2Ch 2 | TukCyr16 | STEP | Сүлейман Реббе ыбадат өйүни ве өзүне көшк гурмак карарына гелди.

‏ 2 Chronicles 2

Сүлейман ыбадатхананы гурмага тайярлык гөрйәр

(1 Патышалар 5:1-18)

1 Сүлейман Реббе ыбадат өйүни ве өзүне көшк гурмак карарына гелди. 2 Ол дагда етмиш мүң саны хаммалы, сегсен мүң саны даш ёнуҗыны ве оларың үстүнден гөзегчилик эдер ялы үч мүң алты йүз саны адамы топлады.

3 Сүлейман Сур патышасы Хурама ^{▼▼Хурам – бу ат 2Шам ве 1Пат китапларында Хирам дийип душ гелйәр.} чапар иберип шейле дийди: «Өзүне яшар ялы көшк гурунсын дийип, какам Давуда иберен кедр агачларыңдан маңа-да ибермегиңи товакга эдйәрин. 4 Ине, мен Худайым Реббе өй гуруп, ол өйи Оңа багыш этмекчи болярын. Ол өйде Реббиң хузурында якымлы ыслы түтетги якылар, гүндеки хөдүр чөреги хөдүрленер, Сабат гүнлеринде, Тәзе Ай байрамларында ве бейлеки байрамларда эртирлик ве агшамлык якма гурбанлыклары хөдүрленер. Булар Ысрайыл үчин эбеди парздыр. 5 Бизиң Худайымызың бейлеки әхли худайлардан бейик болшы ялы, мениң гурҗак өйүм хем бейик болар. 6 Эмма Оңа өй гурмага кимиң гүйҗи етер? Оны хатда гөк-де, гөклериң гөги-де ичине сыгдырып билмейәр! Онсоң Оңа өй гурар ялы мен киммишим? Мен бу өйи Онуң хузурында якымлы ыслы түтетги якмак үчин гурярын. 7 Яхудада ве Иерусалимде өз янымдакы какам Давудың тайярлан өкде уссалары билен ишләр ялы маңа алтын, күмүш, бүрүнч, демир ишлерине, гойы бадам, гырмызы ве гөк йүплүк боягларына, шейле хем ойма ишлерине уссат хүнәрмент ибермегиңи товакга эдйәрин. 8 – 9 Маңа ене Ливандан кедр, серви ве сандал агачларыны ибер. Мен сениң ишчилериңиң Ливанда агач кесмәге уссатдыкларыны билйәрин. Маңа бол агач тайярламак үчин мениң ишчилерим сениң ишчилериң билен биле ишләрлер. Мениң гурҗак өйүм җуда улы ве гөзел болар. 10 Ине, мен сениң агач кесйән ишчилериңе кырк мүң чувал ^{▼▼Кырк мүң чувал – еврейче йигрими мүң кор. Бу такм. 3000 тонна деңдир.} үвелен бугдай, кырк мүң чувал арпа, еди мүң хум ^{▼▼Еди мүң хум – еврейче йигрими мүң бат. Бу такм. 440000 литре деңдир.} шерап ве еди мүң хум зейтун ягыны берерин».

11 Онсоң Сур патышасы Хурам Сүлеймана хат үсти билен җогап гайтарды: «Реб Өз халкыны сөенсоң, сени оларың үстүнден патыша гойды». 12 Хурам сөзүни шейле довам этди: «Гөги ве ери ярадан Ысрайыл Худайы Реббе алкыш болсун! Реб Давут патыша пәхим-пайхасдан ве дүшүнҗеден долы акыллы огул берди. Шол огул Реббе өй ве өзүне көшк гурар. 13 Мен саңа Хурамабы атлы өкде ве дүшүнҗели бир уссаны ёллаярын. 14 Онуң эҗеси данлардан болуп, какасы хем сурлуды. Хурамабы алтын, күмүш, бүрүнч, демир, даш, агач ишлерине өкдедир. Ол бадам, гөк, гырмызы йүплүк ве непис зыгыр маталары билен хем ишләп билйәр. Шейле-де ол ойма ишлерине ве өзүне берлен ислендик нусга билен ишлемәге өкдедир. Ол сениң уссаларың ве җенабым – какаң Давудың уссалары билен ишләр. 15 Инди, гой, җенабым вада берен бугдайыны, арпасыны, зейтун ягыны ве шерабыны өз гулларына иберсин. 16 Биз саңа Ливандан нәче агач герек болса кесип, олары богуп, Яфо деңзиниң үсти билен акдырып гетирерис; сен-де оны Иерусалиме әкидерсиң».

17 Онсоң Сүлейман какасы Давудың хасаба алшы ялы, Ысрайылда яшаян гелмишеклериң барыны хасаба алды. Гелмишеклериң саны бир йүз элли үч мүң алты йүз болды. 18 Сүлейман олардан етмиш мүң адамы йүк дашамага, сегсен мүң адамы дагда даш ёнмага, үч мүң алты йүз адамы-да ишгәрлере гөзегчилиге белледи.