Rev 19 | TmfSC | STEP | Netamen asleng’o lhta mokhom akiennoma lhma neten, malha lhta aptonak aplhamakma apankek la enenlhet’avok akiennaktema nkek ma’a, lhta aptangkok: —¡Aleluya! Angeliavenkaskesok apvesai’a apveske engankok, Eniapom Neten apto aknema apmopvana apanke, hengelvongkaskek tep, ietavek ellahok apvesai’a m’a

‏ Revelation of John 19

Nema akiavenkaskesaikama apvesai’a Eniapom Neten akieto m’a neten

1 Netamen asleng’o lhta mokhom akiennoma lhma neten, malha lhta aptonak aplhamakma apankek la enenlhet’avok akiennaktema nkek ma’a, lhta aptangkok:

—¡Aleluya! Angeliavenkaskesok apvesai’a apveske engankok, Eniapom Neten apto aknema apmopvana apanke, hengelvongkaskek tep, ietavek ellahok apvesai’a m’a 2 ngkanek apkeliekpelkek aptaiangkolha enenlhet’avok akietemo nkek ma’a kakpota nhan akto have niapak ankek, avanhek apiaqmongkasekha aktemakha akiav’akha ngkelvana alanaktema nak, nnaqtevaskek aplhamakho enenlhet’avok aniem’o anmensangveiam alhma. Eniapom Neten apiaqmongkasakhak na aktemakha aniem’o annapma apkellasennaikama m’a —lhta ntak akiennoma lhma m’a.

3 Apkeliennakteske lhta mokhom apkelpaqmeiasma apkeliennengkeskama lhke lhma neten, lhta aptangkok:

—¡Aleluya! Angeliavenkaskesok nenlhamakho apvesai’a Eniapom Neten ngkanek mankolvataksek hata anmekha neten eten ankok akmeta ngkelvana alanaktema nak ma’a —lhta aptangkok ma’a.

4 Apkeleltanantamo lhta aptapno’ok apkelteklhengko lhta nhan napaqta’a lhepop ma’a 24 metno apketkok alhta m’a kakpota nhan 4 kaselha allaniemhaiangka lhta aniem’o apkellai’o Eniapom Neten apnakha m’a akieto aptanema apveske, lhta aptangkok:

—¡Ntase, amen, aleluya! —lhta aptangkok ma’a.

5 Netamen asleng’o mokhom nema aliatekama aniem’o akieto aptanema apveske, lhta nna akto:

—Ketlhengkap apkellelto nak apkellasennaikama m’a, apkellelto nhan apkellai’o, melientalhnemo, apkelientalhnemo nhan ¡nietavek eliavenkaskesok apvesai’a Eniapom Neten apveske engankok! —lhta ntak nema aliatekama m’a.

6 Asleng’o lhta nhan nkeskama apkelpaqmeiasma enenlhet’avok, malha lhta ntak akpaivoma nak aiempek iemmen aksepkanmakha la’a, malha lhta nha ntak apiennaktema la apkelhtenioma, lhta ntak:

—¡Aleluya, ietavek angeliavenkaskesok apvesai’a Eniapom Neten apto vanlha lhema aphapak apmopvana apanke! Ngkanek nkenavek aptema apveske kolhvave nak. 7 Nkolpaihekhak engelvalho’ok, angelletsevasoho, angetlhenek apto neten apankek akiaspommalhka apvesai’a m’a ngkanek ngva’ak knem akmahai’a nkoliemhapok Nepkesek Apketkok, mpenesavek apmahai’akha alanekha aktakha. 8 Nnek alto nkotalhnekhak aktalhnema apmennave lino, akmopai’a apanke, apkapommatemo nhan, ka aktalhnema nak lino akietkesammalhka apkeltemakha apkelpeivomo apkellelto nak apkelpokkenammap —lhta aptangkok ma’a.

9 Netamen lhta aptak heiano mokhom ángel:

—Etalhes no ta asmak’ak hata atnek aspaioma: Aktakmelakho nkek apkellelto nak nema allanema elpasengvomok taqmelaikama lhma aliemhapma ta Nepkesek Apketkok, ka stakha nak ko’o alheianma have niapak, aniem’o nhan Eniapom Neten —lhta aptak heiano ángel.

10 Ka askelteklheio lhta etapno’ok napaqtek ángel ma’a kakpota angvahok ma’a, koka lhta aptak heiano mokhom ma’a:

—Have, metne ham, koka nietavek elteklheiok aptapno’ok napaqtek ma’a Eniapom Neten, ko’o nhan asto heiasennaikama m’a, snavek ko lheiap ka nhan apkelialheng’a nak meliaskeiam ania’a aplhenammap Jesús. Koka ania’a nak malha akvatepnapma allaikamok ma’a apkeleltennasemmap ania’a —lhta aptak heiano ángel.

