1Sa 13 | TukCyr16 | STEP | Шавул патыша боланда отуз яшларындады. Ол Ысрайыла кырк ики йыл патышалык этди.

‏ 1 Samuel 13

Шавул Реббиң сөзүне гулак асмаяр

1 Шавул патыша боланда отуз яшларындады. Ол Ысрайыла кырк ики йыл патышалык этди. 2 Шавул ысрайыллардан үч мүң адамы сайлап алды. Оларың ики мүңүсини ол Микмашда ве Бейтел даглыгында өз янында саклады; мүңүсини болса оглы Ёнатан билен бенямин топрагындакы Гибга галасында ерлешдирди. Галанларыны болса ызларына, өйли-өйүне угратды.

3 Ёнатан пилиштлилериң Гебадакы гошуныны дерби-дагын этди. Бу хабар пилиштлилере барып етди. Шавул: «Гой, еврейлер эшитсинлер!» дийип, мундан хабардар этмек үчин, юрдуң әхли еринде шахдан эдилен сурнай чалдырды. 4 Шавулың пилиштли гошуны дерби-дагын эдендигини ысрайыллар эшиденлеринде, пилиштлилериң өзлери билен өҗүгендиклерини дуюп, олар Гилгала Шавулың янына йыгнандылар.

5 Үч мүң сөвеш арабалы, алты мүң сөвеш арабалы эсгерлери ве сансыз-саҗаксыз гошун болуп, Ысрайыл билен урушмак үчин, пилиштлилер башларыны җемледилер. Бейтавениң гүндогарындакы Микмаша барып, олар ол ерде өзлерине харбы дүшелге гурдулар. 6 Ысрайыллар чыкгынсыз ягдая дүшендиклерини гөренлеринде (чүнки оларың гошунлары говы гысаҗа салныпды), оларың кәси говакларда, чукурларда, гаяларда, мазарларда ве гуррук гуюларда гизлендилер. 7 Бирнәче еврей болса Иордан дерясындан гечип, Гат хем-де Гилгат топрагына аралашды.

Шавул хениз Гилгалдады ве онуң янындакы гошун горкудан яңа сандырашярды. 8 Шамувелиң беллән мөхлетине гөрә, Шавул еди гүн гарашды, эмма Шамувел Гилгала гелмеди. Шавулың янындакы халк ондан четлешип башлады. 9 Шонда Шавул халка: «Якма ве саламатлык гурбанлыгы үчин мал гетириң» дийди. Шейдип, ол якма гурбанлыгыны берди. 10 Шавул якма гурбанлык бермеклиги яңы гутардым эденде, Шамувел гелди. Гаршыламак хем саламлашмак үчин, Шавул онуң өңүнден чыкды. 11 Шамувел оңа: «Нәме иш битирдиң?» дийди. Шавул оңа шейле җогап берди: «Төверегимдәки халк менден четлешип башлады, сен хем айдан мөхлетиңде гелмедиң, пилиштлилер болса Микмаша йыгнандылар. 12 Онсоң мен: „Инди пилиштлилер Гилгала, мениң үстүме дөкүлерлер. Мен болса Ребден медет хем дилемедим“дийип ойландым ве якма гурбанлык бермәге меҗбур болдум». 13 Шамувел Шавула шейле дийди: «Акмаклык этдиң, өз Худайың Реббиң эмрини тутмадың. Реб сениң Ысрайылың үстүнден эдйән шалыгыңы өмүрлик эбедилешдирҗекди. 14 Йөне, ине, инди сениң шалыгың довам этмез. Реб Өз гөвнүнден турян бирини тапып, оны Өз халкына хөкүмдар белләр. Чүнки сен Реббиң эмрини тутмадың». 15 Соңра Шамувел Гилгалдан бенямин топрагындакы Гибга галасына гитди.

Шавул өз янындакы адамлары санады; җеми алты йүз төвереги адам чыкды. 16 Шавул, онуң оглы Ёнатан ве оларың янындакыларың әхлиси бенямин топрагындакы Гебада галды. Пилиштлилер болса Микмашда дүшелге гурупдылар. 17 – 18 Пилиштли хүҗүмчилер үч топара бөлүнип, өз дүшелгелеринден чыкдылар. Оларың биринҗи топары Шугалың Опра ёлуна тарап, бейлекиси Бейтхорона, үчүнҗи топар болса чөлүң үсти билен Себогым җүлгесинден серхеде тарап өврүлди.

19 Ысрайыл юрдуның хич бир еринде екеҗе-де демирчи усса ёкды. Себәби пилиштлилер гылычдыр найза ясамага еврейлере ёл бермейәрдилер. 20 Шоңа гөрә, әхли ысрайыллар азалдыр кәтменлерини, палтадыр оракларыны элтип, пилиштлилере чархладардылар. 21 Азал ве кәтмен чархлатмагың нырхы бир ярым мысгал күмше, палтадыр орак чархлатмагың нырхы болса бир мысгал ^{▼▼Бир ярым мысгал… бир мысгал – еврейче бир пим… үчден бир шекел. Бир пим 8 гр, үчден бир шекел 4 гр деңдир.} күмше барабарды. 22 Шол себәпли уруш вагтында Шавул билен Ёнатаның адамларының элинде не гылыч, не-де найза барды. Бу яраглар диңе Шавул билен онуң оглы Ёнатанда барды.

23 Шол арада пилиштли гошуның өңдәки бөлүми Микмаш гечелгесине гитди.