‏ 2 Chronicles 36

Яхуда патышасы Ехогахаз

(2 Патышалар 23:30-35)

1Юрдуң халкы Ёшыяның оглы Ехогахазы алып, какасының ерине патыша этди. 2Ехогахаз патыша боланда йигрими үч яшындады. Ол Иерусалимде үч ай патышалык этди. 3– 4Мүсүр патышасы Неко Иерусалимде Ехогахазы тагтдан агдарып, юрда бир йүз етмиш батман күмүш ▼

▼Бир йүз етмиш батман – еврейче йүз киккар. Бу такм. 3400 кг деңдир.

, бир ярым батмана голай хем алтын ▼

▼Бир ярым батмана голай – еврейче бир киккар. Бу такм. 34 кг деңдир.

салгыт салды. Ол Ехогахазың доганы Элякымы онуң ерине Яхуда ве Иерусалиме патыша эдип, онуң адыны Ехоякым дийип үйтгетди. Онсоң Неко патыша Ехогахазы алып, Мүсүре гелди.

Яхуда патышасы Ехоякым

(2 Патышалар 23:36–24:7)

5Ехоякым патыша боланда йигрими бәш яшындады. Ол Иерусалиме он бир йыл патышалык этди. Ол Худайы Реббиң назарында йигренҗи ишлери этди. 6Бабыл патышасы Небукаднесар Ехоякымың үстүне чозуп, оны Бабыла әкитмек үчин зынҗыр билен даңды. 7Небукаднесар Реббиң өйүндәки гап-гачлары хем Бабыла әкидип, олары өзүниң Бабылдакы көшгүнде гойды. 8Ехоякымың галан ишлери, онуң эден йигренҗи ишлери ве габахатлыклары барада Ысрайыл хем Яхуда патышаларының тарых китабында языландыр. Онуң ерине оглы Ехоякын патыша болды.

Яхуда патышасы Ехоякын

(2 Патышалар 24:8-17)

9Ехоякын патыша боланда секиз яшындады. Ол Иерусалимде үч ай, он гүн патышалык этди. Ехоякын Реббиң назарында йигренҗи ишлери этди. 10Бахарда патыша Небукаднесар адам иберип, Ехоякыны Реббиң өйүниң гымматбаха гап-гачлары билен бирликде Бабыла гетирдип, онуң доганы Сидкияны Яхуда ве Иерусалиме патыша этди.

Яхуда патышасы Сидкия

(2 Патышалар 24:18-20; Ермея 52:1-3)

11Сидкия патыша боланда йигрими бир яшындады. Ол Иерусалимде он бир йыл патышалык этди. 12Сидкия Реббиң назарында йигренҗи ишлери этди. Ол Реббиң адындан геплән Ермея пыгамбериң өңүнде өзүни кичелтмеди.

Иерусалимиң сынмагы

(2 Патышалар 25:1-21; Ермея 52:3-11)

13Шейле хем Сидкия өзүне Худайдан ант ичирен Бабыл патышасы Небукаднесара гаршы гозгалаң турузды. Сидкия Ысрайыл Худайы Реббе тарап өврүлмеҗек болуп, бойнуёгынлык этди, йүрегини гататды. 14Әхли руханы баштутанлары билен халк бирликде миллетлериң әхли йигренҗи ишлерине эердилер, бивепалык чакданаша артды. Олар Реббиң Иерусалимде мукаддес эден өйүни мурдар этдилер. 15Аталарының Худайы Реб олара пыгамберлериң үсти билен ызыгидерли дуйдурыш берди, чүнки Онуң Өз халкына ве месгенине рехими инди. 16Эмма олар Худайың чапарларыны масгаралап, Худайың сөзлерини әсгермезлик этдилер, Онуң пыгамберлерини кемситдилер. Онсоң Реббиң Өз халкына гаршы газабы шейле бир ловлады велин, ондан гутулар ялы болмады.

17Онсоң Реб Иерусалимиң гаршысына Бабыл патышасыны чоздурды. Бабыллылар мукаддес өйүнде яшларыны гылычдан гечирдилер; йигитлердир гызлара, гоҗалардыр сачы агаранлара олар рехим этмедилер. Реб оларың барыны Бабыл патышасының элине берди. 18Небукаднесар Худайың өйүндәки әхли улулы-кичили гап-гачлары, Реббиң өйүндәки хазыналары, патышаның ве онуң эмелдарларының хазыналарыны Бабыла алып гитди. 19Бабыллылар Худайың өйүни якып, Иерусалимиң диварыны йыкып, ондакы әхли көшклере от берип, әхли гымматбаха затлары ёк этдилер. 20Бабыл патышасы гылычдан аман галанлары Бабыла есир эдип әкитди. Есир эдилип әкидиленлер Парс патышалыгы хәкимиет башына гечйәнчә, Бабыл патышасына ве онуң огулларына гул болдулар.

21Шейдип, Реббиң Ермеяның үсти билен айдан сөзи амала ашды. Юрт вейранчылыкда болан гүнлериниң довамында долы етмиш йыллап дынчлыкда болды.

Куреш патышаның перманы

(Эзра 1:1-4)

22Парс патышасы Курешиң патышалыгының биринҗи йылында Реббиң Ермеяның үсти билен айдан сөзи амала ашар ялы, Реб Куреш патышаның уланян язувында перман чыкарып, оны тутуш патышалыгына чапар үсти билен җар этмеги онуң калбына салды. 23Парс патышасы Куреш шейле диййәр: «Гөгүң Худайы Реб ер йүзүндәки әхли патышалыклары маңа берди ве Яхуданың Иерусалим шәхеринде Өзүне ыбадатхана гурмагы маңа эмр этди. Араңызда Худайың халкындан боланыңыз бар болса, юрдуңыза доланың. Худайыңыз Реб сизе яр болсун!»