2Ki 24 | TukCyr16 | STEP | Ехоякымың патышалык эден дөврүнде Бабыл патышасы Небукаднесар онуң үстүне хүҗүм этди. Ехоякым үч йыллап Бабыл патышасының хызматкәри болса-да, онуң гаршысына гозгалаң турузды.

‏ 2 Kings 24

1 Ехоякымың патышалык эден дөврүнде Бабыл патышасы Небукаднесар онуң үстүне хүҗүм этди. Ехоякым үч йыллап Бабыл патышасының хызматкәри болса-да, онуң гаршысына гозгалаң турузды. 2 Реб Өз гуллары пыгамберлер аркалы айдан сөзүне гөрә, Яхуданың халкының барыны гырдырмак үчин бабыллыларың, сириялыларың, моваплыларың ве аммонлыларың гошунларыны оларың үстүне иберди. 3 – 4 Хакыкатдан-да, Реббиң эмри билен яхуда халкының башына күлпет инди. Манашаның бар эден гүнәлери ве пис ишлери хем-де онуң дөкен бигүнә ганы үчин Реб яхуда халкыны хузурындан ковмакчы болды. Манашаның Иерусалими бигүнә гандан долдурандыгы зерарлы Реб онуң гүнәсини гечмек ислемеди. 5 Ехоякымың патышалыгы барадакы бейлеки вакалар ве онуң әхли эден ишлери яхуда патышаларының йыл язгыларында языландыр. 6 Шейдип, Ехоякым ата-бабаларына говушды. Оглы Ехоякын онуң ерине патыша болды. 7 Мүсүр патышасы өз юрдундан чыкмады, чүнки Бабыл патышасы Мүсүр серхединден Евфрат дерясына ченли оңа дегишли болан ерлериң барыны басып алыпды.

Яхуда патышасы Ехоякын

(2 Йыл язгылары 36:9-10)

8 Ехоякын патыша боланда он секиз яшындады. Ол Иерусалимде үч ай патышалык этди. Онуң эҗеси Нехушта иерусалимли Элнатаның гызыды. 9 Ехоякын эдил какасы Ехоякым ялы Реббиң назарында йигренҗи ишлери этди. 10 Шол дөвүрде Бабыл патышасы Небукаднесарың гошунлары Иерусалимиң үстүне хүҗүм эдип, онуң дашыны габадылар. 11 Лешгерлери шәхериң дашыны габавда саклап йөркәлер, Небукаднесар Иерусалиме гелди. 12 Яхуда патышасы Ехоякын эҗеси, хызматкәрлери, серкерделери ве көшк эмелдарлары билен бирликде Бабыл патышасына табын болдулар. Бабыл патышасы Ехоякыны патышалыгының секизинҗи йылында есир алды. 13 Реббиң айдышы ялы, Бабыл патышасы Реббиң өйүндәки ве патышаның өйүндәки хазыналарың барыны алып гитди. Ол Ысрайыл патышасы Сүлейманың Реббиң өйүнде ясан әхли алтын гап-гачларыны күл-пеекун этди. 14 Бабыл патышасы Иерусалимиң тутуш илатыны, онуң әхли эмелдарларыны, әхли батыр йигитлерини, он мүң саны адамыны, шейле хем хүнәрментлерини ве демирчи уссаларыны есир эдип әкитди. Ол юртда гарып-гасарлардан башга екеҗе адам хем галдырмады. 15 Небукаднесар патыша Ехоякыны ве патышаның эҗесини, онуң аялларыны ве эмелдарларыны, юрдуң баштутанларыны Иерусалимден Бабыла есир эдип әкитди. 16 Бабыл патышасы еди мүң саны сөвешиҗилери, мүң саны хүнәрментлердир демирчи уссалары Бабыла гетирди. Оларың бары-да гүйчли ве урша укыплы адамларды. 17 Бабыл патышасы Ехоякының ерине агасы Матаняны патыша эдип, адыны үйтгедип, оны Сидкия дийип атландырды.

Яхуда патышасы Сидкия

(2 Йыл язгылары 36:11-16; Ермея 52:1-3)

18 Сидкия патыша боланда йигрими бир яшындады. Ол Иерусалимде он бир йыл патышалык этди. Онуң эҗеси Хамутал либналы Ермеяның гызыды. 19 Сидкия хем Ехоякым ялы Реббиң назарында йигренҗи ишлери этди. 20 Реббиң Иерусалиме ве Яхуда халкларына гаршы болан гахары туташярды. Ол шонуң үчин олары Өз хузурындан ковды. Сидкия Бабыл патышасына гаршы уруш турузды.