Deu 19 | TukCyr16 | STEP | Худайыңыз Реб сизе берҗек юрдуның халкларыны ёк эденде, сиз олары ковуп чыкарып, оларың галаларында ве өйлеринде орнашаныңызда,

‏ Deuteronomy 19

Гачыбаталга галалары хакда

(Чөлде 35:6-34; Ешува 20:1-9)

1 Худайыңыз Реб сизе берҗек юрдуның халкларыны ёк эденде, сиз олары ковуп чыкарып, оларың галаларында ве өйлеринде орнашаныңызда, 2 – 3 Худайыңыз Реббиң мүлк эдип берҗек юрдуны үч бөлеге бөлүп, хер бөлекден бир галаны сайлаң. Адам өлдүрен ганхор оларың бирине гачып барып гутулып билер ялы, бу галалара бармак үчин ёллар чекиң. 4 Ганхор ол ере, ине, шейле ягдайда гачып барып, дири галып билер: төтәнликде башга бирини өлдүрен болса ве ол икисиниң арасында өң хич хили душманчылык ёк болса, ол ере гачып гутулып билер. 5 Айдалы, бир адам бейлеки бир адам билен токая одун чапмага гидйәр. Оларың бири агач чапып дурка, палта сапындан сыпып, янындака дегйәр ве ол хем шондан өлйәр. Шейле ягдайда ол ганхор бу галаларың бирине гачып гутулып билер. 6 Эгер ёл гаты узак болса, өлдүрилениң хоссары өч алмак үчин ганхорың ызындан газап билен ковалап етип өлдүрер. Эмма оларың арасында өң душманчылыгың ёкдугы үчин, ол өлдүрилмели дәлдир. 7 Шонуң үчин хем мен сизе: „Өзүңизе үч галаны сайлаң“дийип буйрук бердим.

8 – 9 – 10 Худайыңыз Ребби сөйүп, хемише Онуң ёлундан йөрәп, мениң бу гүнки сизе берйән буйрукларымың әхлисини ыхлас билен берҗай этсеңиз, Худайыңыз Реб ата-бабаларыңыза сөз берши ялы, ериңизи гиңелдер. Ол ата-бабаларыңыза вада эден әхли ерини сизе берер. Шонда Худайыңыз Реббиң сизе мүлк берҗек еринде бигүнә адамың ганы дөкүлмез ялы, бигүнә ганың астында галмазыңыз ялы, бу үч галаның үстүне ене-де үч гала гошуң. 11 Эмма бир адамың башга бири билен душманчылыгы болуп, букуда ятып, онуң үстүне чозуп, оны өлдүрсе, соңра-да ол бу галаларың бирине гачып барса, 12 ганхорың галасындакы яшулулар адам иберип, гүнәкәри ол ерден гетиртмели. Оны өлдүрмек үчин өлдүрилениң хоссарының элине бериң. 13 Оңа рехим этмәң, бигүнә ганы Ысрайылдан ювуп айрың, шонда сиз говы гүнлер гөрерсиңиз.

14 Худайыңыз Реббиң сизе мүлк эдип берҗек юрдунда гоңшыңыз билен өңки несиллериңизиң дүзен арачәк дашыны сүйшүрмәң.

Шаятлык этмек хакында

15 Җенаят я-да гүнә эден адамың гүнәсини бойнуна гоймак үчин, оңа бир адамың шаятлыгы етерлик дәлдир. Ол ики я-да үч шаядың гүвәси билен тассыклансын. 16 Эгер бир яланчы шаят бирине ярамаз ниет билен гүнә йүклесе, 17 онда давагәрлериң икиси хем Реббиң хузурына, шол дөвүрде хызмат эдйән руханыларың ве казыларың хузурына барсын. 18 Казылар говы эдип дерңев гечирсинлер. Эгер шаят адам ялан гүвәлик берип, башга бириниң гаршысына ялан сөзлейән болса, 19 онда сиз шол гүнәкәрленйәне нәхили җезаны ниетлән болсаңыз, шол җезаны ялан гүвәлик эдене бериң. Шейдип, сиз өз араңыздан пислиги айрып ташлаң. 20 Бейлекилер муны эшидип горкарлар. Сизиң араңызда гайдып, хич хачан шунуң ялы җенаят эдилмез. 21 Ялан сөзлейән адама рехим этмәң. Җан орнуна җан, гөз орнуна гөз, диш орнуна диш, аяк орнуна аяк алмак билен оңа җеза бериң.