Deu 21 | TukCyr16 | STEP | Худайыңыз Реббиң сизе мүлк эдип берйән юрдунда ким тарапындан өлдүрилендиги нәбелли бир җесет мейданда тапылса,

‏ Deuteronomy 21

Нәбелли ганхор тарапындан өлдүриленлер хакында

1 Худайыңыз Реббиң сизе мүлк эдип берйән юрдунда ким тарапындан өлдүрилендиги нәбелли бир җесет мейданда тапылса, 2 яшулуларыңыз ве казыларыңыз гидип, җеседиң голайындакы галалара ченли болан аралыгы өлчесинлер. 3 Җеседиң голайындакы галаның яшулулары өң хич ишде уланылмадык, бойнуна боюнтырык салынмадык бир яшар гөләни алсынлар. 4 Яшулулар бу гөләни хениз сүрүлмедик ве экилмедик ере – акар сувуң боюна гетирип, онуң бойнуны омурсынлар. 5 Соңра руханылар, ягны Левиниң огуллары гелсинлер, чүнки Худайыңыз Реб Өзүне хызмат эдер ялы ве Өз адындан халка пата берер ялы, олары руханы эдип сайлады. Әхли урушлары ве давалары олар чөзйәрлер. 6 Җеседиң иң голайындакы галаның әхли яшулулары акар сувуң боюнда бойны омрулан яш гөләниң үстүнде эллерини ювсунлар. 7 Соңра олар шейле сөзлери җар чексинлер: „Бу гана бизиң элимиз булашмады, кимиң эденини-де гөзүмиз билен гөрмедик. 8 Я Реб, Өз азат эден халкыңы – ысрайыллары багышла. Нәхак дөкүлен ганың гүнәсини Өз халкың Ысрайылың арасында галдырма“. Шонда олар шол ганың гүнәсинден бошарлар. 9 Шейдип, нәхак дөкүлен ганың гүнәсини өз араңыздан айрып, Реббиң назарында догры ишлери эдерсиңиз.

Есир дүшен аяла өйленмек хакда

10 Душманларыңыза гаршы урша чыканыңызда, Худайыңыз Реб олары сизиң элиңизе берсе, сиз хем олары есир алсаңыз 11 ве есирлериң арасындан бир овадан аяла гөвнүңиз гидип, оңа өйленмекчи болсаңыз, 12 оны өйүңизе алып гелиң. Ол аял сачыны сырсын ве дырнакларыны алсын. 13 Эгниндәки есирлик гейимлерини чыкарып, сениң өйүңде тутуш бир ай отурып, эне-атасының ясыны тутсун. Шондан соң сен онуң янына гирип, онуң адамсы боларсың, ол хем сениң аялың болар. 14 Эмма соңрак оны халамасаң, сен ол аялы бошатмалысың. Сен онуң намысына дегендигиң үчин, оны гырнак хөкмүнде сатмалы дәлсиң.

Новбахар оглуң пайы

15 Бир адамың ики аялы болуп, бирини халап, бейлекисини халамаян болса, оларың икиси-де оңа огул догруп берсе ве халамаян аялының оглы онуң новбахар оглы болса, 16 бир гүн эмләгини огулларына пайланда, ол халамаян аялындан болан новбахар оглуның пайыны халаян аялының оглуна бермесин. 17 Ол халамаян аялының оглуны новбахар огулдыгыны боюн алып, оңа әхли задындан ики эссе пай бермелидир, чүнки ол огул онуң җуванлык чагының илкинҗи мивесидир. Илкинҗи огуллык хакы онуңкы болмалыдыр.

Боюн эгмезек огул

18 Эгер бириниң хөтҗет, боюн эгмезек, ата-энесине гулак асмаян, оларың тербиесини алмаян оглы бар болса, 19 ата-энеси оны тутуп, шол ердәки галаның дервезесиниң голайына, яшулуларың янына гетирсин. 20 Олар галаның яшулуларына: „Бизиң бу оглумыз дикдүшди ве гыңыр. Ол бизе боюн эгенок. Ол ачгөз хем ичеген“дийсинлер. 21 Соңра галаның әхли эркеклери оны дашлап өлдүрсинлер. Шейдип, сиз өз араңыздан пислиги айрып ташлаң. Әхли ысрайыллар муны эшидип горкарлар.

Җенаятчының җеседи

22 Эгер бири җенаят эдип, өлүм җезасына хөкүм эдилсе ве сиз оны агачдан асып өлдүрсеңиз, 23 онуң җеседини агачдан узак гиҗе асып гоймаң. Сиз оны хөкман шол гүн җайламалысыңыз, чүнки агачдан асылан адам Худай тарапындан нәлетленендир. Худайыңыз Реббиң сизе мүлк эдип берйән ерини харама чыкармаң.