1Ch 29 | TukCyr16 | STEP | Давут халка шейле дийди: «Худайың сайланы, оглум Сүлейман хениз яш хем теҗрибесиз, эдилмели иш болса улы. Чүнки ыбадатхана ынсан үчин дәл-де, Хөкмүрован Реб үчиндир.

‏ 1 Chronicles 29

Ыбадатхананың гурлушыгы үчин садакалар

1 Давут халка шейле дийди: «Худайың сайланы, оглум Сүлейман хениз яш хем теҗрибесиз, эдилмели иш болса улы. Чүнки ыбадатхана ынсан үчин дәл-де, Хөкмүрован Реб үчиндир. 2 Мен гүйҗүмиң етдигинден Худайымың өйи үчин алтындан ясалмалы затлар үчин – алтын, күмүшден ясалмалы затлар үчин – күмүш, бүрүнчден ясалмалы затлар үчин – бүрүнч, демирден ясалмалы затлар үчин – демир, агачдан ясалмалы затлар үчин – агач, көп мөчберде хакык хем-де отуртма дашлар, безег дашлары, дүрли реңкли дашлар, гымматбаха дашларың әхли гөрнүшини ве көп мөчберде мермер тайярладым. 3 Үстесине-де, Худайымың өйүне болан сөйгим себәпли, мукаддес ыбадатхана үчин шу тайярлан затларымдан дашары мениң өз хусусы алтын хем күмүш хазынам бар. Мен шоны-да Худайымың өйүне бердим. 4 Ол бәш мүң батман ^{▼▼Бәш мүң батман – еврейче үч мүң киккар. Бу такм. 100 тонна деңдир.} Опыр алтынындан, ыбадатхананың диварларының йүзүне чаяр ялы он ики мүң батман ^{▼▼Он ики мүң батман – еврейче еди мүң киккар. Бу такм. 240 тонна деңдир.} ёкары хилли күмүшден ыбаратдыр. 5 Хүнәрментлериң этҗек хер иши үчин, алтын затлар үчин алтын, күмүш затлар үчин күмүш берйәрин. Ким бу гүн мейлетинлик билен зат хөдүр эдип, өзүни Реббе багыш этҗек?»

6 Соңра уругбашылардыр тире баштутанлары, мүңбашылардыр йүзбашылар, ша гуллугындакы баштутанлар мейлетин гурбанлыклар бердилер. 7 Олар Худайың ыбадатханасының хызматы үчин секиз мүң бәш йүз дөрт батман ^{▼▼Секиз мүң бәш йүз дөрт батман – еврейче бәш мүң киккар он мүң дарик. Бу 170 тоннадан говракдыр.} алтын, он еди мүң батман ^{▼▼Он еди мүң батман – еврейче он мүң киккар. Бу такм. 340 тонна деңдир.} күмүш, отуз мүң батман ^{▼▼Отуз мүң батман – еврейче он секиз мүң киккар. Бу такм. 610 тонна деңдир.} бүрүнч хем-де бир йүз етмиш мүң батман ^{▼▼Бир йүз етмиш мүң батман – еврейче йүз мүң киккар. Бу такм. 3400 тонна деңдир.} демир бердилер. 8 Кимде гымматбаха дашлар бар болса, олары Реббиң ыбадатханасының хазынасы үчин гершон уругындан Ехиеле табшырдылар. 9 Адамлар гаты шатландылар, чүнки олар Реббе берен затларыны мейлетинлик билен, чын йүрекден берипдилер. Давут патыша хем гаты шатланды.

Давудың дилеги

10 Соң Давут тутуш халкың өңүнде Ребби алкышлап, шейле дийди: «Эй, Атамыз Ысрайыл Худайы Реб, Саңа эзелден эбедә ченли алкыш болсун! 11 Бейиклик, гүйч-гудрат, шөхрат, еңиш хем белентлик Сениңкидир, гөкдәки хем ердәки затларың хеммеси Сениңкидир; патышалык хем Сениңкидир, я Реб! Сен әхлисинден белентсиң. 12 Байлыклардыр сылаг-хормат Сенден гелйәр, Сен әхлисиниң үстүнден хөкүм сүрйәрсиң. Гүйч хем кувват Сениң элиңдедир. Әхли зады белент я-да кувватлы этмек Сениң элиңдедир. 13 Инди, эй, Худайымыз биз Саңа миннетдарлык билдирйәрис, Сениң шөхратлы адыңа алкыш окаярыс.

