Deuteronomy 15
Единҗи йыл
(Левилер 25:1-7)
1Хер единҗи йылың ахырында өзүңизден алнан карзлары гечиң. 2Карзларыңызы өтмегиң ёлы шейледир: хер бир ысрайыллы өз ысрайыл доганының карзыны гечсин. Ондан карзыны бермеги талап этмесин, чүнки карз гечмеклиги Реббиң Өзи ыглан этди. 3Кесеки юртлудан карзыңы сорап билерсиң, эмма өз ысрайыллыңың карзыны геч. 4– 5Диңе Худайыңыз Реббе гулак асып, Онуң бу гүнки мениң үстүм билен берйән әхли буйрукларыны ыхлас билен ерине етирсеңиз, Худайыңыз Реб мүлк эдип берҗек еринде сизе берекет берер. Сизиң араңызда мәтәч болмасын. 6Худайыңыз Реб сөз берши ялы, сизе берекет беренде, көп халклара карз берерсиңиз, эмма өзүңиз карз алмарсыңыз. Көп халкларың үстүнден сиз хөкүмдарлык сүрерсиңиз, эмма олар сизиң үстүңизден хөкүмдарлык сүрмезлер. 7Худайыңыз Реббиң сизе берҗек ериндәки галаларда ысрайыл доганыңызың бири мәтәчлик чексе, доңйүрек болмаң, зада мәтәч доганыңыз үчин элиңизде барыны аямаң. 8Онуң үчин элиңизи ачың, оңа нәме герек болса етерликче карз бериң. 9Сересап болуң, калбыңызда эрбет пикир болмасын. Сиз: „Единҗи йыл – карз гечиш йылы голай“дийип, ачгөзлүк эдип, мәтәч ысрайыл доганыңыза хич зат бермән гоймаң. Ёгсам, доганыңыз сизиң гаршыңыза Реббе дады-перят эдер ве сиз языклы боларсыңыз. 10Сиз карз берениңизде, элиңиз хем, гөвнүңиз хем ачык болсун, чүнки Худайыңыз Реб шонуң хасабына сизиң әхли ишлериңизе ве хер бир башлан ишиңизе берекет берер. 11Ер йүзүнде хемише етер-етмезлер болар. Шонуң үчин хем, мен сизе: „Ерлериңизде яшаян гарыплара ве мәтәч ысрайыл доганларыңыза элиңиз гиңден ачык болсун“диййәрин.Еврей гуллары хакда
(Мүсүрден чыкыш 21:1-11)
12Эгер өз еврей, ягны ысрайыл доганларыңыздан гул я-да гырнак сизе сатылса, олар сизе алты йыллап хызмат эдер. Единҗи йыл сиз оны азатлыга гойбермелисиңиз. 13Гулуңызы азатлыга гойберениңизде, сиз оны эли бош гойбермели дәлсиңиз. 14Сүрүлериңизден, харманыңыздан ве шерабыңыздан оңа җомартлык билен бериң, шейле хем Худайыңыз Реббиң берекет эчилип, сизе берен затларындан оңа совгатлар бериң. 15Мүсүрде өзүңизиң хем гул боландыгыңызы ве Худайыңыз Реббиң сизи ол ерден азат эдендигини ядыңыза салың. Шол себәпли бу гүн мен сизе бу буйругы берйәндирин. 16Эмма гул: „Мен азатлыга чыкҗак дәл, себәби мен сени ве хоҗалыгыңы сөййәрин ве гүн-гүзераным хем говы“дийсе, 17бир темен алып, онуң гулагыны гапа дирәп дешиң. Соңра ол сизиң хемишелик гулуңыз болар. Гырнагыңызы хем шейле эдиң. 18Гулларыңызы азатлыга гойберениңизде гынанмаң, себәби олар алты йылың ичинде гүнлүкчилик үчин алнан бахадан ики эссе артык хызмат этдилер. Шонда Худайыңыз Реб сизиң әхли ишлериңизе берекет берер.Илкинҗи доглан эркек маллар
19Мал-гаралардыр доварларыңызың илкинҗи гузлан эркегини Худайыңыз Реб үчин айрып гоюң. Сыгрыңызың илкинҗи гөлелән өкүзчесине иш этдирмәң, доварыңызың илкинҗи гузлан гочуны гыркмаң. 20Сиз хоҗалыгыңыз билен биле олары хер йыл Худайыңыз Реббиң хузурында, Онуң сайлаҗак еринде иерсиңиз. 21Бу малларың бири шикесли болса, ягны агсак я-да көр болуп, шикеси улы болса, оны Худайыңыз Реббе гурбан этмәң. 22Кейиги я-да сугуны ийишлери ялы, оны яшаян ериңиздәки харам адам хем, тәмиз адам хем ийиберсин. 23Йөне сиз малы ганы билен иймели дәлсиңиз. Ганы сув дөкен ялы эдип, ере дөкүң.
Copyright information for
TukCyr16