‏ Romans 15

Nengellanemmalhka ampasmok mankoliennaktema nak meliaskeiam

1Nengelelto nak aliennaktema mongeliaskeiam Eniapom Neten mangkolatsema mota anteniangkok nenmak’akha la antangkok. Ntasek koka enmankok takha apkenmak’akha la nhan etnangkok nkoliennaktema nak meliaskeiam Eniapom Neten. 2Ntasek koka anteniangkok nkollekok na apvalho’ok emmo’ok, angellanak na aktaqmelo qaselha kakpota nhan ngkotnek nempasmekha nenlhamakho akvanekamok. 3Ka aptemakha lhta mota Cristo meteniai’ak ngkolhek akiaspengka apankok apanke, ka aktemo nak aktalhesammalhka Vakkahak Eniapom Neten apaivoma hengke’e:

«Nteiakme lhta tekhelhet ko’o aptaqnommap lheiap» ▼

▼Salmos 69:9

4Lhamakho aktemakha nak aktalhesammalhka Vakkahak Eniapom Neten Apaivoma kakpota hengetlhekmoksek ennengko’o m’a, akpaieskaiam engvalho’ok, hentemeskeskama nhan metka nempekheskama, hengaikamok na al·halhnekama engvalho’ok angelvetak aktaqmanma.

5Askeltavek ko’o Eniapom Neten apto niapom metka nenpekheskama nak kanhan ma’a akpaieskaiam engvalhok, elpasmok ketlhengkap kakpota elloka lhemek annemo mo’ok apvalho’ok, aptemakha lhta mota nhan Cristo Jesús. 6Netamen hata nhan ma’a aplhamakho ta eliavenkaskesama Eniapom Neten apvesai’a, apto apiapom apveske engankok Jesucristo.

7Hai, ntase enmangko mota takha po’ok ketlhengkap, aptemakha lhta Cristo apkenmangke lhta takha nhan ketlhengkap. Netamen ma’a eltakneskasangkok hata aplhamakho apvesai’a Eniapom Neten ma’a.

8Asmak’ak aleltennaksek ketlhengkap lhema qaselha, apvai’a lhta Cristo kakpota etnek apkellasennaikama apkellelto nak apkelieplavkeskama aliaqtemenammalhka nekhatko’ok apkellammelhakha. Apieplavkeskamo nhan aptemakha lhnak nanek apeneskamo apaivoma Eniapom Neten aplheianma apkeleltennaskamo nelieihengka’a kakpota elvetaskesek na iokhalhmek ankek aplheianmo lhnak nanek Eniapom Neten. 9Apvai’a lhta nhan m’a kakpota elietnahok na napaqta’a metnangko nak judios kakpota eliavenkaskesama ta nhan apvesai’a Eniapom Neten ma’a. Ka aktemo nak aktalhesammalhka Vakkahak Eniapom Neten apaivoma hengke’e:

«Alhenek hata apvesai’a lheiap aptema apiavai’a apankek napaqtavek metnangko nak judios, annekmaksek hata nhan apvesai’a lheiap», lhna nnema aktemo m’a.

10Ka ntemak mokhom aktalhesammalhka hengke’e:

«Kolpaihekho apvalho’ok metnangko judios apkelpasmekha nhan Eniapom Neten apkennemolhema apankave nak».

11Ka ntemak na mo’ok aktalhesammalhka hengke’e:

«Eltakneskasamok apvesai’a Eniapom Neten lhamakho apkellavakha kakpota nhan lhamakho temma lhmankek ham», lhna nnema aktemo m’a.

12Lhnak nanek na aptemak apkeltennasemmap ania’a Isaias:

«Nkotiepok hata malha apiapmenek Jesé, etnek hata apveske takhaplhet’ok lhamakho apkellavakha, ngkoitek hata alel·halhnekama apvalho’ok aplhamakho enenlhet’avok aniem’o m’a» ▼

▼Isaias 11:10

, lhna aptemak Isaias.

13Hai, Eniapom Neten apto niapom al·halhnekama engvalho’ok angvetak aktaqmanma, ellangkok hata alpaihekha apvalho’ok kakpota nhan altaqmelaikama apvalho’ok apkellelto nak meliaskeiam apvesai’a m’a, ellaneskasangkok hata nhan apvalho’ok alel·halhnekama elvetak hata aktaqmanma aniem’o Espíritu Santo apmopvana.

