‏ Romans 11

Apkelietnai’o napaqta’a Eniapom Neten ko Israel

1¿Apkeltaknongkongke nlho Eniapom Neten apkennemolhema apanke Israel, he? ¡Mma’! Ko’o nhan asto israelita, asto nhan aptaven neptamen Abraham, askeniemai’o apasmekha apketkak neptamen Benjamin annenga. 2Tep nak nanek apkeliekieskamo Eniapom Neten Israelitas kakpota etnek apkennemolhema, man koka nhan eltaknongkomak kolhvave nak. Kotlheianvakho no apvalho’ok ketlhengkap apkeltennasemmap ania’a Elias apketlheianmo lhnak nanek ko Israelitas apkellaneiangko ngkollatsekama napaqtek Eniapom Neten, lhna aptemak:

3«Apveske, apkennapeiangkek apkeleltennaskama ania’a apankok lheiap ha’e, apnaqtevaseiangkek na m’a alvanlhemmalhkelha nak qaselha nema aikamok anak lheiap. Vanlha koka ko’o askeniem’o napaqtavek ma’a, kolhva koka heleliama apkenmahai’a hennapok ma’a», lhnak nanek aptemak Elias.

4Koka apkatemmoikama lhnak Eniapom Neten ma’a, lhna aptemak:

«Askelpokkenke ko’o 7.000 enenlhet’avok ma’a melelteklheiangko aptapno’ok naqte qaselha akiokha alanemmalhka akvesai’a Baal», lhna aptemak.

5Nnavek na nenvanlha nak, apkakhangkek napokha pketkok judios apkellelto apkeliekieskama Eniapom Neten aniem’o aktaqmanma nkek apkellanei’o, 6have aniem’o aptaiangkolha apankavek la’a. Ka apkeliekieso la Eniapom Neten enenlhet’avok aniem’o aptaiangkolha apankavek la’a, mmaskek ma’a apkeliekieso aniem’o aktaqmanma nkek apkellanei’o m’a.

7Ka ntemak na kolhvave nak ko israelitas, niekhe apteniaikamok apkeleltemo eltaqmelkeskesek apkellangiemhaikama Eniapom Neten, koka melvetangveiakmok ma’a. Vanlha koka apqanetek apkelvetangveiam ma’a, apkellelto nak apkeliekieskama Eniapom Neten. Aplhamakha koka nnengkek aliennakteskeskamo apvalho’ok. 8Ka aktemo nak aklheianma aktalhesammalhka Vakkahak Eniapom Neten apaivoma hengke’e:

«Apkeltemeskaskek Eniapom Neten malha teien allapekama apvalho’ok, malha nhan melvetai’a lhma la apaqto’ok, malha mellengai’a lhma nhan apaiko’ok, akvakmo nenvanlha nak», lhna aptemak.

9Lhnak na nek na aptemak apveske David:

«Nkotnekhak hata malha al·hanemmalhka allangkemmalhka ngkolatsekama apanko’ok anak, kakpota nhan al·hanemmalhka tama kakpota nkolpalesemmak aniem’o aliaqmongkasekha nkave meliamolhma apanko’ok apankave’. 10Nkolhek hata nhan altemeskeso metka apaqto’ok, etneskesangkok hata al·halhema apkapo’ok aniem’o akientalhnema apkelpatama» ▼

▼Salmos 69:22-23

, lhnak nanek aptemak.

Apkelvonkasemmap tep metnangko nak judios

11Smak’ak alelmalhnama kolhvave nak, ¿aktakha nke nlhota nkotnek apnaikamok nalhepop judios apkellelto lhta apkelelpelapeiam, he? ¡Ma, elaqnekhak hata neten ma’a! Koka apalleiam anak ma’a nkoltemeskesek hata apkelvonkasemmap tep metnangko nak judios, netamen elelmeiavama ta judios apkelvet’o ta m’a. 12Ka kno la altakmelkeskaso apkellangiemhaikama metnangko judios anak aniem’o meleliehekho judios kakpota nhan apalleiam, tep ankek hata ngkotnek altakmanma apkellangiemhaikama metnangko judios akvo’o ta aknem Eniapom Neten apkenmekho takha m’a judios.

13¡Ellailho no ketlhengkap metnangko judios! Ko’o asto heiapaskama Eniapom Neten kakpota apaiaksek ania’a aktaqmanma apieseksek ketlhengkap, avanhek ankek askai’o asmakmekama nak. 14Askeltavek ko’o aspaivomo lhema nak ennathama ketlhengkap, netamen hata nhan helketmok niekhe kakpota atlhekmoksek ankok apkelvonkasemmap tep ma’a. 15Apkenmangkek takha Eniapom Neten metnangko judios aniem’o apkeltaqnongvekha judios apankave nak. Netamen hata m’a apkenmokho la takha Eniapom Neten judios apankave nak, neten ankek hata ngkotnek altakmalveiam apkellangiemhaikama aplhamakho enenlhet’avok lhmankek ham, ngkolhek hata nhan aknaqlhatekhaskakmo mokhom apieseksek apkenmaskengvaiakmo.

16Ka apmaniaie nak apteiapma pan apkelpokkenammap ma’a, nnavek ma’a nema akiaqhapeskama nak harina apto nhan apokkenammap ma’a.

Kanhan aikapmen’ok anak iamet akto akpokkenammalhka, nnavek na m’a aktengok anak alpokkenammalhka nhan ma’a.

