Deu 13 | TukCyr16 | STEP | Эгер араңыздан пыгамберлер я-да дүйш ёруҗылар пейда болуп, аламат я-да мугҗыза гөркезселер,

‏ Deuteronomy 13

1 Эгер араңыздан пыгамберлер я-да дүйш ёруҗылар пейда болуп, аламат я-да мугҗыза гөркезселер, 2 ол аламат я-да мугҗыза ерине дүшсе ве олар сизе: „Гелиң, кесеки худайларың ызына эерелиң, олара сыгынып гуллук эделиң“дийселер, 3 сиз ол пыгамберлериң я-да дүйш ёруҗыларың гепине гулак асмаң. Чүнки Худайыңыз Реб, хакыкатдан хем, Өзүни тутуш йүрегиңиз билен җан-тенден сөййәндигиңизи я-да сөймейәндигиңизи билмек үчин сизи сынап гөрйәр. 4 Худайыңыз Реббиң ызына эериң, диңе Ондан горкуң, Онуң буйрукларыны ерине етириң, Оңа гулак асың, гуллук эдиң, Оңа бил баглаң. 5 Сизи Мүсүрден чыкарып гетирен, гулчулыкдан азат эден Худайыңыз Реббе дөнүклик эдип сөзләндиги үчин ве Худайыңыз Реббиң буйран ёлундан чыкандыгы үчин, шол пыгамбери я-да дүйш ёруҗыны өлүме хөкүм эдиң. Шейдип, сиз өз араңыздан пислиги айрып ташлаң.

6 – 7 Эгер кимде-ким, хатда өз эркек доганыңыз, эҗеңизиң оглы я-да өз огул-гызыңыз, сөйгүли аялыңыз, иң якын достуңыз: „Гелиң, гидип, башга худайлара гуллук эделиң“дийип, не өзүңизиң, не-де ата-бабаларыңызың танаян худайларына, ериң бу уҗундан ол уҗуна ченли болан, даш-төверегиңиздәки сизе якын я-да узакда ерлешйән халкларың худайларына гизлинликде сизи алдап ырмакчы болсалар, 8 сиз бейле адамлар билен разылашмаң, олара гулак асмаң. Олара гечиримлилик этмәң я-да рехимиңиз инип, олары горамаң. 9 Гайтам, олары хөкман өлдүриң. Олары илки өз элиңиз билен дашлаң, соңра бүтин халк җезаландырсын. 10 Гул болуп яшан юрдуңыз Мүсүрден чыкарып гетирен Худайыңыз Ребден йүз өвүртмәге сынанышандыклары үчин, олары дашлап өлдүриң. 11 Соңра әхли ысрайыллар муны эшидип горкарлар ве гайдып мунуң ялы пислик этмезлер.

12 Худайыңыз Реббиң сизе яшамага берҗек галаларының биринде араңыздан эрбет адамлар чыкып, 13 галаның яшайҗыларыны танамаян худайларына гуллук этмәге чагырып, олары ёлдан чыкармакда баш боландыкларыны эшитсеңиз, 14 ызарлап дерңәң ве говы сораг-идег эдиң. Эгер гүнәкәрленме догры тапылып, бу неҗис иш араңызда эдилен болса, 15 галаның яшайҗыларыны гылычдан гечириң. Ондакы әхли затлары бүтинлей ёк эдиң, хатда мал-гараларыны-да гырың. 16 Ондан алнан әхли олҗаны мейданчада бир ере йыгнаң. Соңра галаны ве ондан алнан әхли олҗаны Худайыңыз Реббе башбитин якма гурбанлыгы хөкмүнде ода якың. Ол ер хемишелик харабачылыга өврүлсин, хич хачан тәзеден гурулмасын. 17 – 18 Реббе айры гойландыгы үчин якылмалы затларың хич бири элиңде болмасын. Шонда Реб гахар-газабындан көшешип, сизе рехимдарлык эдер. Эгер сиз Худайыңыз Реббиң сөзүне гулак асып, Онуң назарында догры ишлери этсеңиз ве Онуң бу гүнки мениң үстүм билен берйән әхли буйрукларыны ыхлас билен ерине етирсеңиз, онда Ол ата-бабаларыңыза сөз берши ялы, Өзүниң рехимдарлыгы билен сизи көпелтҗекдир.