2Th 2 | TukCyr16 | STEP | Инди болса, эй, доганлар, Реббимиз Иса Месихиң гелмеги ве Онуң янына үйшмегимиз бабатда шулары айдыңлашдырмакчы:

‏ 2 Thessalonians 2

Биканун адам

1 Инди болса, эй, доганлар, Реббимиз Иса Месихиң гелмеги ве Онуң янына үйшмегимиз бабатда шулары айдыңлашдырмакчы: 2 «Реббиң гүни голайлады» дийип айдян хайсыдыр бир хабар, пыгамберлик я-да хат бизден ялы болуп гөрүнсе-де, шолар себәпли хайдан-хай алҗырамаң, галпылда дүшмәң. 3 Өзүңизи хич киме хич ёл билен алдатмаң. Чүнки көплер Худая гаршы баш галдырар ве ёк эдилмели биканун адам пейда болар. Йөне бу затлар амала ашянча, Реббиң гүни гелмез. 4 Бу адам худай дийип атландырылян я сежде эдилйән затларың барына гаршы чыкып, өзүни олардан ёкары тутар. Ол хатда Худайың ыбадатханасында отурып, өзүни Худай дийип ыглан эдер. 5 Мен хениз яныңыздакам булары айданым, элбетде, ядыңыздадыр. 6 – 7 Бу биканун адам Худайың беллән вагтында пейда болар. Биканунлык эййәм ассырынлык билен херекет этсе-де, биканун адамың пейда болмагы бөкделйәр. Мунуң себәбини өзүңиз билйәнсиңиз. Хава, биканун адамы бөкдейән бири бардыр. Ол арадан айрылансоң, 8 биканун адам пейда болар. Реб Иса агзының деми билен, Өз гелшиниң шанлы шөвкети билен оны ёк эдер. 9 Биканун адам геленде шейтаның гүйҗи аркалы хер хили ялан гудратлары, аламатлары ве мугҗызалары гөркезер. 10 Ол хер хили яманлыклар билен хеләкчилик ёлуна дүшенлери алдава салар. Чүнки олар хакыкаты сөймеги ве шол аркалы халас болмагы рет этдилер. 11 Шонуң үчин-де Худай олары алдаян бир гүйҗе табшыряр. Олар-да бу алдава ынанярлар. 12 Ол муны хакыката ынанман, яманлыкдан кейп аланларың барыны хөкүм этмек үчин эдйәр.

Иманда берк дуруң!

13 Эй, Реб тарапдан сөйүлйән доганлар! Сиз халас болуп билериңиз ялы, Худай сизи илкинҗилер хөкмүнде ^{▼▼Илкинҗилер хөкмүнде – кәбир голязмаларда илкибашдан.} сайлады. Сиз Мукаддес Рух аркалы пәкленип, хакыката болан иманыңыз аркалы халас болдуңыз. Шоңа гөрә-де, биз элмыдама Худая шүкүрлер этмелидирис. 14 Ол Реббимиз Иса Месихиң шөхратына шәрик болуп билериңиз ялы, вагыз эдйән Хош Хабарымыз аркалы сизи булара чагырды. 15 Шоңа гөрә-де, эй, доганлар, инди иманда берк дуруң! Бизден сөз я хат аркалы өвренен таглыматыңыза берк япышың. 16 – 17 Атамыз Худай бизи сөйүп, Өз мерхемети аркалы бизе эбеди теселли билен ягшы умыт берди. Гой, Реббимиз Иса Месихиң Өзи ве Атамыз Худай сизе теселли берсин, хер бир ягшы ишде ве сөзде сизе гүйч берсин.