1Jo 3 | TukCyr16 | STEP | Атамыз Худайың бизи нәхили гүйчли сөййәндигини бир гөрсеңизләң! Ол бизи Өз перзентлери дийип атландыряр. Догрудан-да, биз Онуң перзентлеридирис! Дүнйә Худайы танамансоң, бизи-де танамаяр.

‏ 1 John 3

Худайың перзентлери

1 Атамыз Худайың бизи нәхили гүйчли сөййәндигини бир гөрсеңизләң! Ол бизи Өз перзентлери дийип атландыряр. Догрудан-да, биз Онуң перзентлеридирис! Дүнйә Худайы танамансоң, бизи-де танамаяр. 2 Мәхрибанларым, биз инди Худайың перзентлеридирис. Бизиң нәхили өзгерҗекдигимиз энтек белли дәл, эмма Месихиң гелҗек пурсадында Оңа меңзеҗекдигимизи билйәрис, себәби Оны болшы ялы гөрерис. 3 Оңа умыт баглаян хер бир адам Месихиң пәк болшы ялы, өзүни пәк саклар. 4 Гүнә эдйән адам Худайың кануныны бозяндыр. Себәби гүнә этмек Худая баш галдырмак ахыры. 5 Месихиң болса бизи гүнәлеримизден сапламак үчин гелендигини билйәнсиңиз. Онда асла гүнә ёкдур. 6 Месих билен яшаян адам гүнәден йүз өврер. Эмма хенизем гүнә эдйән адам Оны не гөрйәндир, не-де танаяндыр. 7 Эзиз балаларым! Хич киме өзүңизи алдатмаң! Месихиң догручыл болшы ялы, догры иш эдйән адам хем догручылдыр. 8 Гүнә эдйән адам иблисе дегишлидир, себәби иблис башлангычдан бәри гүнә эдип гелйәндир. Эмма Худайың Оглы ^{▼▼Худайың Оглы – Көне Әхтде бу ат патышалар үчин уланылярды. Тәзе Әхтде болса бу ат Худай тарапындан сайланып-сечилен диймеги аңладяр. Сөзлүге серет.} иблисиң ишлерини ёк этмек үчин гелди. 9 Худайың перзенди гүнә этмегини довам этмез, себәби оңа Худайың яшайыш берйән гүйҗи орнандыр. Инди гүнә этмез, себәби ол Худайың перзендидир. 10 Кимиң Худайың перзендидиги, кимиң болса иблисиңкидиги шундан белли: догры иш этмейән ве доганыны сөймейән адам Худайдан дәлдир.

Бири-биримизи сөелиң

11 Сиз бири-биримизи сөймелидигимиз барада овал-башдан эшиденсиңиз. 12 Шейтана дегишли болуп, өз доганыны өлдүрен Кабыл ялы болмалың. Кабыл оны нәме үчин өлдүрди? Себәби өз эден ишлери писликди, доганыныңкы болса догруды. 13 Эй, доганларым, эгер дүнйә сизи йигренйән болса, гең галмаң. 14 Биз өзүмизиң өлүмден яшайша говшандыгымызы билйәрис, себәби доганларымызы сөййәрис. Доганыны сөймейән адам өлүмиң пенҗесинде галяндыр. 15 Доганыны йигренйән адам ганхордыр. Хич бир ганхорың болса бакы яшайша говушмаяндыгыны билйәнсиңиз.

16 Иса Месих бизиң үчин Өз җаныны пида эденде, биз хакыкы сөйгиниң нәмедигини билдик. Диймек, биз хем доганымыз үчин җанымызы пида этмәге тайяр болмалыдырыс. 17 Дүнйә малына бай болуп, доганыны мәтәчликде гөренде, оңа йүреги авамаян адамда, хей-де, Худайың сөйгүси болуп билерми? 18 Эзиз балалар, хакыкы сөйгимизи йөне бир гуры геп билен дәл-де, иш йүзүнде амал билен гөркезелиң. 19 – 20 Шонда биз өзүмизиң хакыката дегишлидигимизи билерис ве Худайың хузурында бизиң выжданымыз пәк болар. Эгер выжданымыз бизи язгарайса-да, Худай ондан бейикдир, Ол хемме зады билйәндир. 21 Мәхрибанларым, эгер выжданымыз бизи язгармаса, онда Худайың хузурында ынамлы боларыс. 22 Ондан нәме дилесек аларыс, себәби биз Онуң буйрукларыны берҗай эдип, Оны хошнут эдйән ишлери эдйәндирис. 23 Биз Онуң Оглы Иса Месихе иман этмелидирис ве Исаның буйрушы ялы бири-биримизи сөймелидирис. Бу Худайың буйругыдыр. 24 Худайың буйрукларыны берҗай эдйән адам Худай билен, Худай хем онуң билен яшаяндыр. Худайың бизиң билен яшаяндыгыны Онуң хер биримизе берен Рухундан билйәрис.