‏ Colossians 1

1– 2Худайың ырадасы билен Иса Месихиң ресулы болан мен Павлусдан ве доганымыз Тимотеосдан Колосиядакы Худайың халкына, ягны Месихе дегишли болан садык доганларымыза догайы салам!

Атамыз Худайың ▼

▼Кәбир голязмаларда Атамыз Худайың ве Реббимиз Иса Месихиң.

мерхемети, парахатлыгы, гой, сизе яр болсун!

Павлус Худая шүкүр эдйәр

3Биз сизиң үчин дога-дилег эдип, элмыдама Реббимиз Иса Месихиң Атасы Худая шүкүрлер эдйәрис, 4себәби биз сизиң Иса Месихе болан иманыңыз ве Худайың әхли халкына гөркезен сөйгиңиз хакында эшитдик. 5Бу иманыңыз ве сөйгиңиз умыдыңыздан, хава, гөкде сизе гарашян затлара баглаян умыдыңыздан дөрейәр. Сиз өзүңизе гелип говшан хакыкат сөзи болан Хош Хабарда бу умыт барада өң эшиденсиңиз. 6Худайың Хош Хабары бүтин дүнйә яйрап, миве берип гелйәр. Худайың мерхеметиниң хакыкы манысына гөз етирен гүнүңизден бәри, бу Хош Хабар сизиң араңызда хем шейле херекет эдйәр. 7Сиз бу Хош Хабары сөйгүли ишдешимиз Эпафрадан өврендиңиз. Ол сизиң угруңызда Месихиң садык хызматкәридир. 8Сизиң Мукаддес Рухдан алян сөйгиңиз барада хем бизе ол гүррүң берди.

9Муны эшиден гүнүмизден бәри, биз хем сизиң үчин дога-дилеглеримизиң ызыны үземзок. Худайың ислегини долы билмегиңиз үчин, Онуң сизи әхли рухы акылдарлык ве дүшүнҗе билен долдурмагыны дилейәрис. 10Шейле хем Реббе мынасып дурмушда яшап, Оны хер бабатда хошал этмегиңиз үчин дилег эдйәрис. Гой, сизиң әхли оңат ишлериңиз миве берсин. Гой, Худай Оны танамакда сизи хас-да өсдүрсин. 11Гой, Ол сизи бейик гудраты билен кувватландырсын; сизиң сабыр-такатлы болуп, әхли зада дөз гелмегиңиз үчин гүйч-кувват берсин. 12Нурдакы Өз халкының мирасына шәрик болмага сизи долы мынасып эден Ата Худая шатланып шүкүр эдиң. 13Ол бизи гараңкылыгың ыгтыярындан бошадып, Өз сөйгүли Оглуның Шалыгына гетирди; 14Оглы аркалы ▼

▼Оглы аркалы – кәбир голязмаларда Оглуң дөкен ганы аркалы.

гүнәлеримизи багышлап, бизи азатлыга чыкарды.

Месихиң ыгтыярлыгы

15 Месих гөрүнмейән Худайың кешбидир, бүтин ярадылышың илкинҗи догланы Олдур. 16Чүнки әхли затлар Ол аркалы ярадыландыр. Гөкдәки ве ердәки, гөрүнйән хем гөрүнмейән затлары: тагтлардыр хәкимиетлери, хөкүмдарлары ве эрк-ыгтыярлылары – барыны Ол яратды. Хемме зат Ол аркалы ве Онуң үчин ярадылды. 17Әхли затдан өң бар болан Олдур, әхли затлар Ол аркалы мәкәм дурандыр. 18Бедениң, ягны иманлылар йыгнагының башы Олдур. Әхли затда илкинҗи орны алсын дийип, башлангыч-да, илкинҗи болуп өлүмден дирелен-де Олдур. 19Чүнки Худай долы кәмиллигиниң Исада орнашмагыны макул билди. 20Месихиң хачда дөкен ганы аркалы парахатчылыгы беркарар эдип, Худай ердәки ве гөкдәки әхли зады Өзи билен ярашдырмагы макул билди. 21Сиз бирвагтлар эден пис ишлериңиз себәпли пикириңизде Худайдан үзңедиңиз, Оңа душмандыңыз. 22Инди болса Худай сизи Өз хузурында мукаддес, мүйнсүз хем айыпсыз этмек үчин, Месихиң бедениниң өлүми аркалы Өзи билен ярашдырды. 23Элбетде, сиз эшиден Хош Хабарыңызың берен умыдында сарсман, иманда көк уруп, берк дурмалысыңыз. Бу Хош Хабар ер йүзүндәки хер бир ынсана ыглан эдилди. Мен Павлус бу Хош Хабарың хызматчысы болдум.

Павлусың иманлылара хызматы

24Мен сизиң угруңызда гөрйән гөргүлериме бегенйәрин. Шейле-де мен Иса Месихиң Өз бедени, ягны иманлылар йыгнагының хатырасына чекен эҗирлериниң өз беденимде довам эдйәндигинден хошалдырын. 25– 26Сизиң бәхбидиңиз үчин Худайың маңа берен табшырыгына гөрә, мен бу иманлылар йыгнагының хызматкәри болдум. Бу табшырык Худайың сөзүни, ягны гечен асырлардан ве несиллерден гизлин сакланан, эмма инди Онуң халкына аян эдилен сыры долы әшгәр этмекден ыбаратдыр. 27Худай бу сырың шөхратлы байлыгыны миллетлериң арасында Өз халкына билдирмек иследи. Бу сыр сизе шөхрата говушмак умыдыны берип, араңызда болян Иса Месихдир. 28Шейлеликде, биз хеммелере Месих хакда вагыз эдйәрис. Олары Месихиң бедениниң кәмил агзасы хөкмүнде хөдүрләр ялы, хер бир ынсана өвүт-үндев эдип, улы акылдарлык билен таглым берйәрис. 29Шу максат билен җанымы аяман зәхмет чекйәрин, Месихиң өзүме тәсир эдйән гудратлы гүйҗүне даянярын.