Psa 86 | TpiKJPB | STEP | Wanpela Beten bilong Devit. ¶ O BIKPELA, Yu mas putim ia bilong Yu i go daun. Yu mas harim mi. Long wanem mi stap rabisman na man i sot long ol samting.

Psalms 86

Wanpela Beten bilong Devit.

1 ¶ O BIKPELA, Yu mas putim ia bilong Yu i go daun. Yu mas harim mi. Long wanem mi stap rabisman na man i sot long ol samting. 2 Yu mas lukautim i stap tewel bilong mi. Long wanem mi stap holi. O Yu God bilong mi, Yu mas kisim bek wokboi bilong Yu i bilip bilong em long Yu. 3 O Bikpela, Yu mas marimari long mi. Long wanem olgeta wan wan de mi save singaut long Yu. 4 Yu mas amamasim tewel bilong wokboi bilong Yu. Long wanem mi litimapim tewel bilong mi i go long Yu, O Bikpela. 5 Long wanem, Bikpela, Yu stap gutpela na Yu redi long lusim sin. Na Yu pulap long marimari i go long olgeta man i singaut long Yu. 6 O BIKPELA, Yu mas harim prea bilong mi. Na Yu mas harim gut nek bilong ol askim bilong mi. 7 Long de bilong hevi bilong mi, bai mi singaut long Yu. Long wanem Yu bai bekim tok long mi. 8 ¶ Namel long ol god i no gat wanpela i olsem Yu, O Bikpela. Na tu i no gat wanpela wok i olsem ol wok bilong Yu. 9 O Bikpela, olgeta kantri Yu bin wokim bai ol i kam na lotu long pes bilong Yu. Na bai ol i givim glori long nem bilong Yu. 10 Long wanem Yu stap bikpela, na Yu save mekim ol samting i winim tingting. Yu tasol i God. 11 O BIKPELA, Yu mas skulim mi long pasin bilong Yu. Bai mi wokabaut long tok tru bilong Yu. Yu mas mekim mi i kamap wanbel bai mi ken pret long nem bilong Yu. 12 O God Bikpela bilong mi, bai mi litimapim nem bilong Yu long olgeta hap bilong bel bilong mi. Na bai mi givim glori long nem bilong Yu oltaim oltaim. 13 Long wanem, marimari bilong Yu long mi em i bikpela. Na Yu bin tekewe tewel bilong mi long hel i daunbilo tru. 14 O God, ol hambak man i kirap na birua long mi. Na ol bung bilong ol man i save bagarapim man ol i bin wok long kisim tewel bilong mi. Na ol i no bin putim Yu long pes bilong ol. 15 Tasol, O Bikpela, Yu God i pulap long sori tru, na Yu God bilong soim marimari, na God bilong wet longpela taim na i no les kwik, na Yu pulap long marimari na tok tru. 16 O, Yu mas tanim na kam long mi, na Yu mas marimari long mi. Yu mas givim strong bilong Yu long wokboi bilong Yu, na Yu mas kisim bek pikinini man bilong wokmeri bilong Yu. 17 Yu mas soim mak bilong gutpela pasin long mi, bai ol man i no laikim tru mi i ken lukim dispela na ol i ken sem. Long wanem, BIKPELA, Yu bin helpim mi na givim bel isi long mi.