2Ch 32 | TukCyr16 | STEP | Хизкияның эден вепалы ишлеринден соң, Ашур патышасы Санхерип гелип, Яхуда чозуш эдип, галаларың гаршысында дүшелге гуруп, олары эле алмагы йүрегине дүвди.

‏ 2 Chronicles 32

Ашур патышасы Санхерип чозуш эдйәр

(2 Патышалар 18:13-37; 19:14-19,35-37; Ишая 36:1-22; 37:8-38)

1 Хизкияның эден вепалы ишлеринден соң, Ашур патышасы Санхерип гелип, Яхуда чозуш эдип, галаларың гаршысында дүшелге гуруп, олары эле алмагы йүрегине дүвди. 2 – 3 Хизкия Санхерибиң гелип, Иерусалиме гаршы уруш этмекчи боляндыгыны гөренде, шәхериң дашындакы чешмелериң сувуны бентлемек барада өз баштутанлары ве батыр йигитлери билен маслахатлашды. Олар Хизкия ярдам этдилер. 4 Көп халк топланып: «Нәме үчин Ашур патышалары гелип, бол сув тапмалымышын?» дийип, юрдуң ичинден акып гечйән әхли чешмедир акарлары бентледилер. 5 Шейдип, Хизкия кувватланып, диварың әхли йыкылан ерлерини беҗерип, онуң үстүнде диңлер галдырды. Дашындан ол ене-де башга бир дивар гурды. Булардан башга-да Хизкия Давут галасындакы Миллоны ^{▼▼Милло – топрак билен долдурылан җайрык я-да бошлук ер болмагы ахмал. Сөзлүге серет.} беркидип, көп мукдарда яраглардыр галканлар ясатды. 6 – 7 Хизкия халкың үстүнден уруш серкерделерини белләп, олары өз янына, шәхер дервезесиниң мейданчасына йыгнап, шейле дийди: «Дөзүмли ве мерт болуң. Ашур патышасындан горкмаң, хедер этмәң, чүнки бизиң билен Болян онуң билен боляндан хас гүйчлүдир. 8 Ашур патышасы ынсан гүйҗи билендир, эмма бизиң билен Худайымыз Ребдир. Ол бизе ярдам эдип, бизиң үчин сөвешер». Яхуда патышасы Хизкияның сөзлери халкы рухландырды.

9 Мундан соң Ашур патышасы Санхерип тутуш гошуны билен Лакышдака, нөкерлерини Иерусалимдәки Яхуда патышасы Хизкияның ве бүтин яхуда халкының янына иберди. 10 Нөкерлер гелип, Ашур патышасы Санхерип шейле диййәр: «Сиз нәме үчин Иерусалимде габав ичинде отырсыңыз? Нәмә бил баглаярсыңыз? 11 Хизкия: „Худайымыз Реб бизи Ашур патышасының элинден халас эдер“дийип, сизи ачлыкдан ве сувсузлыкдан өлдүрҗек болуп алдаяр. 12 Яхуда ве Иерусалиме йүзленип: „Сиз диңе бир гурбанлык сыпаның өңүнде сежде эдип, шонуң үстүнде гурбанлык якың“дийип, Реббе багыш эден сеждегәхлери, гурбанлык сыпаларыны йыкан шу Хизкия дәлми нәме? 13 Әхли юртларың халкларына мениң ве ата-бабаларымың нәме эденини билмейәрсиңизми? Шол юртларың миллетлериниң худайлары өз юртларыны мениң элимден халас эдип билдилерми? 14 Худайыңызың сизи мениң элимден халас эдип билер ялы, ата-бабаларымың бүтинлей ёк эден шол миллетлериниң әхли таңрыларының арасында хайсысы өз халкыны мениң элимден халас эдип билди? 15 Инди сиз өзүңизи Хизкия алдатмаң, оңа өзүңизи шу ёл билен азашдырмага ёл бермәң ве оңа ынанмаң. Чүнки хич бир миллетиң я-да патышалыгың таңрысы өз халкыны мениң ве ата-бабаларымың элинден халас эдип билен дәлдир. Сизиң Худайыңыз-да сизи мениң элимден халас эдип билмез!» дийдилер.

