‏ Deuteronomy 23

Реббиң җемагатына гирип билмейән адамлар

1Эркеклик тохумлыгы енҗилен я-да кесилен адам Реббиң җемагатына гирмейәр.

2Биканун доглан Реббиң җемагатына гирмейәр. Хатда оларың соңкы несиллериниңем хич бири Реббиң җемагатына гирмейәр.

3Аммонлар хем, моваплар хем Реббиң җемагатына гирмейәр. Хатда оларың соңкы несиллериниң хич бири Реббиң җемагатына гирмейәр. 4Себәби сиз Мүсүрден чыкып гайданыңызда, олар ёлда сизи дуз-чөрек ве сув билен гаршы алмадылар. Олар сизи нәлетлемек үчин, Месопотамияда Петор галасындан болан Бегорың оглы Билгамы хакына тутдулар. 5Эмма Худайыңыз Реб Билгамы диңлемекден йүз өврүпди. Ол сизи сөенсоң, шол нәлети алкыша өврүпди. 6Өмрүңизиң бүтин довамында хич вагт оларың саламатлыгы ве абаданлыгы угрунда чалышмаң.

7Эдомларың хиҗисини йигренмәң, чүнки олар сизиң гарындашларыңыздыр. Мүсүрлилериң хем хиҗисини йигренмәң, чүнки сиз оларың юрдунда гелмишек болуп яшадыңыз. 8Оларың агтыклары Реббиң җемагатына гирип билер.

Харбы дүшелгәниң тәмизлиги

9Душманларыңыза гаршы сөвешмек үчин дүшләниңизде өзүңизи хер хили харамлыкдан гораң. 10Эгер араңыздан бириниң гиҗе тохумы акып, харам болса, дүшелгәңизден дашары чыксын. Ол дүшелгәңизе гирмели дәлдир. 11Агшам дүшенде, ол ювунсын, Гүн батандан соң, ол дүшелгәңизе гирип билер. 12Аяк ёлы үчин дүшелгәңизиң дашында белли бир хаҗатхана ериңиз болмалыдыр. 13Аяк ёлуна чыканыңызда, яныңыз билен кепҗе алып гидиң. Тәрет эдип боланыңыздан соң, чукур газып, тәретиңизи гөмүң. 14Чүнки Худайыңыз Реб сизи халас этмек үчин ве душманларыңызы сизиң элиңизе бермек үчин дүшелгәңизиң ичине айланар. Шонуң үчин дүшелгәңиз пәк болмалыдыр, Реб араңызда неҗис зат гөрүп, сизден йүз өвүрмесин.

Гачян гуллар хакда

15Хоҗайынларындан гачып, яныңыза гелен гуллары ызына элтип бермәң. 16Олар сизиң араңызда, өз сайлан ислендик галасында, гөвүнлериниң ислән еринде сизиң билен биле яшаберсинлер. Олары хорламаң.

Лолучылык хакда

17Ысрайыл гызларының хич бири сежде эдилйән ерде лолы болуп ишлемесин. Ысрайыл огулларының хем хич бири мунуң ялы иш этмесин. 18Оларың лолучылыкдан газанан хакыны айдылан садакаларың төлеги хөкмүнде Худайыңыз Реббиң өйүне гетирмәң. Чүнки буларың икиси хем Худайыңыз Реб үчин неҗисликдир.

Карз бермек хакда

19Ысрайыл доганыңыза пул, азык, бейлеки затлары пейда гөрмек ниети билен карз бермәң. 20Пейда гөрмек үчин кесеки юртла карз берсеңиз болар, эмма өз ысрайыл доганыңыза карзы пейда гөрмек үчин бермәң. Шонда Худайыңыз Реб сизиң мүлк эдинҗек юрдуңызда этҗек әхли ишлериңизе берекет берер.

Айдылан садака хакда

21Худайыңыз Реббе садака айдан болсаңыз, оны гиҗикдирмән бериң, чүнки Худайыңыз Реб айдан садакаңызы сизден хөкман талап эдер. Эгер сиз оны ерине етирмесеңиз, гүнә газанарсыңыз. 22Садака айтмадык болсаңыз, онда гүнә газанмарсыңыз. 23Йөне Худайыңыз Реббе өз агзыңыз билен айдан садакаңызы айдышыңыз ялы, дилиңизиң геплән задыны ыхлас билен ерине етириң.

Бириниң үзүм ве бугдайыны иймек хакда

24Эгер сиз бириниң үзүм багына гирсеңиз, онуң үзүминден тә дойянчаңыз ийсеңиз ийиң, йөне ондан габа салып яныңыз билен алып гайтмаң. 25Эгер сиз бириниң экин мейданына гирсеңиз, бугдайың дәнесини элиңиз билен йыгсаңыз, йыгың, эмма онуң бугдайына орак салмаң.