2Ki 15 | TukCyr16 | STEP | Ысрайыл патышасы Яробгамың шалыгының йигрими единҗи йылында Амазяның оглы Яхуда патышасы Узыя патышалык эдип башлады.

‏ 2 Kings 15

Яхуда патышасы Узыя

(2 Йыл язгылары 26:1-23)

1 Ысрайыл патышасы Яробгамың шалыгының йигрими единҗи йылында Амазяның оглы Яхуда патышасы Узыя патышалык эдип башлады. 2 Узыя патыша боланда он алты яшындады. Ол Иерусалимде элли ики йыл патышалык этди. Онуң эҗеси Еколя Иерусалимденди. 3 Узыя өз какасы Амазя ялы Реббиң назарында догры ишлери этди. 4 Муңа гарамаздан Узыя сеждегәхлери айырмады. Бүтин халк энтек-энтеклерем шол ерлере барып гурбанлык берип, якымлы ыслы түтетги якярды. 5 Реб оңа ёканчлы дери кесели билен эзъет берди. Ол тә өлйәнчә ёканчлы дери кеселинден эҗир чекип, айратын ерде яшады. Патышаның оглы Ётам юртдакы халка баштутанлык эдип, көшги доландырды.

6 Узыяның бейлеки ишлери ве әхли эден ишлери яхуда патышаларының йыл язгыларында языландыр. 7 Узыя ата-бабаларына говушды. Ол Давут галасында, аталарының янында җайланды. Онсоң онуң ерине оглы Ётам патыша болды.

Ысрайыл патышасы Закаря

8 Яхуда патышасы Узыяның шалыгының отуз секизинҗи йылында Яробгамың оглы Закаря Ысрайыла патыша болуп, Самарияда алты ай шалык сүрди. 9 Закаря хем аталары ялы Реббиң назарында йигренҗи ишлери этди. Ол Небадың оглы Яробгам Ысрайыла этдирен гүнәлеринден эл чекмеди. 10 Ябешиң оглы Шаллум Закаря гаршы дилдүвшүк гурап, оны халкың өңүнде уруп өлдүрди-де, онуң ерине өзи патыша болды.

11 Закаряның бейлеки ишлери ысрайыл патышаларының йыл язгыларында языландыр. 12 Реббиң Ехува: «Сениң несиллериң дөрдүнҗи арка ченли Ысрайыл тагтында отурарлар» дийип берен вадасы берҗай болды.

Ысрайыл патышасы Шаллум

13 Яхуда патышасы Узыяның шалыгының отуз докузынҗы йылында Ябешиң оглы Шаллум патыша болуп, Самарияда бир ай патышалык этди. 14 Онсоң Гадының оглы Менахым Тирсадан чыкып, Самария гелди. Ол Самарияда Ябешиң оглы Шаллумы өлдүрип, өзи онуң ерине патыша болды. 15 Шаллумың бейлеки ишлери, гуран дилдүвшүги барада ысрайыл патышаларының йыл язгыларында языландыр. 16 Шол дөвүрде Менахым Тирсадан башлап, Типсада ве онуң этрапларында яшаянларың барыны гырды. Өзүне галаның дервезесини ачмандыклары үчин, оларың барыны гырды ве гөврели аялларының гарынларыны ярды.

Ысрайыл патышасы Менахым

17 Яхуда патышасы Узыяның шалыгының отуз докузынҗы йылында Гадының оглы Менахым Ысрайыла патыша болды. Ол Самарияда он йыл патышалык этди. 18 Менахым Реббиң назарында йигренҗи ишлери этди. Ол бүтин өмрүне Небадың оглы Яробгамың Ысрайыла этдирен гүнәлеринден эл чекмеди. 19 Ашур патышасы Пул ^{▼▼Пул – Пулуң бейлеки ады Тиглатпилесер. Серет: 2Пат 15:29.} Ысрайыла хүҗүм этди. Менахым өз патышалыгыны кувватландырмага көмек эдери ялы, Пула бир мүң еди йүз батман ^{▼▼Бир мүң еди йүз батман – еврейче мүң киккар. Бу такм. 34 тонна деңдир.} күмүш берди. 20 Менахым Ашур патышасына күмүш бермек үчин Ысрайылдакы байларың барына җан башына бир йүз мысгалдан ^{▼▼Бир йүз мысгал – еврейче элли шекел. Бу такм. 600 гр деңдир.} говрак күмүш салгыт салды. Шондан соң Ашур патышасы юртда галман ызына гайтды.

