Rev 9 | TmfSC | STEP | Netamen apaivaso mokhom trompeta quinto ángel, asvet’o lhta lhema iav’a apteiam alhta nalhepop, nne lhta angko lhema llave ankok malhek konne kankek.

‏ Revelation of John 9

1 Netamen apaivaso mokhom trompeta quinto ángel, asvet’o lhta lhema iav’a apteiam alhta nalhepop, nne lhta angko lhema llave ankok malhek konne kankek. 2 Apmaiesakhe lhta malhek ma’a, ntepke lhta eten, malha lhta ntak malhek akiavai’a nak alanemmalhkelha la iamamelhma akteiapma nak eten ankok. Ienaqteskaske lhta lhma aknem kanhan neniava atsai’o lhma nak aniem’o m’a apma eten akpanma. 3 Apkelentepke lhta aiseksek eten seva’ apaihakhe lhta takhalhet lhepop lhmankek ham, nne lhta allangko apkenmopvanka’a, malha lhta nha kto nak iettaha’. 4 Nne lhta aleltennaso meleltammap enaqtevaksek panaktema alielsellemo kakpota nhan iamet. Vanlha lhta apkelleltakpok enaqtevaksek metko la alelqasemmalhka alpaihakha napaqta’a apvesai’a Eniapom Neten. 5 Nne lhta nhan allelto mennapek ma’a, vanlha lhta apkelleltakpo elaskeksek apiempeiok akvakmo 5 pelten ma’a. Apkelaskeske lhta apiempeiok aniem’o apkenmoktai’a malha akto nak iettaha la henmoktai’a.

6 Hata akvo’o ta aknem anak ma’a, eteniangkok hata niekhe apkeletsepma enenlhet’avok aniem’o akientalhnema nak ma’a. Koka mankollapvankek hata elvetekhak apkeletsepma m’a, avanhek hata niekhe ngkotnek apkenmahai’a eletsepok ma’a, koka malha aniema ta ngkotnek nengetsepma nak.

7 Malha etanlheng alhta seva apkelpenesammap la ennapakpok ma’a. Nnangke lhta apkelelhnekha apqatko’ok alienmomo oro, malha lhta nhan enenlhet la apqatko’ok ma’a. 8 Malha lhta nhan ngkelvana nak ava apva, malha lhta nhan iama kmeiva la am’ok apmo’ok. 9 Apkeliokha lhtoka malha apkelapkeskama la tava apak, aplhempankok alhto ka apkelempangko la aliepioma malha kto nak etanlheng apkelienioskama la koleto annapommalhka nak ankok hanet ameiok. 10 Apietto’ok alhto ka malha iettaha’ henmoktai’akha nak, nietne lhta anmovanka’a kakpota nkonaqtevaksek enenlhet’avok akvakmo 5 pelten. 11 Apne lhta nhan apiav’akha apveske apankok seva lhema ángel aplomakha lhtoka mota akieto malhek konne kanke, nema altema koka Hebreo apaivoma Abadón, kakpota nhan Griego apaivoma Apolion ^{▼▼Hebreo apaivoma kanhan griego apaivoma nema altema hentevaskama niapom.}. 12 Nieka’a lhta m’a amanie nkek akiavai’a akientalhnema, nkaimelhkek koka mokhom hanet akientalhnema.

13 Netamen apaivaso mokhom trompeta sexto ángel, mpelapkaske lhta asleng’o aktepo nema aliatekama aiseksek alvanlhemmalhkelha qaselha alienmomo oro akieto m’a apkammelhakha Eniapom Neten. Nav’ak alhto ka nkelanmak ma’a malha 4 nentoskama nak nkapeto’ok. 14 Lhta ntak nema aliatekama ano sexto ángel lhek apto apmaikama trompeta:

—El·hatsoskeskak hata apnaktetemmap 4 ángeles apkakhangko nak akieto nak ha’e alvata akiavai’a Eufrates —lhta ntak nema aliatekama.

15 Ka apkel·hatsoskasengko lhta apnaktetemmap 4 ángeles lhek kakpota ennapok tercera lhema nekha enenlhet’avok. Apkelpeneskamave lhta apkellanekha apkeltakha m’a, apkeliave lhta nhan aklhengama alanei’o aknem, pelten kanhan iantelhkapa kakpota ellempok enaqtevaksek ma’a. 16 Asleng’o lhta nhan ania’a m’a 200.000.000 soldados etanlheng apkelkanantema. 17 Ngvet’a lhta nhan ehaqtek etanlheng kanhan enenlhet apkelkanantema m’a, apkelapkeskama lhtoka apnenio’ok tava apak alpalhkammalhka color ankok akielhvasema malha aktonak talha. Akhanaktema malha lhta nha kto nak zafiro, kakpota nhan alietektema malha kto nak azufre. Apqatko’ok alhto ka etanlheng malha iama kmeiva, apatno’ok alhta alenteiapma talha, eten, kakpota nhan talha aimenek azufre. 18 Nkennapme lhta tercera lhema nekha enenlhet’avok aniem’o m’a hanetolhema qaselha akmovana hentevaksek alenteiapma apatno’ok etanlheng, ka aktonak talha, eten kanhan azufre. 19 Nnangke lhta nhan etanlheng apkenmopvanka’a aniem’o apatno’ok kakpota nhan apiepakio’ok malha lhta menasma apqatko’ok, anmoktai’a alhta mota enenlhet’avok ma’a.

20 Ma lhtoka elvatesaiangkok apkellanekamok ngkollatsekama m’a apkellelto lhta metekioma aniem’o m’a qaselha lhkek akmovana hentevaksek. Nheklhe lhtoka apkelteklheikamok aptapno’ok naqtavek kasekapok av‘alho’ok kakpota nhan qaselha akiokha la alanemmalhka alienmomo oro, plata, bronce, metaimong kakpota nhan iamet nekha’a. Mankomovana nak nkota lhma, nkonnak nahan, mankomovana nha nkolhong ma’a qaselha akiokha nak ma’a. 21 Ma lhta nhan eliaqmongkasekhak mo’ok apvalho’ok enenlhet’avok anak, melvatesaiangkok na aptaikamok ntekioma niapma’ak, apkeliolhma meliamolhma, apkenmensangveiam alhma kakpota nhan apkenmenielhma.