Rev 6 | TmfSC | STEP | Netamen asvet’o lhta mokhom Nepkesek Apketkok apkentaso amanie amhama nema aliepetkeskama, 7 lhta nema aliepetkeskama m’a. Asleng’o lhta akpaivoma lhema kaselha aniemhaikama m’a aiseksek alhta m’a 4 kaselha, malha apkelhtenioma lhta ntak heiano m’a: —¡Elheng no elanhono hengke’e!

‏ Revelation of John 6

Nepkesek Apketkok apkelentaskama 6 nema aliepetkeskama vakkahak

1 Netamen asvet’o lhta mokhom Nepkesek Apketkok apkentaso amanie amhama nema aliepetkeskama, 7 lhta nema aliepetkeskama m’a. Asleng’o lhta akpaivoma lhema kaselha aniemhaikama m’a aiseksek alhta m’a 4 kaselha, malha apkelhtenioma lhta ntak heiano m’a:

—¡Elheng no elanhono hengke’e! —lhta ntak.

2 Ka asvet’o lhta lhema etanlheng apmopai’a m’a, asvet’o lhta nhan apto apkanantema apmaikama lhta pelhpa’alh, nne lhta angko m’a apkelhnekha apqatek. Ka aplhengo lhta m’a, apiephongvakme lhta mota apkennapommap ma’a, ngkotnek hata mota apiephongveiakmo m’a.

3 Asvet’o lhta mokhom Nepkesek Apketkok apkentaso hanet aktaiekho nema aliepetkeskama m’a, ka asleng’o lhta akpaivoma hanet alhta ngvakmok ma’a kaselha allaniemhaiangka m’a, lhta ntak heiano m’a:

—¡Elheng no elanhono hengke’e! —lhta ntak.

4 Ka asvet’o nhan lhema etanlheng apielhvasema, apto lhta apkanantema nne lhta angko apmopvana kakpota emaskeskak aktaqmanma apkakhaikamok enenlhet’avok lhmankek ham, kakpota nhan ellaqhekhok hata apankavek po’ok. Nne lhta nko nhan pelettav akvenaktema akiavai’a.

5 Netamen asvet’o lhta mokhom Nepkesek Apketkok hanetolhem’a aktaiekho lhta ngvakmok apkelentaskama nema aliepetkeskama. Asleng’o nhan hanetolhem’a lhta ngvakmok kaselha allaniemhaiangka m’a, lhta ntak heiano:

—¡Elheng no elanhono hengke’e! —lhta ntak ma’a.

Ka asvet’o lhta mokhom lhema etanlheng apaiseiam ma’a, apto apkanantema apmaikama alhta apmek lhema al·hanemmalhka nak nentoma. 6 Asleng’o nhan nema aliatekama aiseksek 4 kaselha allaniemhaiangka alhta m’a, lhta ntak:

—Lhema aknem anak nenmakmekama akianmoma, nkolhok hata akianmoma 1 kilo nak trigo, nlho ka la nhan tres kilo nak cebada aktek, koka menaqteves ankek aceite kakpota nhan vino —lhta ntak nema aliatekama m’a.

7 Ka asvet’o lhta mokhom Nepkesek Apketkok apkentaso mokhom cuarto nema aliepetkeskama, asleng’o lhta nhan cuarta kaselha allaniemhaiangka, lhta ntak heiano:

—¡Elheng no elanhono hengke’e! —lhta ntak ma’a.

8 Ka asvet’o nhan mokhom ma’a lhema etanlheng apietektema apanke, apto apkanantema nengetsepma lhta apvesai’a m’a. Aplhelhma lhta nhan po’ok apvesai’a lhta nhan ma’a ngkolatsenkolha apkeletsepma. Nne lhta allangko apkenmopvanka’a kakpota ennapok hata cuarta parte nekha atkok enenlhet’avok lhmankek ham alleniem’o apkennapommap, mek, akiennaktema anmaska apiempeiok, kakpota nhan kaselha nevhak alloma annapma.

9 Netamen Nepkesek Apketkok apkentaso quinto nema aliepetkeskama, asvet’o lhta nhan apkel·hangok aptekioma lhta neksa apkelpaieskama ania’a aplhenammap Eniapom Neten, aniem’o lhta apkelleliehekho m’a, nkakhaiangke lhta m’a koneng alvanlhemmalhkelha qaselha. 10 Lhta antangkok akiennaktema nkek alpaqmeiasma:

—Apveske, lheiap apto Apokkenammap memangveiam ngkolatsekama, apto nhan have niapak anke ¿Se lha aknem hata eliekpelkok lheiap eliaqmongkaskesekhak hata apkeltemakha enenlhet alhta hengennapma ennengko’o, he? —lhta ntangkok alpaqmeiasma apkel·hangok ma’a.

11 Ka kno lhta allangko apkelentalhnema apkenmopai’a apankek ma’a, kno lhta nhan allelto elel·halhnek sekhe ketsek akvakmo apsavhekpo ta aptekievekha aplhamakha apkelaimommap apkelialheng’a apketlhelhma’ak ma’a, ka aktemo lhta aptekievekho nhan ma’a.

12 Netamen Nepkesek Apketkok apkentaso sexto nema aliepetkeskama, akpelapkeso akvo’o akiavai’a akievhekama lhepop. Ntaqmelkasave lhta nhan akpaisemakho aknem malha lhta akto nak nentalhnekha nak aptavkeskama eniempek anak anmaiosak’a nak engvalhok ankok, apielhvasakhe lhta nhan pelten malha lhta aptakhak ema. 13 Apallakme lhta nhan nalhepop iav’a, malha lhta nhan aptangko kto nak akielhna higo iamet higuera lepankaie’ akievheskama nak alhkaiam akiennaktema nke. 14 Mmaskengvakme lhta neten malha lhta nta kto nak vakkahak anak nema aliaqsasekha. Nkelhanke lhta nhan aknaiangkolha lhepop aliakiengveiam nemmen anak kakpota nhan nalhma akhaiam. 15 Netamen apkeniangko lhta apkelveskai’e lhmankek ham, kanhan nema apkelletsekama, capitanes, kanhan nema apkenmopvanka’a, kakpota nhan aplhamakho nema allasennaikama nema apkelianmoma kanhan metnangko nema apkelianmoma. Apkelielhanengvakmo lhta m’a alalhva’ak metaimong, kakpota nhan aiseksek metaimong aliavai’a aliaqiema akieto m’a nalhma akhaiam. 16 Nkelpaihema lhta apatno’ok apkelpaqmetkeso metaimong aliaqiema kakpota nhan nalhma akhaiam, lhta aptangkok apkellano:

—Koiaqnen tekhenlhet’ok angelielhanmok kakpota manghengelvetiek apto apnema aptanema apveske kanhan Nepkesek Apketkok aploma, 17 ngva’ak akiavai’a aknem aploma m’a, mamma enenlhet evaskapok ma’a —lhta aptangkok enenlhet ma’a.