Aplheianma Pablo aktemakha apmakmekama apankok

14Ketlhengkap elialheng’a, asiave ko’o apkeliamolhma apankavek ketlhengkap, apvanka’ak na eleltennasangkok po’ok. 15Nkaqhok koka asnaktalheskeskangke ehenkek vakkahak anak kakpota nkotlhengkeskeskakhok apvalho’ok aktemakha apkeltakmelkasemmakpo la’a. Evankek ko’o aleltennasangkok ketlhengkap aniem’o aktaqmanma nkek helanei’o Eniapom Neten, heliekieskama nhan 16kakpota atnek heiasennaikama Cristo Jesús. Apaiaksek na ania’a aktaqmanma apieseksek ma’a metnangko nak judios kakpota nhan eltangkok apkelpokkanma Eniapom Neten, malha qaselha nengaikamok anak apiaspongkomakha la Eniapom Neten, aniem’o Espíritu Santo.

17Ntasek nkalhkok evalhok aniem’o heiasennaikama Eniapom Neten, ngkanek Cristo Jesús heiaikamok asiennaktema kakpota amakmama. 18Have ehenkok ehenkek asiennaktema, Cristo hepasmoma kakpota atsavkesek asketlhekmoskama metnangko nak judios kakpota nkovak na apkelleliehekho Eniapom Neten ma’a. Asketlhekmoske lhta nhan aknema akmovana askeliatekama kanhan askelanai’a lhta qaselha 19hempelapkeskama, qaselha mongenatkeskama nhan aniem’o Espíritu Eniapom Neten apankok. Aspaieske lhta ania’a aktaqmanma lhamakho apkellavakha askempai’o lhta Jerusalen akvakmo iokhalhma Iliria. 20Vanlha lhta mota asmaiangko metkelha la nema akpaieskamakha ania’a aktaqmanma, ma lhta amahai’ak aipetkeskamok asmakmekama nemakha la akpaieskamakha ania’a aktaqmanma. 21Asieplavkeskangke lhta aktemakha nak aklheianma Eniapom Neten apaivoma, ka aktemo nak hengke’e:

«Apkellelto nak metka nema akpaieskama ania’a apvesai’a apieseksek ma’a, elvetak hata m’a. Apkellelto nak na mellengai’a ania’a apvesai’a m’a, eliangvomhok hato ka», ka ntemak ma’a.

Apmahai’a emhangkok Pablo akieto Roma

22– 23Elialheng’a, lhennenga asmahai’a aniantak ham astaikama la amaika’a, man koka amopvanak aniem’o lhta aspaieskama ania’a aktaqmanma metkelha nak nema akpaieskama ania’a apieseksek ma’a. Kolhva koka asavhokiek asmakmekama m’a, ntasek hata aniantak ham 24asmeiakho ta España, neksa alhengama ta nalhet amai hatelha atnek amaika’a ketlhengkap ham, akiakvatakho toka. Nkopaihekha ta nhan evalhok apieseksek anak ham, askeltave niekhe nhan helpasmok hellangkok qaselha apanko’ok aimelhkelha la ko’o kakpota angvempekhok hatelha mokhom alhengama m’a. 25Koka kolhvave nak asmak’ak aniakhak Jerusalen kakpota aletsakhesek patakkom apkelpokkenammap ma’a. 26Apkellankesek alhta anmahai’a nkek apvalho’ok elialheng’a metnangko nak judios apkakhangko m’a iokhalhma Macedonia kakpota nhan Acaya, kakpota ellapaskesek ma’a elialheng’a judios metka apkelletsekama akieto m’a Jerusalen apieseksek apkelpokkenammap ma’a. 27Anmahai’o nke lhta apvalho’ok ellankesekha patakkom anak, ntasek aptaiangko m’a ngkanek malha apkeliaqmongkasekha apkellangkongvaiam alhta ania’a aktaqmanma elialheng’a judios apankavek nak. 28Hata askellangkongvakho ta patakkom m’a, askeltavek aniakhak España, neksa alhengama nalhet amai hatelha atnek amaika’a ketlhengkap ham. 29Angelpasmekhak hata lhemek lhamakho qaselha aktaqmanma hengellaikamok alhta Cristo, have niapak ankek ma’a.

30Elialheng’a, akieplomo apvesai’a Apveske engankok Jesucristo kakpota nhan Espíritu apto niapom hengamelaiam, askeltavek helpasmekha helelmalhneskesek Eniapom Neten 31hengio’ok kakpota manghenaqtevaksek apkellelto nak apkeliaskeiam apkakhangko m’a Judea, kakpota nkolpaihekhak apvalho’ok apketlhevangko ta qaselha nak metka akianmoma apkelpokkenammap ma’a ko Jerusalen. 32Netamen hata m’a, apkelto la Eniapom Neten, aniakhak hatelha apieseksek ketlhengkap ham astaikama la amaika’a, akieplomo akpaihekha telha nhan evalhok, aiamposalhkak hatelha nhan ketsek ham. 33Hai, askeltavek ko’o Eniapom Neten apto niapom aktaqmelaikama engvalho’ok, etnangkok hata mota nhan apketlhelhma’ak moklhem’a ketlhengkap ham. Amen.