Apto apkanantema etanlheng apmopai’a

11 Ka asvet’o lhta akmaihakho neten ma’a, apiangke lhta lhema etanlheng akmopai’a m’a. Apto lhta apkanantema m’a apvesai’a metka apietnekho hempasmoma, kakpota nhan apto iokhalhmek ankek. Apte lhta mota apveske apeivomo, apkennapommap nahan. 12 Nkelapommatke lhta apaqto’ok malha lhta nta kto nak talha. Nlhanie lhta nhan apnaktetema apqatek, nietne lhta nhan aktalhesammalhka apvesai’a apanke monioho mokhom ma’a, vanlha lhtoka apiavek ma’a. 13 Aptalhnema lhtoka malha nema aklavkeskama la ema apielhvasekho nhan, apvesai’a koka m’a Apaivoma Eniapom Neten. 14 Neptamen alhto ka apketlheiam kempokhakme apankok apkelleniem’o neten, etanlheng apkenmopai’a lhta apkelkanantema. Apkenmopai’a apanke lhta apkelentalhnema m’a lino apmennave, apkelalhnai’a apankek nahan. 15 Ntepke lhta apatong ma’a apveske pelettav hanet nekha’a ahanto’ok kakpota eliensasangkok lhamakho apkellavakha lhmankek ham. Etnek hata apveske apiennaktema apankek ma’a, elteianmok hata apankek na uva malha apkelietsemongama apkelanai’a vino. Koka akietkesammalhka akiavai’a nkek aploma Eniapom Neten apto vanlha lhema aphapak aknema apmopvana apankek ma’a. 16 Apkaqlammap alhto ka m’a nietne lhta aptalhesammap ma’a alqama akieto aptepio’ok ma’a, lhta ntak: Apiav’akha Apveske neten apankek melhnok po’ok apiav’akha apveske. Apveske neten apankek melhnok po’ok apveske la’a, lhta ntak aktalhesammalhka m’a.

17 Netamen asvet’o lhema ángel apkenmangka neten aknem, apiennakteso lhta apaivoma apkelpaqmetkeso anata aktekamok anak enghapak allelto aliaihekama netne kanke, lhta aptak:

—Konmeiakha m’a aknangkelha nak aktekamok, apkelpeneskaskek Eniapom Neten aktekamok ketlhengka, 18 kotavamok aphapetek apkelveskai’e, apveske kempokhakme, enenlhet apkeliennaktema, etanlheng aphapetek, apkellelto nhan apkelkanantema, aphapetek enenlhet’avok aplhamakho apkeltemakha, nema allasennaikama nema apkelianmoma, metnangko nema apkelianmoma, enenlhet aptangko neten apankavek kanhan metnangko neten apankavek —lhta aptak ángel apkellano anata aktekamok enghapak.

19 Netamen asvet’o lhta mokhom qaselha nevhak alhta nengai’o, ankesakho apkelveskaie lhmankek ham kakpota nhan kempokhakme apanko’ok kakpota ennapakpok ma’a apto lhta apkanantema etanlheng apmopai’a akieplomo nhan kempokhakme apankok ma’a. 20 Koka mpathetalhke lhta qaselha nevhak nengai’o akieplomo nhan altennaskama ania’a ankok alhta apmopvana ania’a, apkelanai’a lhta mota qaselha mongenatkeskama naqtek ma’a. Apkeliennengkeskangke lhta nhan apnaikamok alhta aqnaktalheskama alqama ankok ma’a, apkellelto lhta nhan apkelteklheikamok aptapno’ok naqtek nema akietkeskamo akiokha m’a kaselha nevhak nengai’o lhta. Koka nkelpathetalhke lhta lhemek ma’a qaselha nevhak nengai’o kakpota nhan ania’a niapom ankok, nne lhta alienievo akieplomo aktaikamok alhnankok akieto sanga akietnemakha alaivomo talha kanhan azufre. 21 Netamen ma’a apvo’o lhta apto apkanantema etanlheng, apkennapke lhta aplhamakho kempokhakme ankok ma’a akieplomo pelettav akvenaktema hanet ahanto’ok akteiapma lhta apatong. Nkellempave lhta anata aktekamok enghapak aktavengko aphapavok akvakmo aliapqanakmo lhta m’a.