‏

Ёханна бу хатында дүнйәниң дүрли күнҗеклерине Иса Месих барадакы Хош Хабары вагыз этмек үчин гидйән иманлылары голдамалыдыгыны ятладяр. Хат йыгнагың Гаюс атлы әхмиетли агзасына языландыр. Ол Хош Хабары башга ерлере вагыз этмәге гидйән иманлылара өрән көп көмек берипдир.

Мазмуны

Гаюса йүзленме 1:1-4

Биле ишлемегиң әхмиети 1:5-12

Соңкы саламлар 1:13-15

‏ 3 John

Саламлар

1Чын йүрекден сөййән эзиз достум Гаюса мен яшулудан догайы салам. 2Мәхрибан достум, рухуңың белент болшы ялы, әхли ишлериң ровачлансын ве җаның саг болсун! 3Доганлар гелип, сениң садыклык билен хакыката эерип яшаяндыгыңы хабар беренлеринде, мениң шатлыгымың чәги болмады. 4Мениң үчин перзентлеримиң хакыката эерип яшаяндыкларыны эшитмекден улы шатлык ёкдур.

Өвгүлер ве өвүтлер

5Эзиз достум, сен доганлара, хатда өзүңиң танамаянларыңа-да садыклык билен хызмат эдйәрсиң. 6Олар сениң мәхирли сөйгиң догрусында иманлылар йыгнагының өңүнде шаятлык этдилер. Сен олары Худая мынасып усулда ёла салсаң, ягшы иш эдерсиң. 7Олар Месихиң адының хатырасына ёла чыкдылар ве диңе имандакы доганларының ярдамына бил багламагы карар этдилер. 8Биз хакыкат угрунда биле ишләр ялы, шейле адамлары голдамага борчлудырыс.

9Мен иманлылар йыгнагына бир хат языпдым, йөне оларың арасында башлык болмагы халаян Диётреф бизи кабул этмейәр. 10Шоңа гөрә-де, эгер барайсам, онуң этмишлерини паш эдерин. Ол биз барада ярамаз геп яйрадып, төхмет атяр. Мунуң билен хем чәкленмән, доганлары-да кабул этмейәр, кабул этҗеклере-де пәсгел берип, олары йыгнакдан ковяр. 11Мәхрибан достум, сен ямандан дәл-де, ягшыдан гөрелде ал. Ягшылык эдйән адам Худайдандыр. Яманлык эдйән адам болса Худайы танаян дәлдир.

12Деметрей болса хеммелер тарапындан сыланян адамдыр, хакыкатың өзи муңа шаятдыр. Биз хем ол хакда ягшы пикирдедирис, гепимизиң хакыкатдыгыны өзүң билйәнсиң.

Хошлашык сөзи

13Мениң саңа айтмалы затларым көп, оларың хеммесини язып отурҗак дәл, баранымда хеммесини айдарын. 14Сени басымрак гөрүп, йүзбе-йүз гүрлешерис диен умыдым бар. 15Саг-саламат бол! Достларымыз саңа салам ёллаярлар. Ол ердәки достларымызың хеммесине атма-ат салам айт.