2Ch 7 | TukCyr16 | STEP | Сүлейман дилег эдип болан дессине гөкден от инип, якма гурбанлыгы ве бейлеки гурбанлыклары ялмап-ювутды. Өй Реббиң шөхратындан долды.

‏ 2 Chronicles 7

Ыбадатхана Реббе багыш эдилйәр

1 Сүлейман дилег эдип болан дессине гөкден от инип, якма гурбанлыгы ве бейлеки гурбанлыклары ялмап-ювутды. Өй Реббиң шөхратындан долды. 2 Реббиң шөхратының өйи долдурандыгы себәпли руханылар Реббиң өйүне гирип билмедилер. 3 Бүтин ысрайыл халкы гөкден инен оды ве өйдәки Реббиң шөхратыны гөренде, йүзүни ере берип сежде этди. Халк: «Реб ягшыдыр! Онуң сөйгүси бакыдыр!» дийип Реббе шүкүр этди.

4 Онсоң патыша ве онуң янындакы бүтин ысрайыл халкы Реббиң хузурында гурбанлык бердилер. 5 Сүлейман патыша Реббе гурбанлык хөкмүнде йигрими ики мүң өкүз ве бир йүз йигрими мүң гоюн берди. Шейдип, патыша ве бүтин ысрайыл халкы Худайың өйүниң ачылыш дабарасыны этдилер. 6 Руханылар өз везипелеринде дурдулар, левилер-де Давудың табшырышы ялы: «Онуң садык сөйгүси бакыдыр!» дийип, Реббе өвги айтдылар. Олар Давут патышаның ясадан саз гураллары билен саз чалдылар. Левилериң өңүнде руханылар сурнай чалдылар. Бүтин ысрайыл халкы дик дурды. 7 Сүлейман патыша Реббиң өйүниң өңүндәки ховлының ортасыны тәмизләп мукаддес этди. Патыша шол ерде якма гурбанлыкларыны ве саламатлык гурбанлыкларының ягларыны берди, чүнки Сүлейманың ясадан бүрүнч гурбанлык сыпасы якма гурбанлыгыны, галла садакасыны ве саламатлык гурбанлыгының яг бөлеклерини тутардан гаты кичиди. 8 Шейдип, Сүлейман ве бүтин ысрайыл халкы – әгирт улы мәхелле Лебохаматдан Мүсүр серхедине ченли болан аралыкда, еди гүнләп Чатма байрамыны белләп гечдилер. 9 Секизинҗи гүн мукаддес йыгнанышык болды. Гурбанлык сыпасының багыш эдилиш дабарасыны еди гүн, байрамы-да еди гүн тутдулар. 10 Сүлейман единҗи айың йигрими үчүне халкы өйли-өйүне угратды. Олар Реббиң Давуда, Сүлеймана ве халкы Ысрайыла гөркезен әхли ягшылыклары үчин шатланып, гөвнүхошлукда өйли-өйлерине гайтдылар. 11 Шейдип, Сүлейман Реббиң өйүниң, өз көшгүниң гурлушыгыны тамамлап, Реббиң өйүнде ве өз көшгүнде этмеги йүрегине дүвен әхли ишлерини үстүнлик билен амала ашырды.

Реб ене Сүлеймана гөрүнйәр

(1 Патышалар 9:2-9)

12 Реб гиҗе Сүлеймана гөрнүп, оңа шейле дийди: «Мен сениң эден дилегиңи эшитдим. Мен шу ери Өзүм үчин гурбанлык берилйән өй хөкмүнде сайладым. 13 – 14 Ягыш ягмаз ялы гөги багланымда я-да чекиртгелере юрдуң хасылыны ювут дийип буйрук беренимде я-да халкымың арасына гыргын кеселини ёлланымда, Мениң адымы гөтерйән халкым өзүни песелдип, дилег эдип, Мени агтарып, өз пис ёлларындан дөнсе, шонда Мен олары гөкден эшидип, гүнәлерини гечип, юртларыны дикелдерин. 15 Инди шу ерде эдилен дилеглере Мениң гөзлерим гөргүр, гулакларым эшитгир болар. 16 Адым шу өйде эбедилик болар ялы, Мен оны сайладым ве мукаддес этдим, Мениң назарым ве йүрегим хемише шол ерде болар. 17 – 18 Эгер-де сен какаңың йөрейши ялы Мениң ёлумдан йөрәп, табшыран әхли затларымы эдип, хөкүмлеримдир дүзгүнлерими берҗай этсең, „Сениң неслиңден Ысрайыла хөкүм сүрҗек адам кемлик этмез“дийип, какаң Давуда вада бершим ялы, патышалыгыңы беркарар эдерин. 19 – 20 Эмма сиз Мениң ызыма эермекден йүз дөндерсеңиз, өңүңизде гоян табшырыкларымы, парзларымы берҗай этмән, гидип башга худайлара хызмат эдип, олара сежде этсеңиз, онда Мен ысрайыл халкыны өзлерине берен еримден махрум эдерин. Өзүме ыбадат эдилмеги үчин мукаддес эден бу өйүми рет эдерин. Ысрайыл халкы бейлеки халклара геп хем гүлки болар. 21 Инди бейик болан бу өйүң янындан гечйән хер киши оңа хайранлар галып: „Реб нәме үчин бу юрды, бу өйи бейле терк этдикә?“диер. 22 Онсоң әхли халклар: „Чүнки ысрайыл халкы ата-бабаларыны Мүсүр юрдундан чыкаран өзлериниң Худайы Ребден йүз дөндерип, башга худайлара тарап өврүлдилер. Оларың өңүнде сежде эдип, олара хызмат этдилер. Шонуң үчин хем Реб бу бетбагтчылыклары оларың башындан индерди“диерлер».