1Ch 18 | TukCyr16 | STEP | Бирнәче вагтдан соң Давут пилиштлилере зарба уруп, олары өзүне табын этди. Ол Гат галасыны хем-де онуң обаларыны пилиштлилериң элинден алды.

‏ 1 Chronicles 18

Давут душманларыны еңйәр

(2 Шамувел 8:1-18)

1 Бирнәче вагтдан соң Давут пилиштлилере зарба уруп, олары өзүне табын этди. Ол Гат галасыны хем-де онуң обаларыны пилиштлилериң элинден алды. 2 Ол моваплылары еңди. Моваплылар Давуда табын болуп, оңа салгыт төледилер. 3 Соңра Давут Евфрат дерясының төверегиндәки агалыгыны тәзеден дикелтмек үчин гиден Соба патышасы Хададгезери Хаматың якынында боюн эгдирди. 4 Давут онуң мүң саны сөвеш арабасыны, арабалы гошунының еди мүң эсгерини хем-де йигрими мүң эсгерли пыяда гошуныны есир алды. Ол атларың йүз араба етер ялысыны гоюп, галанларыны майып этди. 5 Дамаскда яшаян сириялылар Соба патышасы Хададгезере көмеге геленде, Давут сириялыларың йигрими ики мүңүсини өлдүрди. 6 Давут Дамаскда яшаян сириялыларың арасында гошун бөлүмлерини ерлешдирди. Сириялылар Давуда табын болуп, оңа салгыт төледилер. Давудың баран еринде Реб оңа еңиш берйәрди. 7 Давут Хададгезериң гулларының гөтерйән алтын галканларыны алып, Иерусалиме гетирди. 8 Хададгезериң галалары Тибхатдан хем-де Кундан Давут җуда көп бүрүнҗи эле салды. Соң Сүлейман шол бүрүнчлерден бүрүнч ховуз, сүтүнлери хем энҗамлары ясады.

9 Хамат шасы Тогу Давудың Соба шасы Хададгезериң әхли гошуныны дерби-дагын эдендигини эшитди. 10 Хададгезер билен уршуп, ондан үстүн чыкмагы мынасыбетли Давут патышаны гутламак хем-де хал-ахвал сорашмак үчин, Тогу өз оглы Хадорамы ^{▼▼Хадорам – бу ат 2Шам 8:10-да Ёрам дийип душ гелйәр.} Давудың янына иберди. Себәби Хададгезер Тогу билен йыгы-йыгыдан урушярды. Хадорам өзи билен күмүш, алтын хем бүрүнч совгатлар әкитди. 11 Давут бу совгатлары-да әхли миллетлерден: эдомлылардан, моваплылардан, аммонлылардан, пилиштлилерден хем амалеклерден эле салан алтын-күмүшлери билен биле Реббе багыш этди.

12 Серуяның оглы Абышай Дуз җүлгесинде он секиз мүң эдомлыны өлдүрди. 13 Ол Эдомда гошун бөлүмлерини ерлешдирди; әхли эдомлылар Давуда табын болдулар. Давудың гиден еринде Реб оңа еңиш берйәрди.

14 Шейдип, Давут тутуш Ысрайыла патышалык эдйәрди. Ол тутуш халкыны адыллык хем хакыкат билен доландырярды. 15 Серуяның оглы Ёвап онуң гошунбашысыды; Ахылудың оглы Ехошапат – баш эмелдарыды, 16 Ахытубың оглы Садок билен Абятарың оглы Абымелек руханыдылар, Шавша – кәтипди, 17 Ехояданың оглы Беная керетлер билен пелетлериң баштутаныды, Давудың огуллары болса ша хызматының баштутанларыды.