Deu 30 | TukCyr16 | STEP | Мен сизиң өңүңизде алкышлар ве нәлетлер гойдум. Олар сизиң башыңыза дүшенде, сиз Худайыңыз Реббиң сизи даргадып гойберен миллетлериниң арасындакаңыз, бу ялканышлары ве нәлетлери ядыңыза салсаңыз

‏ Deuteronomy 30

Тәзеден дикелтме ве ялканыш

1 Мен сизиң өңүңизде алкышлар ве нәлетлер гойдум. Олар сизиң башыңыза дүшенде, сиз Худайыңыз Реббиң сизи даргадып гойберен миллетлериниң арасындакаңыз, бу ялканышлары ве нәлетлери ядыңыза салсаңыз 2 ве Худайыңыз Реббе доланып, мениң бу гүнки сизе табшырышым ялы, өзүңиз хем, чагаларыңыз хем тутуш йүрегиңиз билен җан-тенден Оңа гулак ассаңыз, 3 диңе шонда Худайыңыз Реб сизе өңки абаданчылыгыңызы гайтарып берер ве рехим-шепагат эдер. Худайыңыз Реб сизи даргадып гойберен башга халкларының ичинден ене-де ызыңыза йыгнар. 4 Хатда сиз дүнйәниң ол четине сүргүн эдилен хем болсаңыз, Худайыңыз Реб сизи ол ерден йыгнап, ызыңыза гетирер. 5 Худайыңыз Реб сизи ата-бабаларыңызың мүлк ерине элтер. Сиз ол ери эеләрсиңиз. Ол ата-бабаларыңыза гаранда, сизе хас көп берекет берип, саныңызы хас-да артдырар. 6 Худайыңыз Реб Өзүне боюн эгдирмек үчин сизиң йүрегиңизи ве несиллериңизиң йүрегини үйтгедер, шонда сиз Худайыңыз Ребби тутуш йүрегиңиз билен җан-тенден сөйүп яшарсыңыз. 7 Худайыңыз Реб бу әхли лагнатлары душманларыңыза ве сизе зулум эден гаршыдашларыңызың үстүне ягдырар. 8 Шондан соң сиз ене-де Реббе гулак асарсыңыз, Онуң бу гүнки мениң үстүм билен берйән әхли буйрукларыны ерине етирерсиңиз. 9 – 10 Эгер сиз Худайыңыз Реббе гулак асып, шу Канун китабында язылан Онуң табшырыкларыдыр парзларыны берҗай этсеңиз, Худайыңыз Реббе тутуш йүрегиңиз ве җаныңыз-тениңиз билен долансаңыз, Худайыңыз Реб хер бир этҗек ишиңизе берекет берер, огул-гызыңыз көп болар, мал-гараларыңызың саны артып, ериңизиң хасылы бол болар. Чүнки Реб ата-бабаларыңыза ягшылык эденинде леззет алшы ялы, сизе ягшылык эденинде хем леззет алар.

Яшайшы сайламага чагырыш

11 Хакыкатдан-да, Онуң бу гүнки мениң үстүм билен берйән буйругы сизиң үчин кын дәл я-да эл етмез ялы гаты узакда дәл. 12 „Биз оны эшидип, ерине етирер ялы, ким бизиң үчин гөге чыкып, оны бизе гетирип берер?“диймезлигиңиз үчин, ол гөкде дәлдир. 13 Я-да сизиң: „Биз оны эшидип, ерине етирер ялы, ким бизиң үчин деңзиң аңры тарапына гечип, оны бизе гетирип берер?“диймезлигиңиз үчин, ол деңзиң аңырсында дәлдир. 14 Ёк, бу сөзлер сизе җуда якындыр. Ерине етирмегиңиз үчин бу сизиң агзыңызда ве йүрегиңиздедир. 15 Ине, бу гүн мен сизиң өңүңизде яшайыш ве ягшылык, өлүм ве яманлык гойярын. 16 Мениң бу гүн табшырышым ялы, Худайыңыз Ребби сөйүп, Онуң ёлундан йөресеңиз, Онуң табшырыкларыны, парзларыдыр хөкүмлерини берҗай этсеңиз, онда сиз яшарсыңыз ве көпелерсиңиз. Мүлк эдинмек үчин баран ериңизде Худайыңыз Реб сизи ялкар. 17 Эмма йүрегиңиз Ондан дөнүп, гулак асман ёлдан чыкып, башга худайлара сыгынып гуллук этсеңиз, 18 онда тутушлайын хеләк болҗакдыгыңызы бу гүн сизе җар эдйәрин. Иордан дерясындан гечип, мүлк эдинҗек ериңизде узак яшамарсыңыз. 19 Бу гүн сизиң өңүңизде яшайыш ве өлүм, алкыш ве нәлет гояндыгыма сизе гаршы шаят болмага асманы ве ери чагырярын. Яшайшы сайлаң, шонда сизиң өзүңиз хем яшарсыңыз, несиллериңиз-де яшар. 20 Худайыңыз Ребби сөйүң, Оңа гулак асың ве Оңа бил баглаң, чүнки яшайшыңызың ве өмрүңизиң узаклыгы Ондадыр. Бу Реббиң ата-бабаларыңыз Ыбрайыма, Ысхага, Якуба бермеги вада эден юрдунда яшамагыңыз үчиндир».