14 Йөне шунуң ялы мейлетин зат хөдүрләр ялы мен ким, мениң халкым ким? Бизе әхли зат Сенден гелйәр; Саңа Өз берен задыңдан ызына берйәрис. 15 Биз Сениң өңүңде ата-бабаларымыз ялы гелмишек хем-де мысапырдырыс. Бизиң ердәки дурмушымыз эдил көлеге ялыдыр, умытсыздыр. 16 Эй, Худайымыз Реб, Сениң мукаддес адыңа өй гурмак үчин тайярлан шу болчулыкларымызың хеммесини Сен бердиң; оларың бары Сениң Өзүңкидир. 17 Сениң калбы сынаяндыгыңы ве калбы пәклиги халаяндыгыңы мен билйәрин, эй, Худайым! Шу затларың хеммесини мен өз пәк калбым билен мейлетин бердим. Хәзир мен Сениң шу ере йыгнанан халкыңың мейлетинлик хем шатлык билен садака берйәндигини гөрйәрин. 18 Эй, Ыбрайымың, Ысхагың, Ысрайылың, бизиң ата-бабаларымызың Худайы, Өз халкыңың калбында шейле ниетлери бакы сакла, оларың калбыны Өзүңе тарап өвүр. 19 Сениң табшырыкларыңы, дүзгүнлериңи, парзларыңы – шуларың хеммесини берҗай эдер ялы, мениң тайярлык гөрен ыбадатханамы гурары ялы, оглум Сүлеймана садык йүрек бер». 20 Соң Давут тутуш халка: «Худайыңыз Реббе алкыш окаң» дийип йүзленди. Тутуш халк өз ата-бабаларының Худайы Реббе алкыш окадылар. Олар баш эгип, Реббе сежде, патыша-да тагзым этдилер.

21 Эртеси гүн олар Реббе мүң өкүз, мүң гоч, мүң гузы, ичги садакаларыны хем-де тутуш Ысрайыл үчин энчеме садакалар бердилер. 22 Олар шол гүн Реббиң өңүнде улы шатлык-шагалаң билен ийип-ичдилер.

Сүлейман патышалыга белленилйәр

Давудың оглы Сүлейманы икиленч патыша этдилер. Оны Реббе хөкүмдарлыга, Садогы хем руханылыга белледи. 23 Какасы Давудың патышалыгыны мирас алып, Сүлейман Реббиң берен тагтында отурды. Онуң иши ровач алды, тутуш Ысрайыл оңа эерди. 24 Әхли нөкерлер, батыр йигитлер, Давудың әхли огуллары Сүлеймана вепалы болмага вада бердилер. 25 Реб тутуш Ысрайылың гөзүниң алнында Сүлейманы беленде гөтерди ве хениз Ысрайылда хич бир патышаның эе болмадык шалык белентлигини оңа берди.

Давудың өлүми

26 Шейдип, Йышайың оглы Давут тутуш Ысрайыла шалык этди. 27 Ол Ысрайылда җеми кырк йыл шалык сүрди. Ол шонуң еди йылыны Хебронда, отуз үч йылыны болса Иерусалимде гечирди. 28 Давут яшы бирчене барып, гаррап, мал-дөвлетдир шөхратдан доюп дүнйәден өтди. Онуң ерине оглы Сүлейман патыша болды. 29 Давут патышаның эден ишлери башдан-аяк Шамувел гөргүриң, Натан пыгамбериң ве Гат гөргүриң китабында языландыр. 30 Бу китапларда онуң нәхили шалык сүрендиги, гүйч-кувватының ненеңси боландыгы, онуң хем-де Ысрайылың башдан гечирен вакалары ве дүнйәниң әхли патышалары хакында языландыр.