Deu 18 | TukCyr16 | STEP | Леви руханылары, тутуш леви тиреси ысрайыллар билен бирликде ер пай я-да мүлк алмазлар. Олар Реббиң пайы дийлип берилйән гурбанлыклардан ийип билерлер.

‏ Deuteronomy 18

Леви руханыларының пайы

1 Леви руханылары, тутуш леви тиреси ысрайыллар билен бирликде ер пай я-да мүлк алмазлар. Олар Реббиң пайы дийлип берилйән гурбанлыклардан ийип билерлер. 2 Халкың бейлеки тирелериниңки ялы, ысрайыл доганларының арасында оларың мүлки ёкдур. Сөз берши ялы, Реббиң Өзи оларың мүлкүдир. 3 Халк өкүзини я-да гойнуны Реббе гурбан этмек үчин гетиренде, олардан руханылара шулар дегишлидир: малың бир өң аягы, ики әңи ве гарны. 4 Илкинҗи дәне хасылыңызы, илкинҗи тәзе шерабы ве зейтун ягыны, шейле хем, гойнуңызың илкинҗи гыркымыны рухана бермелисиңиз. 5 Чүнки Худайыңыз Реб Өз адындан халка хызмат этмек үчин, әхли тирелериңизиң ичинден Левини ве онуң огулларыны хемишелик руханы эдип сайлады. 6 Эгер леви тиресинден бири Ысрайылда өз яшаян галасыны ташлап, Реббиң сайлаҗак ерине барса (ол ислән вагты барып билйәр), 7 ол ерде Реббиң хузурында дуруп хызмат эдйән әхли леви доганлары ялы, Худайы Реббиң адындан хызмат этсин. 8 Өй гошларыны сатып алан гирдеҗисине гарамаздан, онуң иймәге дең пайы бардыр.

Неҗис адатлара гаршы дуйдурыш

9 Худайыңыз Реббиң өзүңизе берҗек юрдуна бараныңызда, ол халкларың неҗис адатларыны берҗай этмеги өвренмәң. 10 Сизиң араңызда хич ким оглуны я-да гызыны ода якып, гурбанлык бермесин. Палчылык этмәң, мүнечҗим я-да билгич болмаң, җадыгөйлик этмәң. 11 Шейле хем, хич бириңиз гөзбагчылык эдип, арвах-җынлар я-да рухлар билен маслахатлашмаң, я-да чөзгүдиң җогабыны өлүлерден гөзлемәң. 12 Чүнки бу ишлери эдйәнлер Реб үчин неҗисдир. Ине, шу неҗис ишлери үчин Худайыңыз Реб олары сизиң өңүңизден ковуп чыкаряр. 13 Худайыңыз Реббиң өңүнде кәмил болуң. 14 Сизиң ковуп чыкарҗак бу халкларыңыз мүнечҗимлере ве палчылара гулак асярлар. Худайыңыз Реб болса, сизе бейле этмәге ругсат бермейәр.

Муса ялы пыгамбер

15 Худайыңыз Реб сизиң үчин өз халкыңызың арасындан мениң ялы пыгамбер чыкарар. Сиз шол пыгамбере гулак асың. 16 Хореп ^{▼▼Хореп – бу Синай дагының бейлеки ады.} дагында үйшен гүнүңиз, сиз Худайыңыз Ребден хайыш эдип: „Худайымыз Реббиң сесини мундан артык эшитмәли ве бу бейик оды инди гөрмәли, ёгсам биз өлерис“дийипдиңиз. 17 Реб маңа: „Оларың айдянлары догры. 18 Мен олар үчин өз халкының арасындан сениң ялы пыгамбер чыкарарын. Мениң буйран затларымың әхлисини халка айдар ялы, Мен сөзлерими пыгамбериң агзына салып берерин. 19 Кимде-ким Мениң адымдан сөзлейән пыгамбериң сөзлерине гулак асмаса, ол адам билен Мениң Өзүм хасаплашарын. 20 Эмма башга худайларың адындан сөзлейән пыгамбер я-да Мениң буюрмадык задымы, хыянатчылык эдип, Мениң адымдан сөзлейән пыгамбер өлүме хөкүм эдилер“дийди. 21 Сиз өз-өзүңизе: „Биз Реббиң айтмадык сөзүни нәдип билели?“диерсиңиз. 22 Эгер бир пыгамбер Реббиң адындан сөзлән болса, ол иш хем баша бармаса я-да хакыката өврүлмесе, ол сөз Ребден дәлдир. Оны пыгамбериң өзи тослап тапандыр, сиз ол пыгамберден горкмаң.