Rev 8 | TmfSC | STEP | Netamen asvet’o mokhom Nepkesek Apketkok apkentaso lhta aktakha nnelha septimo nema aliepetkeskama m’a. Mpelapkaske lhta akto metka akiennoma lhma m’a neten akvakmo nalhet lhema alanei’o aknem.

‏ Revelation of John 8

Apkelentaskama Nepkesek Apketkok septimo nema aliepetkeskama

1 Netamen asvet’o mokhom Nepkesek Apketkok apkentaso lhta aktakha nnelha septimo nema aliepetkeskama m’a. Mpelapkaske lhta akto metka akiennoma lhma m’a neten akvakmo nalhet lhema alanei’o aknem. 2 Asvet’o lhta nhan mokhom 7 ángeles apkelaknangka m’a akieto napaqtek Eniapom Neten, akno lhta nhan allangko 7 trompetas moklhem’a m’a. 3 Apvo’o lhta po’ok ángel apkenengvo m’a ammelhakha alvanlhemmalhkelha qaselha, apmaikama lhta nhan apmek lhema melhma alhankok alienmomo oro, ankok koka m’a nema alvanlhema panaktema ava akmases aimes incienso. Nne lhta nhan angkongvakmo m’a nkeskama panaktema ava kakpota eniangkok Eniapom Neten takhalhet ma’a alvanlhemmalhkelha qaselha oro aiempek akieto m’a naqtek apveske aptanema. Ka akiepetkakho lhta nhan apkelelmalhnongkoma apkellelto apkelpokkenammap ma’a. 4 Nkenmakhe lhta neten eten ankok panaktema ava akmases aimes apmangkolha apmek ángel melhma alhankok ma’a. Mpasmakhe lhta m’a apkelelmalhnongkoma apkellelto apkelpokkenammap anmeiakho m’a napaqtek Eniapom Neten. 5 Ka apkenmo lhta nhan ángel melhma aknaikamok ma’a alvanlhemmalhkelha qaselha, aplhatmom’a melhma alhankok, ka apieniantamo lhta takhalhet lhepop lhmankek ham. Mpelapkaske lhta nhan akvakmo apkelhtenioma akiennaktema nkek ma’a kanhan nema aliatekama, apkelienmoma nhan kakpota nhan akievhekama lhepop.

Apkelpaivaskama trompetas ángeles

6 Ka apkellanakho lhta apkeltakha 7 ángeles lhek ma’a kakpota elpaivasangkok ma’a 7 trompetas. 7 Apaivaso lhta apmanie ángel ma’a, mpelapkaske lhta nema alhaienta ahekho’ok nalhepop kakpota nhan talha ema akiepetkai’a. Hanetolhem’a nekha’ak anak mmetke lhta lhema nekha lhepop kanhan iamet kakpota nhan lhamakho panaktema alielsellemo.

8 Netamen apaivaso mokhom trompeta apqanet alhta apvakmo m’a ángel, akpelapkeso lhta nema akiengama malha lhienep akhaiam akiavai’a akieplomo talha akieto m’a alvata. Hanetolhem’a nekha’ak anak alvata akiav’akha, ntakhe lhta lhema nekha ema m’a. 9 Hanetolhem’a nekha’ak anak alloma la alvata nkeletsepke lhta lhema nekha. Hanetolhem’a nekha’ak anak loma nemmen naqtevaske lhta nhan lhema nekha m’a.

10 Netamen apaivaso mokhom trompeta apqanetolhem’a lhta apvakmo ángel, mpelapkaske lhta apteiakmo lhema apiav’a apiavai’a akieplomo talha. Aleivoma malha lhta aptak pa’ang apva’a nentetkasekamok anak emmanie, apteiakme lhta takhalhet lhema nekha tercera nekha’ak anak alvata kakpota nhan alenteiapmakha iemmen. 11 Apmopaska lhtoka apvesai’a iav’a m’a, akmaska lhta nha ntakhak lhema nekha tercera nekha’ak anak iemmen. Aplhanie lhta apkeletsepma enenlhet’avok aniem’o apienaikamok akmaska iemmen.

12 Netamen apaivaso lhta mokhom trompeta cuarto ángel, nne lhta akiensaso tercera lhema nekha aknem, tercera lhema napokha pelten, tercera lhema nekha nhan apiav’a apkellapommatema. Ka apkelienakteso lhta lhma m’a mok tercera lhema nekha aknem, pelten kanhan apiav’a. Mamma lhta nha ntak apommatma aknem anke nak tercera lhema nekha aknem anke nak, kanhan pelhasep anak mamma lhta apommatema tercera lhema nekha pelhasep la’a. 13 Netamen ma’a asvet’o neten, asleng’o lhta nhan lhema meivoma apiavai’a apkempangka m’a neten, lhta aptak apiennakteso apaivoma hengke’e:

—¡Ai enenlhet’avok la ie’ apkelloma nak nalhepop, nkovak hata akientalhnema ham akvakmo ta apkelpaivaskama trompetas apkanetolhem’a ángeles! —lhta aptak ma’a meivoma.