Rev 20 | TmfSC | STEP | Asvet’o lhta mokhom lhema ángel apkempo neten apvaivantamo, apsantanie lhta llave malhek konne kankek kakpota nhan aliavai’a nkek cadena.

‏ Revelation of John 20

Nema aktemeskesekha koneng aveske keliaqhameio’

1 Asvet’o lhta mokhom lhema ángel apkempo neten apvaivantamo, apsantanie lhta llave malhek konne kankek kakpota nhan aliavai’a nkek cadena. 2 – 3 Apathetke lhta m’a menasma akiavai’a lhta akvaneiam akvesai’a aveske keliaqhameio’, mo’ok nema ltema Satanas. Apkelpelhketo lhta nhan cadena aliavai’a lhta, apienievo nhan malhek konne kankek. Ka aptaqmelkaso lhta nhan apkapekha atong ma’a akvaiakmo ta m’a 1.000 anio kakpota mankoliennenkasama enenlhet’avok lhmankek ham. Netamen hato ka m’a ngkolhek hata akpaqnemakho mokhom ma’a, akiakvatakho nkek hato ka m’a.

4 Asvet’o lhta mokhom apkelveskai’e apkakhangko apkeltanema apkelveskai’e m’a neten, nne lhta allangko apkenmopvanka’a kakpota eliekpelkok apkeltemakha enenlhet’avok lhamakho aiempek lhmankek ham. Asvet’o nhan apkel·hangok ma’a nema aliaqtemanma lhta apiaspok aniem’o mota apkelpaieskama ania’a aplhenammap Jesús kakpota nhan apkeleltennaikama Eniapom Neten apaivoma. Ma lhta nhan elteklheiangkok aptapno’ok naqtavek qaselha nevhak alhta nengai’o kakpota nhan nema akietkeskamo akiokha nke alanemmalhka m’a. Meleltemo lhta nhan ngkolhek apnaqtalheso akvesai’a alpaihakha napaqta’a, apmeio’ok nahan. Koka apnaklhatekhangvakme lhta nhan ma’a apieseksek apkenmaskengvaiakmo enenlhet’avok alhta m’a, aptangkokho lhta nhan apkelveskai’e apkelpasmekha Cristo akvakmo ta 1.000 anio. 5 Lhtoka napokha lhta m’a apkeletsepma, alhaiek hato ka enaklhatekhangvomok ma’a akvakmo ta m’a 1.000 anio. Koka akvesai’a amanie nennaqlhatekhangveiam ma’a.

6 ¡Aktaqmelakho nkek apkellelto apnaklhatekhangveiakmo apmaniaie! Apkelpokkenammap asongkek ma’a, mellengankek hata mokhom hanet aktaiekho nengetsepma m’a. Etnangkok hata sacerdotes Eniapom Neten apankok kakpota nhan Cristo, etnangkok hata lhemek apkelveskai’e akvakmo 1.000 anio.

7 Hata akieko ta 1.000 anio nak ma’a, ngkolhek hata aklekkaso cadena aktetemmalhka m’a Satanas akieto m’a aktetemmalhkelha. 8 Nkotiepok hata, nkoliennenkasama ta enenlhet’avok akieto lhmankek ham, nelhkeiha, nepeiam, tep aknem kanhan mankolha aknem, ko Gog ka nhan Magog. Nkankesekhak hata kempokhakme kakpota ennapakpok ma’a, apentalhnema apankek hata kempokhakme, mammopvana angelietsetek, malha lhepop aktek anak neiava’ alvata aknangkongvaiam. 9 Epaihekhak hata kempokhakme lhmankek ham, el·halhiengkamok hata apkakhaiangkelha la apkellelto nak apkelpokkenammap, kakpota nhan na temma apkamelaianlha Eniapom Neten. Koka neten hata nkoniemak talha takhaplhet’ok kempokhakme nak ma’a, esavhakpok hata apkenmeiasma m’a. 10 Netamen ma’a ngkolhek hata akienievo aveske keliaqhameio aniem’o aliennengkasekama akieto m’a sanga akietnemakha talha kanhan azufre. Akieniommalhkelha lhta nhan ma’a kaselha nevhak nengai’o lhta kakpota nhan altennaskama ania’a ankok alhta apmopvana ania’a. Nkolhek hata aliaqmongkaskesakho altemakha m’a lhamakho aknem, pelhasep nahan metka akvaiam annelha aliekaikamok iantelhkapa.

Nema aliekpelkemo enenlhet’avok naqtek apveske aptanema akmopai’a nke

11 Netamen asvet’o lhta nhan akiavai’a aptanema apveske akmopai’a nke lhta m’a, apne lhta nhan apto aptanema m’a. Nketseponengvakme lhta nalhepop ka nhan neten napaqtek ma’a, mmaske lhta nelvet’o m’a. 12 Askelvet’o lhta nhan apkeletsepma lhta, apkeliav’o, apketkeietse apkelanvakhe lhta m’a naqtek aptanema apveske. Netamen alhta m’a akno anmaiesakho vakkahak, netamen na mo’ok vakkahak akiennaktema enneniek ankok. Nne lhta alietsato vakkahak kakpota ngkolhek aliekpelkok apkeltemakha ngkollatsekama nlho ka la aktaqmanma m’a neksa apkelaniemhaikama lhta nalhepop. 13 Nkel·hatsoske lhta nkek na av’alhok alvata apkellelto apkeletsepma av’alhok ma’a, kanhan ngkolatsenkolha apkeletsepma nkel·hatsoske lhta nkek apkellelto apkeletsepvaiam ma’a av’alhok. Nne lhta aliekpelkok aplhamakho apkeltemakha m’a ngkollatsekama nlho ka la nhan aktaqmanma. 14 Netamen ngkolatsenkolha lhta apkeletsepma, nne lhta akienievo akieto sanga akietnemakha talha. Koka kto akvesai’a hanet netsepekha m’a. 15 Nne lhta nhan alho m’a mankolhnaikamok la apkelvesai’a vakkahak ankok akiennaktema enneniek akieto m’a sanga akietnemakha talha.