Rev 5 | TmfSC | STEP | Asvet’o lhta nhan lhema vakkahak nema alpelhiangkamekamok akiennakha apmek apto apnema m’a aptanema apveske. Hanet nekha alhta nema aktalheskama vakkahak alhta m’a, mankomopvana lhta emaiesekhak enenlhet la m’a ngkanek nietnek lhta 7 aimenek nema alpathetkeskama m’a.

‏ Revelation of John 5

Vakkahak nema alpelhiangkamekamok kanhan nepkesek apketkok

1 Asvet’o lhta nhan lhema vakkahak nema alpelhiangkamekamok akiennakha apmek apto apnema m’a aptanema apveske. Hanet nekha alhta nema aktalheskama vakkahak alhta m’a, mankomopvana lhta emaiesekhak enenlhet la m’a ngkanek nietnek lhta 7 aimenek nema alpathetkeskama m’a. 2 Ka asvet’o lhta nhan mokhom lhema ángel aknema apmopvana apanke, apiennakteso lhta apaivoma, lhta aptak:

—¿Se lha enenlhet nkoietok elentaksek 7 nema aliepetkeskama kakpota emaiesekhak vakkahak nema alpelhiangkamekamok anak, he? —lhta aptak ma’a.

3 Koka mamma panke lhta neten anak enenlhet, kanhan nalhepop anak, kanhan koneng anke nak lhepop apkenmopvanka la enmaiesekhak ma’a vakkahak alhta, mankollapvanke lhta nhan ellanhok ma’a. 4 Ka mangkaso lhta ko’o asvenema m’a ngkanek mamma enenlhet apto akietemo nkek emaisekhak vakkahak alhta, kanhan elietsetek, ellanhok nahan.

5 Netamen alhta m’a, lhta aptak heiano lhema metno apketkok:

—¡Meven! Apnek apto lhta apiephongveiakmo, nietavek ankek elentaksek 7 nema aliepetkeskama kakpota emaiesekhak vakkahak nema alpelhiangkamekamok lhek, apto apvesai’a nhan Iama Akmeiva apkeniem’o apasmekha apketkak neptamen Juda annenga, aptaven neptamen David —lhta aptak heiano.

6 Netamen asvet’o lhta Nepkesek Apketkok apiangko m’a akieto aiseksek aptanema apveske, kanhan 24 metno apketko’ok alhta, kanhan ma’a aiseksek 4 kaselha allaniemhaiangka m’a. Lhta m’a nepkesek apketkok apmatnamo lhta lhennenga, 7 lhta apkapet’ok ma’a, 7 lhta nhan apaqto’ok ma’a, koka m’a alietkesammalhka 7 espíritus apankok Eniapom Neten, ka apkellapaskamo nkolloka lhmankek ham. 7 – 8 Apme lhta Nepkesek Apketkok vakkahak apto apmaikama akiennakha apmek apto apnema m’a aptanema apveske. Kolhvavek anke lhta apkelelteklhengko aptapno’ok 4 kaselha allaniemhaiangka lhta m’a, kanhan 24 metno apketko’ok akieto apkammelhakha nepkesek apketkok. Apnangke lhta nhan arpas kakpota nhan nahaikok oro alanemmalhka allaneiangko lhta panaktema ava’ akmases aimes akvesai’a incienso, akietkesammalhka koka ma’a apkelelmalhnongkoma mota apkellelto apkelpokkenammap. 9 Ka apkennekmasengko lhta nhan lhema nennekmaskama alhnankok ma’a, lhta ntemak:

—Vanlha lheiap apto akietemo nkek emok, emaiesekhak na nema aliepetkeskama vakkahak anak ngkanek apmatnangke lhta lheiap, apianmongkeskekho lhta ema apankok kakpota hengel·hatsoskakhak neksa hengenmaikama mongeliamolhma, henlaqlekho lhta nhan ma’a napaqtek Eniapom Neten nenlhamakho ennengko’o kakpota nhan apkakhangko natemma lhmankek ham, aknema apkelpasmekhak apketkak kanhan lhamakho aktemakha apkelpaqmeiasma. 10 Hengeltemeskesaiangko lhta nhan apkelveskaie ka nhan sacerdotes apankok Eniapom Neten, antangkok hata nhan apkelveskai’e takhaplhet’ok enenlhet’avok lhmankek ham —lhta aptangkok apkennekmasekamok ma’a.

11 Netamen ma’a asvet’o lhta nhan apentalhnema apanke ángeles apkel·halhiengkakme lhta m’a aptanema apveske, kanhan 4 kaselha alaniemhaiangka m’a, kakpota nhan 24 metno apketko’ok. Ma lhta nte pankek ángeles apkelpaqmeto m’a, 12 lhta aptangkok apkeliennakteso apkelpaqmeiasma:

—Nepkesek Apketkok apto lhta apmatnama nietavek ankek elhkak apmopvana kakpota nhan nema apketsekama akmennave, elhkak na aknema apiamo, apiennaktema nhan, nietavek na ngkolhek ak’o, ngkolhek na akiavenkaskesangka apvesai’a —lhta aptangkok ángeles ma’a.

13 Asleng’a lhta nhan aklhamakho qaselha apkelentepkeskama lhta Eniapom Neten akieto neten, nalhepop, alvata kanhan koneng lhepop anak, lhta ntangkok ma’a:

—Nietavek eliavenkaskesok apkelvesai’a, ellahok nahan, elteskasangkok na apkelientalhnemo kanhan apkenmopvanka’a m’a metka akvaiam annelha aliekaikamok iantelhkapa apto apnema aptanema apveske, kakpota nhan Nepkesek Apketkok —lhta ntangkok ma’a.

14 Asleng’o lhta nhan alpaqmeiasma 4 kaselha allaniemhaiangka alhta m’a, lhta antangkok:

—¡Ntasek anke, amen!

Netamen na m’a 24 metno apketko’ok alhta apkellelteklhengko lhta aptapno’ok, apkelel·halhantamo lhta nhan aniem’o apkellai’o m’a apto mangkotnengvaiam annelha apkaniemhaikama.