2Ch 1 | TukCyr16 | STEP | Давудың оглы Сүлейман өз патышалыгыны беркитди. Худайы Реб онуң билен болуп, оны җуда бейгелтди.

‏ 2 Chronicles 1

Сүлейман Худайдан пәхим-пайхас дилейәр

(1 Патышалар 3:1-15)

1 Давудың оглы Сүлейман өз патышалыгыны беркитди. Худайы Реб онуң билен болуп, оны җуда бейгелтди. 2 Сүлейман тутуш Ысрайылы: мүңбашылары, йүзбашылары, казылары, Ысрайылың әхли баштутанларыны ве уругбашылары чагырды. 3 Онсоң Сүлейман янындакы бүтин җемагат билен Гибгондакы сеждегәхе гитдилер. Реббиң гулы Мусаның чөлде гуран Худая йүз тутулян чадыры шол ердеди. 4 Давут Худайың сандыгыны Кирятегарымдан Иерусалиме онуң үчин тайярлан чадырына гетирипди. 5 Хуруң агтыгы, Урының оглы Бесалелиң бүрүнчден ясан гурбанлык сыпасы болса Гибгонда Реббиң мукаддес чадырының өңүндеди. Шоңа гөрә Сүлейман билен җемагат ол ере Ребден маслахат сорамага гитдилер. 6 Сүлейман ол ерде Реббиң хузурында мукаддес чадырдакы бүрүнчден болан гурбанлык сыпасына гелип, онда мүң саны якма гурбанлыгыны хөдүрледи.

7 Шол гиҗе Худай Сүлеймана гөрнүп, оңа: «Диле, дилән задыңы берейин» дийди. 8 Сүлейман Худая шейле җогап берди: «Сен мениң какам Давуда бейик, садык сөйгиңи гөркезип, мени онуң ерине патыша этдиң. 9 Я Худайымыз Реб, гой, инди какам Давуда берен вадаң амала ашсын, чүнки Сен мени ериң тозы ялы сан-саҗаксыз болан бир халкың үстүнден патыша этдиң. 10 Инди шу халкы доландырмагым үчин маңа даналык хем билим бер. Ким Сениң бу бейик халкыңы доландырып билер?» 11 – 12 Худай Сүлеймана шейле дийди: «Калбыңда шу ислегиң бардыгы үчин, өзүңе мал-мүлк, байлык, ат-абрай я өз душманларыңың өлүмини я-да өзүң үчин узак өмүр дилемән, эйсем үстүнден патышалыга беллән халкымы доландырмага өзүңе пәхим-пайхас ве дүшүнҗе диләндигиң үчин, Мен саңа пайхас ве дүшүнҗе берйәрин. Шейле хем Мен саңа сенден өң хич кимде болмадык ве сенден соң хем хич кимде болмаҗак байлык, мал-мүлк ве ат-абрай берерин».

Сүлейманың харбы ве тәҗирчилик ишлери

(1 Патышалар 10:26-29)

13 Шейдип, Сүлейман Гибгондакы сеждегәхден, Реббиң мукаддес чадырындан Иерусалиме гелип, Ысрайыла патышалык этди. 14 Сүлейман сөвеш арабалары билен арабалы эсгерлери топлады. Онуң бир мүң дөрт йүз сөвеш арабасы, он ики мүң сөвеш арабалы эсгери барды. Сүлейман оларың бирнәчесини өз янында Иерусалимде, галанларыны болса сөвеш арабаларының сакланян галаларында ерлешдирди. 15 Патыша Иерусалимде күмүш билен алтыны дашлар билен дең этди, кедр агаҗыны болса гүнбатар байырлыкда гөгерйән ябаны инҗир агаҗы кимин көпелтди. 16 Сүлейманың атлары Мүсүрден ве Кеведен гетирилди; патышаның тәҗирлери олары Кеведен белли бир баха сатын алдылар. 17 Мүсүрден гетирилйән сөвеш арабасының хер бири он еди гадак ^{▼▼Он еди гадак – еврейче алты йүз шекел. Бу такм. 7 кг деңдир.} төвереги күмше, хер бир ат болса дөрт гадакдан ^{▼▼Дөрт гадак – еврейче бир йүз элли шекел. Бу такм. 1,7 кг деңдир.} говрак күмше сатын алынды. Шейдип, бу сөвеш арабалары ве атлар Сүлейманың тәҗирлериниң үсти билен бүтин хетлериң ве Сирияның шаларына сатылярды.