Rom 14 | TmfSC | STEP | Enmamok hata takha engelialheng’a mankoliennaktema nak meliaskeiam mokhom, mellatemmongap apanko ie’ aklhamakho aktemakha aptangkolha la’a.

‏ Romans 14

Nengellanemmalhkelha antangkok neksa mankolhnemo mo’ok envalhok nenlheianma la’a

1 Enmamok hata takha engelialheng’a mankoliennaktema nak meliaskeiam mokhom, mellatemmongap apanko ie’ aklhamakho aktemakha aptangkolha la’a. 2 Moklhem’a nketlhenke mota apvalho’ok ntasek anto’ok lhamakho qaselha, koka apkellelto nak mankoliennaktema meliaskeiam nketlhenke apvalho’ok ntasek etavangkok vanlha akielhna aniem’o aniep.

3 Apkellelto nak apkeltaseiama lhma meleltamo nkek meliangveiakmo apkellelto nak metekamok aklhamakho qaselhaha. Koka apkellelto nak meltaseiama na lhma, melpaiesamankek apkelvesai’a m’a apkellelto nak aptekamok lhamakho qaselhaha ngkanek apkenmek na takha Eniapom Neten enenlhet’avok anak ma’a. 4 Mankoietok eliemetkasama ketlhengkap nkotno apkenmakmesaikama, koka apveske apanko’ok anak ma’a apvankek etlhenek ngkolatsekama apkenmakmekama nlho ka la aktaqmanma. Koka ntasek hata ngkotnek apkenmakmekama m’a aniem’o apasmoma Apveske.

5 Moklhem’a ketlhengkap nketlhenke mota apvalho’ok lhema aknem akto neten ankek akiaspommalhka mankolhok ma’a mo’ok la aknem. Koka napokha nketlhenke mota apvalho’ok mamma aknem akto neten ankek akiaspommalhka la’a, koka nietavek etnangkok aliakvanlha la ntasek etnangkok ma’a.

6 Apkellelto nak apkelpokkenkeskama lhema aknem anke kakpota eltakneskasangkok Apveske, apteniaikamok mota apkellai’o m’a. Apkellelto nak na apkeltaseiama lhma, apteniaikamok na mota apkellai’o Apveske kakpota nhan etnangkok gracias Eniapom Neten. Apkellelto nak meltaseiama lhma, apteniaikamok na m’a apkellai’akha la’a Apveske kakpota nhan etnangkok gracias Eniapom Neten ma’a.

7 Mamma ennengko’o enlhema la enganko’ok engankave nelaniemhaikama nak, mamma nhan ennengko’o enganko’ok engankavek neletsepma nak. 8 Nentaikamok la enhalhnanko’ok anak mokhom ma’a, ankok ma’a nengai’o Apveske. Neletsepo la nhan, ankok na m’a nengai’o Apveske. Nentangko la enhalhnankok mokhom, nlho ka la neletsepo la’a, koka apto Apveske apanko’ok ennengko’o m’a. 9 Ngkanek apketsepke lhta Cristo kakpota nhan aplhatekhangvakme lhta apieseksek apkenmaskengvaiakmo, aptaiekho nhan apveske takhaplhet’ok apkellelto nak apkeletsepma kakpota nhan aphalhnanko’ok anak.

10 Ka ngkanek ketlhengkap meliemetkasama, meleltangkek na meliangveiakmo apkelialheng’a ngkanek Eniapom Neten hata hengetlhenek nellanekamok ngkolatsekama nlho ka la nhan aktaqmanma nelvakho ta napaqtek ma’a. 11 Ka aktemo nak aktalhesammalhka Vakkahak Eniapom Neten apaivoma hengke’e:

«Lhna aptemak Apveske: Elteklhengkok hata aptapno’ok nehaqtek ko’o aplhamakho enenlhet’avok lhmankek ham, eliavenkaskesama ta nhan apvesai’a Eniapom Neten, have niapak ankek astakha nak alheianma» ^{▼▼Isaias 45:23}, lhna aptemak.

