Psalms 76
I go long namba wan man bilong wokim Musik antap long Nekinot, Wanpela Sam o Song bilong Esap.
1¶ Long Juda ol i save long God. Nem bilong Em i stap bikpela long Israel. 2Na tu haus sel bilong Em i stap long Salem. Na ples Em i save stap long en em i stap long Saion. 3Long dispela hap, Em i bin brukim ol spia bilong banara, na hap plang, na bainat, na pait. Sela. 4Glori na namba bilong Yu i winim ol maunten bilong ol prais ol i kisim long pait. 5Ol i bin kisim ol samting bilong ol man i gat strongpela bel, ol dispela man i bin slip bilong slip bilong ol. Na i no gat wanpela namel long ol strongpela man i bin painim pinis ol han bilong ol. 6O God bilong Jekop, taim Yu hatim ol, Yu mekim karis bilong pait wantaim hos i slip i dai tru. 7¶ Ol man i mas pret long Yu, yes Yu. Na husat inap sanap long ai bilong Yu taim Yu belhat? 8Yu bin mekim ol i harim stretpela kot i kam long heven. Dispela graun i bin pret na stap isi, 9Taim God i bin kirap bilong wokim kot, na bilong kisim bek olgeta manmeri bilong dispela graun i bihainim pasin isi. Sela. 10Tru tumas belhat tru bilong man bai litimapim nem bilong Yu. Na bai Yu pasim belhat tru i stap yet. 11Mekim strongpela promis long God BIKPELA bilong yupela, na baim dispela. Larim olgeta man i stap nabaut long Em ol i mas bringim ol presen i kam long Man ol man i mas pret long Em. 12Bai Em i rausim spirit bilong ol hetman. Em i stap Man ol king bilong dispela graun i mas pret long Em.
Copyright information for
TpiKJPB