16 Санхерибиң нөкерлери Бейик Худая ве Онуң гулы Хизкия гаршы сөзлерини довам этдирдилер. 17 Санхерип Ысрайыл Худайы Реббе дил етирип язан хатларында Реббе гаршы шейле дийди: «Бейлеки миллетлериң таңрыларының өз халкларыны мениң элимден халас этмейишлери ялы, Хизкияның Худайы хем Өз халкыны мениң элимден халас этмез». 18 Санхерибиң нөкерлери бу сөзлери диварың үстүндәки Иерусалим халкыны горкузып, ховсала дүшүрип, шәхери басып алмак үчин олара яхуда дилинде гаты сес билен гыгырып айтдылар. 19 Олар Иерусалимде месген тутян Худайы хакда-да дүнйә халкларының ынсан эли билен ясалан худайлары хакда сөзлейишлери ялы сөзледилер.

20 Онсоң Хизкия патыша билен Амозың оглы Ишая пыгамбер мунуң үчин дилег эдип, Худая перят этдилер. 21 Реб бир перишде ёллап, Ашур патышасының дүшелгесинде әхли батыр йигитлери, серкерделери ве баштутанлары өлдүрди. Шейдип, Санхерип биабрайлык билен өз юрдуна доланып гелди. Ол өз худайының бутханасына геленде, онуң өзүнден өнен огулларының кәбири Санхериби гылыч билен өлдүрдилер. 22 Шейдип, Реб Хизкияны хем Иерусалим илатыны Ашур патышасы Санхерибиң ве әхли душманларының элинден халас эдип, олары думлы-душдан горады. 23 Иерусалиме көп адамлар гелип, Реббе садакалар, Яхуда патышасы Хизкия гымматбаха совгатлар гетирдилер. Шондан соң, Хизкия әхли миллетлериң назарында бейгелди.

Хизкия сыркавлаяр

24 Шол дөвүрлерде Хизкия сыркавлап, өлүм яссыгында ятырды. Ол Реббе дилег этди. Реб Хизкияның дилегине җогап берип, оңа бир аламат берди. 25 Эмма Хизкия өзүне эдилен ягшылыгы өдемеди, ол гопбамсылык этди. Шонуң үчин хем Хизкияның, Яхуданың ве Иерусалимиң үстүне газап инди. 26 Онсоң Хизкия гопбамсылыгы үчин өзүни кичелтди. Иерусалимиң илаты-да шейле этди. Шейдип, Хизкияның дөврүнде Реббиң газабы оларың үстүне инмеди.

Хизкияның байлыгы

27 Хизкияда уммасыз көп байлык болуп, онуң шан-шөхраты бейгелди. Ол өзүне күмүш, алтын, гымматбаха дашлар, хошбой ыслы затлар, галканлар ве хер хили гымматбаха затлар үчин хазыналар эдинди. 28 Бугдай, шерап ве зейтун ягы үчин аммарлар, маллар үчин ятаклар ве сүрүлер үчин агыллар ясатды. 29 Хизкия өзи үчин шәхерлер гурдурды. Онуң җуда көп овнук ве ири маллары барды, чүнки Худай Хизкия гаты көп мал-мүлк берипди. 30 Гихон сувларының ёкаркы голуны баглап, олары Давут галасының гүнбатар тарапына ашаклыгына сован бу Хизкиядыр. Хизкияның әхли ишлери ровачланды. 31 Ине, Бабыл хөкүмдарларының юртда болан аламат хакында сорамак үчин Хизкияның янына иберен илчилери геленде, Худай Хизкияны сынап, онуң йүрегинде болан бар зады билмек үчин оны еке галдырды. 32 Хизкияның бейлеки ишлери, эден оңат ишлери барада Амозың оглы Ишая пыгамбериң пыгамберликлеринде, Яхуда хем Ысрайыл патышаларының тарых китапларында языландыр. 33 Хизкия ата-бабаларына говушды. Ол Давудың несиллериниң мазарларының ёкарсында җайланды. Хизкия арадан чыканда, бүтин Яхуданың ве Иерусалимиң илаты оңа хормат гойды. Оглы Манаша онуң ерине патыша болды.