21 Менахымың бейлеки ишлери ве әхли эден ишлери барада ысрайыл патышаларының йыл язгыларында языландыр. 22 Менахым ата-бабаларына говушды. Оглы Пекахя онуң ерине патыша болды.

Ысрайыл патышасы Пекахя

23 Яхуда патышасы Узыяның шалыгының эллинҗи йылында Менахымың оглы Пекахя Ысрайыла патыша болуп, Самарияда ики йыл шалык сүрди. 24 Пекахя Реббиң назарында йигренҗи ишлери этди. Ол Небадың оглы Яробгамың Ысрайыла этдирен гүнәлеринден эл чекмеди. 25 Өз серкердеси Ремаляның оглы Пека элли саны гилгатлы билен Пекахя гаршы дилдүвшүк гурады. Пека Самарияда көшгүң ички галасында Аргоп ве Аръе билен бирликде Пекахяның үстүне хүҗүм эдип, оны өлдүрип, ерине өзи патыша болды. 26 Пекахяның бейлеки ишлери ве әхли эден ишлери ысрайыл патышаларының йыл язгыларында языландыр.

Ысрайыл патышасы Пека

27 Яхуда патышасы Узыяның шалыгының элли икинҗи йылында Ремаляның оглы Пека Ысрайыла патыша болуп, Самарияда йигрими йыл шалык сүрди. 28 Пека Реббиң назарында йигренҗи ишлери этди. Ол Небадың оглы Яробгамың Ысрайыла этдирен гүнәлеринден эл чекмеди.

29 Ысрайыл патышасы Пеканың дөврүнде Ашур патышасы Тиглатпилесер гелип, Ыёны, Абелбейтмагаканы, Янованы, Кедеши, Хасоры, Гилгады, Җелиләни ве тутуш Нафталы юрдуны басып алып, оларың халкларыны Ашура есир эдип әкитди. 30 Онсоң Эланың оглы Хошея Ремаляның оглы Пека гаршы дилдүвшүк гурап, онуң үстүне хүҗүм этди ве оны өлдүрди. Соңра Узыяның оглы Ётамың патышалыгының йигриминҗи йылында Хошея Пеканың ерине патыша болды. 31 Пеканың бейлеки ишлери ве әхли эден ишлери ысрайыл патышаларының йыл язгыларында языландыр.

Яхуда патышасы Ётам

(2 Йыл язгылары 27:1-9)

32 Ремаляның оглы Ысрайыл патышасы Пеканың шалыгының икинҗи йылында Узыяның оглы Яхуда патышасы Ётам патышалык эдип башлады. 33 Ётам патыша болан вагты йигрими бәш яшындады. Ол Иерусалимде он алты йыл патышалык этди. Онуң эҗеси Еруша Садогың гызыды. 34 Ётам какасы Узыя ялы Реббиң назарында догры ишлери этди. 35 Муңа гарамаздан, ол сеждегәхлери айырмады. Халк энтек-энтеклерем шол ерлере барып, гурбанлык берип, якымлы ыслы түтетги якярды. Ётам Реббиң өйүниң демиргазык дервезесини гурды. 36 Ётамың бейлеки ишлери ве әхли эден ишлери яхуда патышаларының йыл язгыларында языландыр. 37 Шол дөвүрде Реб Сирия патышасы Ресини, Ремаляның оглы Пеканы Яхуданың гаршысына гойберип башлады. 38 Ётам ата-бабаларына говушды. Ол Давут галасында, аталарының янында җайланды. Оглы Ахаз онуң ерине патыша болды.