Psa 66 | TpiKJPB | STEP | I go long namba wan man bilong wokim Musik, Wanpela Sam o Song. ¶ Yupela olgeta hap graun, yupela i mas mekim nois i pulap long amamas tru i go long God.

Psalms 66

I go long namba wan man bilong wokim Musik, Wanpela Sam o Song.

1 ¶ Yupela olgeta hap graun, yupela i mas mekim nois i pulap long amamas tru i go long God. 2 Yupela i mas singim song bilong onaim nem bilong Em. Yupela i mas mekim pasin bilong givim biknem long Em i kamap naispela tru. 3 Yupela i mas tok long God olsem, Long ol wok bilong Yu, Yu save pretim man! Long bikpela pawa bilong Yu, ol birua bilong Yu bai i putim ol yet aninit long Yu. 4 Olgeta manmeri bilong dispela graun bai lotuim Yu na singim song long Yu. Bai ol i singim song long nem bilong Yu. Sela. 5 Yupela kam na lukim ol wok bilong God. Em i pretim ol long wanem samting Em i mekim i go long ol pikinini bilong ol man. 6 Em i bin mekim solwara i kamap graun i drai. Ol i bin wokabaut long lek i go namel long wara tait. Mipela i bin amamas tru long Em long dispela hap. 7 Long pawa bilong En, Em i stap bosman oltaim oltaim. Ol ai bilong Em i lukim ol kantri. Ol man bilong sakim tok i no ken litimapim ol yet. Sela. 8 ¶ O yupela manmeri, yupela i mas blesim God bilong yumi. Na yupela i mas mekim ol manmeri i harim nek bilong yupela i litimapim nem bilong Em. 9 Em i holim tewel bilong yumi, taim yumi stap laip. Na Em i no larim ol lek bilong yumi i surik. 10 Long wanem, O God, Yu bin traim mipela. Yu bin traim mipela, olsem man i traim silva. 11 Yu bin bringim mipela i kam insait long umben. Yu bin putim hevi long ol bel bilong mipela. 12 Yu bin mekim ol man i ran i go antap long ol het bilong mipela. Mipela i bin go namel long paia na long wara. Tasol Yu bin bringim mipela i go insait long ples i pulap long ol gutpela samting. 13 ¶ Bai mi go insait long haus bilong Yu wantaim ol ofa bilong kukim. Bai mi bekim long Yu ol strongpela promis bilong mi. 14 Maus bilong mi i bin autim dispela, na maus bilong mi i bin tok long dispela, taim mi gat hevi. 15 Bai mi ofaim long Yu ol sakrifais bilong kukim ol patpela animal, wantaim ol switpela smel bilong ol sipsip man. Bai mi ofaim ol yangpela bulmakau wantaim ol meme. Sela. 16 Yupela olgeta man i pret long God, yupela kam na harim. Na bai mi tokaut long ol samting Em i bin mekim bilong helpim tewel bilong mi. 17 Long maus bilong mi, mi bin singaut long Em. Na long tang bilong mi, mi bin litimapim Em. 18 Sapos mi bihainim sin nogut long bel bilong mi, Bikpela bai i no harim mi. 19 Tasol tru God i bin harim mi. Em i bin putim ia long nek bilong prea bilong mi. 20 Blesing i stap long God, husat i no bin tanim prea bilong mi i go, o sori bilong Em i lusim mi.