Ecc 11 | TukCyr16 | STEP | Наны сува ат, бирнәче гүнден ене оны тапарсың.

‏ Ecclesiastes 11

Зәхметиң мөхүмлиги

1 Наны сува ат, бирнәче гүнден ене оны тапарсың. 2 Эмләгиңи еди, хатда секиз кишә пайла, чүнки сен бу дүнйәде нәхили бетбагтчылыгың болҗакдыгыны билйән дәлсиң. 3 Гара булут ягыш ягдыряндыр. Гүнорта я демиргазыга тарап йыкылан агач йыкылан еринде галар. 4 Еле середйән экин экмез; булутлара бакян орак ормаз.

5 Елиң ёлуны ве гөврели энәниң гөвресиндәки чага нәдип җан гирйәнини билмейшиң ялы, сен хемме зады ярадан Худайың ишлерини-де билйән дәлсиң.

6 Тохумыңы ирден сеп, агшам-да элиң бош дурмасын. Чүнки сен хайсы ишиң бәхбитли болҗакдыгыны билйән дәлсиң.

Җуванлара маслахат

7 Ышык гөзелдир. Гүни гөрмек гөзлере хош якяндыр. 8 Узак йыллап яшаянлар хем хер бир яшан гүне шатлансынлар, йөне көп гараңкы гүнлериң болҗакдыгыны-да унутмасынлар. Бар болян зат бидерекдир.

9 Эй, яш йигит, яшлыгыңда шатлан; гой, йүрегиң сени җуван гүнлериңде бегендирсин. Йүрегиң исләни билен, гөзлериң гөрени билен гит. Эмма билип гой, буларың хеммеси үчин Худай саңа казылык эдер. 10 Гайгыны йүрегиңден чыкар, азабы бедениңден дашлашдыр, чүнки яшлык-да, җуванлык-да гысга вагтлыкдыр.