Eniapom Neten apnemakha, ngkanek nnek allangko metnangko nak judios ma’a, nkotaqmelkasangkok hato ka apnaqtevaskama na temma apokkenammap ma’a akvakmo toka 42 pelten. 3 Koka allapaksek hata apqanet askellasennaikama apkellelto apkelioho astemakha ko’o etlhenek hata astakha alheianma ko’o akvakmo 1.260 aknem, elentalhnekhak hata mota apkelentalhnema apkeltavkeskama nak apiempeiok anmaiosak’a nak apvalho’ok anko’ok.

4 Ka apkanet anak askellasennaikama apkelioho ko’o astemakha, apkellelto m’a hanet iamet olivos kanhan hanet alhvo’ok alapommatkeskama, apkelaknama mota m’a napaqtek apto Apveske lhepop lhmankek ham. 5 Hata apmak’o la etvaksek lhema enenlhet ma’a, nkolentepok hata nhan talha apatno’ok ma’a, enaqtevaksek na apkellammelhmakha la m’a. Hata ta nha nkotnek apkeletsepma m’a apkenmahai’a la enaqtevaksek ma’a. 6 Apvanka’ak na malha apkellapekha neten kakpota mankomamakie neksa apketlheianma ania’a aktemakha akmak’akha ta ngkotnek emanie, apvanka’ak na eltemeskasekhak ema iemmen akiav’akha alvata. Kakpota nhan apvanka’ak apkenmak’akha la ellapaksek lhamakho aktemakha qaselha akmovana hentevaksek takhaplhet’ok enenlhet’avok lhmankek ham. 7 Hata apkelpeneso ta apkelpaieskama ania’a astemakha ko’o m’a, nkotiepok hata nhan lhema kaselha nevhak nengai’o nkek konne malhek konne kankek, nkonnapalhkak hata m’a apqanet anak askellasennaikama apkelioho ko’o astemakha, nkoltemeskasenta ta koneng, nkonnapok hata nhan ma’a. 8 Elhnangko ta aphapavok amai aiseksek apiav’akha temma akietemelha lhta nhan ma’a apkelhnammakpelha neten iamet aktenneskama Apveske apanko’ok alhta ma’a, koka apiav’akha ta temma nak ma’a malha niekhe Sodoma kanhan Egipto. 9 Hanetolhema aknem medio elvetak hata nhan apentalhnema enenlhet’avok apkelleniem’o lhamakho aptemakha na temma, aknema apkelpasmekha apketkak neptamen, lhamakho aptemakha apkelpakmeiasma kanhan apkellavakha. Meleltakpek hata nhan ngkolhek aknengkanvakmo m’a nemakha aknengkanveianlha enghapak. 10 Nkolpaihekhak hata apvalho’ok enenlhet’avok lhmankek ham aniem’o apkelvetai’a apkeletsepma m’a apkeleltennasemmap ania’a apkanet anak aniem’o nhan ma’a apkellaskeskama ame’ apkennaveskama apkeliennai’o. Akiavai’a aktakmelaikama lhma ta nhan ellanangkok ma’a, metka akianmoma ta nhan ellangkok po’ok qaselha apanko’ok.

11 Koka akieko’o lhta hanetolhema aknem medio apkeletsepma m’a, apkelvatepnapo lhta Eniapom Neten aptangkokho lhta aphalhnanko’ok apqanet alhta apkeleltennasemmap ania’a, avanhek anke lhta apkellai’a apkellelto apkelvetai’a m’a. 12 Koka apkellelto lhta apnaklhatekhangveiam ma’a apkelleng’o lhta nhan nema aliatekama akiennaktema nkek aniem’o lhta m’a neten, lhta ntak:

—¡Enmeianta hengke’e! —lhta ntak ma’a.

Ka apkenmeiakho lhta neten ma’a lhema iephopai’a lhta apkelkanantema, apkelvet’a lhta nhan ma’a apkellelto apkellammelhmakha lhta. 13 Mpelapkaske lhta akievhengka lhepop akiavai’a, apkeliaqnengke lhta decima lhema nekha pa’at apiav’akha temma lhta m’a, apkeletsepke lhta 7.000 enenlhet’avok aniem’o akievhekama lhepop, koka apkellelto lhta meletsepma kolhvave lhta apkeliavenkaskesama apvesai’a Eniapom Neten aniem’o apkellai’a m’a. 14 Nkelieka lhta m’a segunda akientalhnema, kolhvavek hata nhan nkovak ma’a tercera.

Ángel apaiveskama septima trompeta

15 Netamen apaivaso mokhom trompeta septimo ángel, ka asleng’o lhta nema alpaqmeiasma aliennaktema nkek neten, lhta ntak:

—Kolhvave nak lhmankek ham aptangkek apkelveskai’e Apveske engankok kakpota nhan apto apkapasammap apvesai’a Cristo, aptaikamok apkelveskaie metka akvaiam annelha aliekaikamok iantelhkapa —lhta ntangkok nema alpaqmeiasma.

16 Apkelel·halhantanie lhta nhan akvakmo apkellelteklheio napaqta’a lhepop 24 metno apketkok alhta apkelelto apkakhaikamok apkeltanema apkelveskai’e akieto m’a napaqtek Eniapom Neten aniem’o apkellai’o, 17 lhta aptangkok ma’a:

—Nentangkek ennengko’o gracias lheiap Eniapom Neten Apveske engankok, apto nhan vanlha lhema aphapak aknema apmopvana apanke, lheiap na apto apnema kolhvave nak, apto nhan apnema tep nak nanek, kolhva koka aptak Apveske lheiap lhma nkek ham akieplomo apmopvana. 18 Avanhek apkelloma enenlhet’avok lhmankek ham ngkanek ngva’ak aknem aploma lheiap. Eliekpelkok hata nhan aktaqmanma nlho ka la ngkollatsekama apkelanai’a apkeletsepma nak, ellangkok hata nhan apianmongkeskama apkellelto lhta apkellasennaikama apkeleltennaskamo ania’a apankok. Ellangkok hata nhan apianmongkeskama apkellelto apkelpokkenammap, apkellelto nhan apkellai’o apvesai’a, nlho ka la nhan apkelientalhnemo, melientalhnemo nhan, nkolhok hata mo’ok apkellaikamok akiaqmoiekha m’a. Koka enaqtevaksek hata lheiap apkellelto nak apnaqtevaskama takhalhet lhepop —lhta aptangkok metno apketko’ok ma’a.

19 Asvet’a lhta nhan ma’a neten atong nema akmaiesekha Eniapom Neten apnemakha. Nietne lhta m’a konne iamet aiseksek aknaiangkolha metaimong nekha alqasemmalhka annemo mo’ok apvalho’ok lhnak nanek apkenmahai’akha etnangkok Eniapom Neten kanhan apkennemolhema. Mpelapkaske lhta apkelienmakmo m’a, akiennoma lhma, apkelelhtenioma, akievhekama lhepop kakpota nhan aliavai’a ahekho’ok ma’a.