Psa 38 | TpiKJPB | STEP | Wanpela Sam bilong Devit, bilong bringim tingting i kam bek gen. ¶ O BIKPELA, Yu no ken hatim mi long belhat tru bilong Yu. Na tu Yu no ken stikim mi taim kros bilong Yu i hatpela tru.

Psalms 38

Wanpela Sam bilong Devit, bilong bringim tingting i kam bek gen.

1 ¶ O BIKPELA, Yu no ken hatim mi long belhat tru bilong Yu. Na tu Yu no ken stikim mi taim kros bilong Yu i hatpela tru. 2 Long wanem ol spia bilong Yu i pas strong long mi. Na han bilong Yu i daunim mi strong. 3 Skin bilong mi i no stap strong, long wanem Yu belhat long mi. Na tu ol bun bilong mi i no gat malolo liklik, long wanem mi bin mekim sin. 4 Long wanem ol sin bilong mi i bin go antap na winim het bilong mi. Olsem bikpela hevi ol i hevi tumas long mi. 5 Ol sua bilong mi i sting na i bagarap, long wanem mi bin mekim kranki pasin. 6 Mi karim hevi. Mi lindaun tru. Mi save krai sori long olgeta hap bilong de. 7 Long wanem, bel bilong mi i pulap long sik i sting. Na bodi bilong mi i no stap strong. 8 Mi no gat strong na mi bagarap nogut tru. Mi bin krai olsem laion, long wanem bel bilong mi i no stap isi. 9 Bikpela, olgeta laik bilong mi i stap long ai bilong Yu. Na krai bilong mi olsem man i gat pen em i no stap hait long ai bilong Yu. 10 Klok bilong mi i pairap. Strong bilong mi i laik i dai. Na lait bilong ai bilong mi, em tu i bin lusim mi na i go. 11 Ol lain mi laikim tru na ol pren bilong mi ol i sanap longwe long sua bilong mi. Na ol wanblut bilong mi i sanap longwe. 12 ¶ Na tu ol man i laik painim rot bilong pinisim laip bilong mi ol i putim ol samting hait bilong pasim mi. Na ol man i laik bagarapim mi ol i tok long ol raskol pasin, na long olgeta hap bilong de ol i tingting long ol pasin giaman. 13 Tasol mi stap olsem iapas man na mi no bin harim. Na mi stap olsem mauspas man i no save opim maus bilong em. 14 Olsem na mi bin stap olsem man i no save harim, na man i no gat ol tok bilong stretim man long maus bilong em. 15 Long wanem O BIKPELA, mi bilip na wet long Yu. O God Bikpela bilong mi, bai Yu harim. 16 Long wanem mi bin tok, Yu mas harim mi. Nogut ol i amamas tru antap long mi. Taim lek bilong mi i wel na i laik pundaun, ol i litimapim ol yet na birua long mi. 17 Long wanem mi redi long pundaun, na bel sori bilong mi i stap olgeta taim long ai bilong mi. 18 Long wanem bai mi tokaut long sin nogut bilong mi. Bai mi sori long tingim sin bilong mi. 19 Tasol ol birua bilong mi i gat laip, na ol i stap strong. Na ol man i no laikim tru mi na i no gat as long mekim olsem, ol i kamap planti. 20 Na tu ol man i mekim pasin nogut bilong bekim gutpela pasin ol i stap birua bilong mi. Long wanem mi bihainim dispela samting i gutpela. 21 O BIKPELA, Yu no ken givim baksait long mi. O God bilong mi, Yu no ken stap longwe long mi. 22 O Bikpela, Man bilong kisim bek mi, Yu mas hariap long helpim mi.