17Apkellelto nak judios malha aktengok anak iamet akvesai’a olivo, moklhem’a koka nnemak aliaqtemanmo m’a, ka akno lhta aliepetkeskaiakmo ketlhengkap ma’a metnangko nak judios, malha aktengok apkelleniem’o m’a mo’ok iamet olivo amhama nalhma. Kolhva koka nietnek aliennaktema m’a aniem’o alpetsesma iemmen aikapmen’ok kakpota nhan aieivo’ok ma’a iamet anak. 18Koka melakponkoie’, melvannama nhan ketlhengkap aktengok alhta aliaqtemenammalhka, ngkanek ketlhengkap have apkeliennaktema apankavo ie’, koka aniem’o m’a aikapmen’ok lhek ma’a.

19Kelha ngkotnek atlheianma apvalho’ok ketlhengkap heng:

—Nnengkek hengeliepetkeskaiakmo m’a alanmakha lhta niekhe aktengok lhennenga aniem’o kelha nengelelto nengeliamolhma —kelha ngkotnek atlheianma apvalho’ok ketlhengkap.

20¡Koka ellaho ta ketlhengkap ma’a! Apkeliaqtemenammakpe lhta malha aktengok alhta lhennenga aniem’o aliaskeiam, ka akno aliepetkeskakmo nhan ketlhengkap ma’a aniemai’o nhan meliaskeiam. Koka apkelakpo la ketlhengkap, 21menmekhek hata nhan takha Eniapom Neten ma’a, etlhohok hata nhan ma’a malha aktengok alhta lhennenga nema aliaqtemanma lhta.

22Hai’, Eniapom Neten apto apiamolhma apanke’, apkeltakmelkaskek na apkellangiemhaikama ketlhengkap metnangko nak judios, apto nhan apiaqmongkasekha apkeltemakha meleliehekho lhta judios. Koka apkelieniakho la aptaikamok meliaskeiam ketlhengkap ma’a, ngkolhek hata nhan aliaqtemenvaktamo m’a. 23Koka aptangkokho ta mokhom meliaskeiam judios apankave nak, eliepetkeskakhak hata mokhom iamet olivo alanmakha lhta, apvankek koka Eniapom Neten etnek ma’a. 24Ketlhengkap apkellelto nak metnangko nak judios, malha lhta aktengok olivo aniem’o nalhma, Eniapom Neten alhta apkeliaqtemanvakmok ma’a, apkeliepetkeskaktamo iamet olivo anammalhka nak natemma aniem’o lhta nhan apmopvana. Apvanke pankek hata nhan eliepetkeskakhak mokhom aktengok alanmakha lhta lhennenga, iamet olivo anammalhka natemma.

Apkelvonkeskama ta tep Eniapom Neten ko Israel

25Ketlhengkap elialheng’a metnangko nak judios, melakpo nkek nkotlhenek apvalho’ok apkeliekieskama Eniapom Neten aniem’o nema apkeliamo apankave’, have m’a. Nietne lhta apeneskamo Eniapom Neten akielhammalhka apmak’akha etnehek, napokha israelitas nkeliennakvaiakme lhta apvalho’ok akvakmo toka aknem ma’a aptaikamok meliaskeiam aplhamakho nak metnangko nak judios. 26Netamen ma’a elvongkasakpok hata tep aplhamakho apkellelto nak israelitas. Ka aktemo nak aktalhesammalhka Vakkahak Eniapom Neten apaivoma hengke’e:

«Na temma Sion enieniemak hata apkelvongkeskama tep kakpota eienieskasekhak ngkollatsekama Jacob. 27Koka akto m’a annemo mo’ok engvalho’ok asmak’akha ta atnek askellanei’o m’a enenlhet’avok akvo’o ta nhan aknem askel·hatsoskasekamok hata ngkollatsekama nak» lhnak nanek aptemak.

28Ellailhono ketlhengkap metnangko nak judios, mantek israelitas kolhvave nak apkellelto apkellammelhekha ania’a aktaqmanma nenvanlha nak, koka nkeltaqmelkaskesakhek apkellangiemhaikama ketlhengkap ma’a. Koka apkellamelakmek mokhom Eniapom Neten ma’a israelitas ngkanek apkeliekieskama lhta apkelieihengka neptamna’ak, 29apkellaveiangka lhta nhan, apkellaiangko nhan metka akianmoma qaselhaha, metka apkenmasvekha nhan, melvankakmok na apkellelto lhta apkellavekama.

30– 31Lhennenga lhta ketlhengkap metnangko nak judios ma lhta eleliehekhok Eniapom Neten, apkelietnai’avek koka napaqta’ak ketlhengkap Eniapom Neten aniem’o m’a meleliehekhok apkennemolhema apankave. Netamen hata nhan ma’a elietnahok napaqta’a apkennemolhema apanko ie’, ka aptaiangko nak na apkellanei’o ketlhengkap. 32Eniapom Neten apkeltemeskeskama aplhamakho meleliehekho m’a kakpota netamen mokhom ma’a elietnahok napaqta’a aplhamakho nak ma’a.

33Neten apankek akietnema apiangveiakmo Eniapom Neten, apkeliekpelkemo nhan lhamakho altemakha qaselha, mongapvankek ennengko’o angeliangvomhok alketamekama apvalhok ma’a kakpota nhan apkellanai’a qaselhaha. 34Mamma nhan enenlhet eihok akietnaikama la apaqtek, mankapvankek na enenlhet eltennasangkok ma’a. 35Mamma nhan enenlhet apkaikamok qaselha apankok ma’a kakpota nhan aptakheskeskamo la qaselha apankok ma’a. 36Nkanek Eniapom Neten apto apkellanai’a lhamakho qaselha lhmankek ham, apanko’ok apankavek ma’a, apkellaikamok na aliennaktema m’a qaselha lhta apkelentepkeskama kakpota nkollokaha.

Hai’, ntasek ma’a ngkolhek aktakneskasengko apvesai’a lhma nkek ham. Amen.