Deu 24 | TukCyr16 | STEP | Эгер бир адам бир гыза өйленсе, йөне ондан кемчилик тапандыгы үчин оны халамаса, онда, гой, ол аялының элине талак хатыны язып берсин ве оны өйүнден чыкарып гойберсин.

‏ Deuteronomy 24

1 Эгер бир адам бир гыза өйленсе, йөне ондан кемчилик тапандыгы үчин оны халамаса, онда, гой, ол аялының элине талак хатыны язып берсин ве оны өйүнден чыкарып гойберсин. 2 Ол аял онуң өйүнден гидип, башга бирине дурмуша чыкып билер. 3 Эмма ол аялың икинҗи адамсы хем халаман, онуң элине талак хатыны берип, өйүнден ковса (я-да онуң икинҗи баран адамсы өлсе), 4 ковуп гойберен биринҗи әри онуң харамдыгы үчин, оны икиленч өзүне аял эдип алмага хаклы дәлдир, чүнки бейле этмек Реббе неҗисликдир. Худайыңыз Реббиң сизе мүлк эдип берйән ерини харама чыкармаң.

5 Эгер бир адам тәзе өйленен болса, ол урша гитмесин я-да оңа хич хили җогапкәрчиликли иш табшырылмасын. Ол бир йыл өйүнде галып, өз алан аялы билен шады-хоррамлыкда яшасын.

Гиревлер, адам огурлыгы, ёканч дери кесели хакда

6 Хич кимиң дегирменини я-да дегирмен дашыны гиревине алмаң, чүнки бу онуң дурмушыны гиревине алдыгыңыз болар.

7 Эгер бири башга бир ысрайыллыны огурлап гул этсе я-да оны сатса, ол огурлан адам өлдүрилсин. Шейдип, сиз өз араңыздан пислиги айрып ташлаң.

8 Дери кеселинден гаты әгә болуң. Мениң леви руханыларына буйрушым ялы, оларың сизе өвредйән хер бир задыны үнс билен ерине етириң. 9 Мүсүрден чыкып гайданыңызда, ёлда Худайыңыз Реббиң Меръеми нәдендигини ядыңыза салың.

Карз бермек ве гирев алмак хакда

10 Бирине бир зат карз берсеңиз, өйүне гирип, ондан гирев алмаң. 11 Карз алан адамың өзи сизе гирев гетирйәнчә, дашарда отурың. 12 Эгер ол адам гарып болса, онуң гиревине берйән донунда ятмаң. 13 Онуң гиревини Гүн батманка ызына элтип бериң, шонда ол өз донунда ятар ве сизе алкыш айдар. Шейле хем бу Худайыңыз Реббиң хузурында саңа догрулык сайылар. 14 Исле ол өз ысрайыл доганыңыз болсун, исле юрдуңдакы галаларда яшаян гелмишек, гараз, гарып ве мәтәч гүнлүкчиниң ишлән хакыны тутуп галмаң. 15 Хер гүн сиз оларың хакыны Гүн яшманка төлемелисиңиз. Себәби олар гарып ве оларың гүн-гүзераны шоңа баглыдыр. Ёгсам олар сизиң гаршыңыза Реббе налыш билен йүз тутарлар ве сиз гүнә газанарсыңыз.

Адалатлылык хакында

16 Аталар огуллары үчин өлүме хөкүм эдилмесин. Огуллар хем аталары үчин өлүме хөкүм эдилмесин. Хер ким диңе өз эден җенаятына гөрә өлүме хөкүм эдилсин. 17 Гелмишеге я-да етиме хөкүм эдиленде, эгрилик этмәң. Дулуң гейимини гиревине алмаң. 18 Өзүңизиң хем Мүсүрде гул боландыгыңызы ве Худайыңыз Реббиң сизи ол ерден азат эдендигини ядыңыздан чыкармаң. Шонуң үчин мен сизе шейле этмеги буюрярын.

Хасыл йыгнамак хакында

19 Сиз мейданда хасылыңызы йыгнаныңызда, ол ерде ядыңыздан чыкарып галдыран дессәңизи гетирмек үчин, ызыңыза гайтмаң. Ол гелмишеге, етим-есире ве дула галсын. Шонда Худайыңыз Реб сизиң әхли ишлериңизе берекет берер. 20 Сиз зейтун агаҗыңызың мивесини каканыңызда, онуң галан-гачаныны чөплемәң. Олар гелмишеге, етим-есире, дула галсын. 21 Үзүм багларыңызың үзүмини йыганыңызда, галан-гачаныны йыгмаң. Олары гелмишек үчин, етим-есир үчин ве дул аял үчин галдырың. 22 Өзүңизиң хем Мүсүрде гул боландыгыңызы ядыңызда саклаң. Шонуң үчин мен сизе шейле этмеги буюрярын.