12 Hai, nenlhamakho ta ennengko’o angetlhenek nentaiangkolha engankave napaqtek Eniapom Neten ma’a. 13 Ka ngkanek mongetlhenama apkelvesai’a emo’ok, ntasek na montenkesek emmo’ok, monnaqtevaksek na m’a kakpota mankovhek apkelvatesaikamok meliaskeiam ma’a.

14 Moi’askeiakmok ko’o apveske engankok Jesús, asiave ko’o mamma ngkolatsekama nentoma la napaqtek Eniapom Neten ^{▼▼Atlheianmo lhnak apvalho’ok judios apkellanemo nkolpaisengkasak apvalho’ok moklhem’a aptekamok ma’a napaqtek Eniapom Neten.}, koka moklhem’a engelialheng’a kelha atlheno la apvalho’ok mangkolatsekama anto’ok mantomakha la’a, ntasek etnangkok apankavek ma’a.

15 Ellailho no, ka apkellavkeskakmo la po’ok ketlhengkap aniem’o m’a aptekamok metoiangkolha nak apkellaskama, koka have akvesai’a nengasekhai’o emmo’ok ma’a ngkanek apkellasekhavek na Cristo m’a engelialheng’a nak, apketsepke lhta nhan apkeliaqmoiekha m’a.

Metavamonkek na aptekamok napaqtavek ma’a kakpota nkoliasangko lhma ngkanek nkonnathaksek hata m’a, elvatesangkok hata nhan aptaikamok meliaskeiam. 16 Netamen eliemetkasekhak hata ketlhengkap ma’a ngkanek apvanka’ak etavangkok lhamakho qaselha m’a.

17 Koka akieto nak aptemakha apveske Eniapom Neten, mamma nema hengaskama m’a aktemakha anto’ok, kanhan neniama. Koka m’a akto neten ankek akiaspommalhka anteniangkok nentaikamok nelpeivomo, altaqmelaikama engvalho’ok kakpota nhan akpaihekha engvalho’ok aniem’o Espíritu Santo. 18 Enenlhet apto la apkelanai’a lhamakho qaselha nak koka apto apiamolhma apkasennaikama Eniapom Neten, nlekavek apvalhok ma’a, enmankok na takha enenlhet’avok ma’a.

19 Hai’, angellanangkok hata lhamakho nke nak kakpota nkovak altaqmelaikama engelvalho’ok kakpota nkovanamok lhemek aliennaktema engelvalho’ok aniem’o nelpasmommalhko. 20 Menaqteves aktemakha apkelpasmommakpo apkellanemakha eltehek Eniapom Neten apieseksek ketlhengkap aniem’o aptekamok apketlheianma. Lhamakho nentoma nak allelto alalhnai’o napaqtek Eniapom Neten, koka mangkolatsema m’a etavangkok napaqtavek apkelialheng’a lhema nentoma la akmovana nkolietnokhaskesek apvalho’ok apkelvet’o la’a ngkanek nkolvaiventak kelha meliaskeiam. 21 Ka ngkanek ntasek metavankek apetek la’a, meinangkek na vino, mellanamok qaselha akmovana nak nkolietnokhaskesek apvalho’ok apkelialheng’a, nkolvaiveskasentak na meliaskeiam anak. 22 Ka mei’askakmo la lheiap apvankek etvok lhamakho aktemakha aptoma, ntasek aktakha la aklheianma apvalhok lheiap napaqtek Eniapom Neten. ¡Koka nhan aktaqmelakho nkek enenlhet apkelanai’a qaselha mankotvaskeskama la nhan aklhenaikama apvalhok netamen ma’a! 23 Koka aptavo la apankek aptoma alpeivekha aklheianma apvalhok mangkolatsekama nlho ka la ntasek, eipetkasangkok nahan, koka aptevasekpe pankek apankok apankek ngkanek meieplavkasak mei’askeiam ma’a, koka akto ngkolatsekama nkek ma’a.