1Ki 9 | TukCyr16 | STEP

‏ 1 Kings 9

Реб ене Сүлеймана гөрүнйәр

(2 Йыл язгылары 7:12-22)

1 – 2 Сүлейман Реббиң өйүни, өз көшгүни хем-де гурмага мейил эден затларының барыны гуруп гутаранда, Реб Гибгонда гөрнүши ялы, Сүлеймана икиленч гөрүнди. 3 Реб Сүлеймана шейле дийди: «Мен сениң эден дилегиңи, ялбарышыңы эшитдим. Сениң гуран бу өйүңи мукаддес этдим. Маңа ол ерде эбедилик ыбадат эдилер. Мениң назарым ве йүрегим хемише шол ерде болар. 4 – 5 Эгер-де сен какаңың йөрейши ялы сап йүреклилик, догрулык билен Мениң ёлумдан йөрәп, табшыран әхли затларымы эдип, Мениң хөкүмлеримдир дүзгүнлерими берҗай этсең, „Сениң неслиңден Ысрайыла хөкүм сүрҗек адам кемлик этмез“дийип, какаң Давуда вада бершим ялы, Ысрайылың үстүнден патышалыгыңы беркарар эдерин.

6 – 7 Эмма сиз я-да сизиң огулларыңыз Мениң ызыма эермекден йүз дөндерсеңиз, өңүңизде гоян табшырыкларымы, парзларымы берҗай этмән, гидип башга худайлара хызмат эдип, олара сежде этсеңиз, онда Мен ысрайыл халкыны өзлерине берен еримден махрум эдерин. Өзүме ыбадат эдилмеги үчин мукаддес эден бу өйүми рет эдерин. Ысрайыл халкы бейлеки халклара геп хем гүлки болар. 8 Шу өй харабалыга өврүлер ^{▼▼Харабалыга өврүлер – кәбир голязмаларда бейик болар.}. Онуң янындан гечйән хер бир киши оңа хайранлар галып, пышырдашып: „Реб нәме үчин бу юрды, бу өйи бейле терк этдикә?“диер. 9 Онсоң әхли халклар: „Чүнки ысрайыл халкы ата-бабаларыны Мүсүр юрдундан чыкаран өзлериниң Худайы Ребден йүз дөндерип, башга худайлара тарап өврүлип, олара сежде этдилер, олара хызмат этдилер. Шонуң үчин хем Реб бу бетбагтчылыгы оларың башындан индерди“диерлер».

Сүлейманың бейлеки эден ишлери

(2 Йыл язгылары 8:1-18)

10 Сүлейман ики өйи, ягны Реббиң өйи билен өз көшгүни йигрими йылда гуруп гутарды. 11 Сур патышасы Хирамың кедр хем-де серви агачларындан ве алтындан Сүлейман нәче ислесе берендиги үчин, Сүлейман патыша-да оңа Җелиле велаятындан йигрими галаны берди. 12 Хирам Сурдан Сүлейманың өзүне берен галаларыны гөрмәге гелди, йөне онуң ол галалара гөвни етмеди. 13 Шонуң үчин хем ол: «Эй, доган, маңа берен галаларың дагы нәхили?» дийди. Шейдип, олары Кабул ^{▼▼Еврейче Кабул ве хайырсыз сөзлериниң айдылышы меңзешдир.} дийип атландырдылар. Олар шу гүне ченли хем шейле атландырыляр. 14 Хирам болса Сүлейман патыша ики йүз батман ^{▼▼Ики йүз батман – еврейче йүз йигрими киккар. Бу такм. 4 тонна деңдир.} алтын иберипди.

15 Сүлейман патыша ишчилери топлап, Реббиң өйүни, өз көшгүни, Миллоны ^{▼▼Милло – топрак билен долдурылан җайрык я-да бошлук ер болмагы ахмал. Сөзлүге серет.}, Иерусалимиң диварыны, Хасор, Мегидо, Гезер галаларыны тәзеден дикелтди. 16 Бу гала озал Мүсүр патышасы фараон тарапындан басылып алнып, ода берлипди. Фараон галада яшаян кенганлары гырып, оны инҗи хөкмүнде өз гызына – Сүлейманың аялына берипди. 17 – 18 – 19 Шундан соң Сүлейман Гезери, ашакы Бейтхороны, Багалаты, Яхуда чөллүгинде болан Тадморы, өзүниң әхли аммар галаларыны, сөвеш арабаларының сакланян галаларыны, сөвеш арабалы гошуның сакланян галаларыны тәзеден гурды. Мундан башга-да, Иерусалимде, Ливанда хем-де өз голастындакы ерлериң әхлисинде гурмага мейил эден затларының барыны гурдурды. 20 Ысрайыл халкындан болмадык аморлар, хетлер, перизлер, хивилер хем-де ябуслар энтек хем шол юртда яшаярдылар. 21 Олар ысрайылларың бүтинлей ёк этмедик халкларының несиллеридир. Сүлейман олары гула өвүрди. Бу шу гүне ченли хем шейледир. 22 Эмма Сүлейман ысрайыл халкыны гул этмеди. Олар Сүлейманың эсгерлери, көшк эмелдарлары, харбы серкерделери, яраг гөтериҗилери, сөвеш арабалы гошунының серкерделеридилер.

23 Сүлейманың ишине баштутанлык эдйән ёлбашчылар-да ысрайыл огулларынданды. Олар бәш йүз элли адам болуп, агыр ишде ишлейән адамлара баштутанлык этдилер.

24 Фараоның гызы Давут галасындан чыкып, Сүлейманың өзи үчин гуран өйүне гелди. Соңра Сүлейман галаның гүндогар тарапыны тәзеден дикелтди.

25 Сүлейман Реббе гуран гурбанлык сыпасында йылда үч гезек якма гурбанлыкларыны, саламатлык гурбанлыкларыны хөдүрләрди, Реббиң хузурында якымлы ыслы түтетги якарды. Шейдип, ол Реббиң өйүни долы гуруп тамамлады.

26 Сүлейман патыша Эдом юрдунда, Гызыл деңзиң ^{▼▼Гызыл деңиз – еврейче Гамыш деңзи.} кенарында, Эйлатың голайында болан Эсёнгеберде гәмилер ясады. 27 Хирам өз эмелдарларыны Сүлейманың эмелдарлары билен биле деңзе белет болан гәмичилер билен иберди. 28 Олар Опыра гидип, ол ерден еди йүз он батман төвереги алтын алып, оны Сүлейман патыша гетирип бердилер.