Eph 1 | TukCyr16 | STEP | Худайың ырадасы билен Иса Месихиң ресулы болан мен Павлусдан Эфесдәки Худайың халкына, ягны Иса Месихе иман эдйәнлере догайы салам!

‏ Ephesians 1

1 Худайың ырадасы билен Иса Месихиң ресулы болан мен Павлусдан Эфесдәки Худайың халкына, ягны Иса Месихе иман эдйәнлере догайы салам!

2 Атамыз Худайың ве Реббимиз Иса Месихиң мерхемети, парахатлыгы, гой, сизе яр болсун!

Месихден алян рухы ялканышларымыз

3 Реббимиз Иса Месихиң Атасы Худая өвгүлер болсун! Ол Месих аркалы бизи гөкдәки рухы ялканышларың әхлиси билен ялкады. 4 Өз хузурында мукаддес ве мүйнсүз болмагымыз үчин, бири-биримизи сөйүп, Иса Месихе дегишли болмагымыз үчин, Худай бизи дүнйә ярадылмаздан өң сайлап-сечди. 5 Ол Иса Месих аркалы бизи огуллыга алмак барада овалдан карара гелипди. Бу Онуң гөвнүне ярап, ырадасы билен болды. 6 Сөвер Оглы аркалы бизе болдан-бол эчилен шөхратлы мерхемети үчин Худая өвгүлер болсун! 7 Худай чуңңур бай мерхемети билен Оглуның дөкен ганы аркалы гүнәлеримизи багышлап, бизи азат этди. 8 Шейле хем, бу мерхемети аркалы Ол бизи тутуш акылдарлыгы ве дүшүнҗеси билен гуршап алды.

9 Худай илкибашдан Месихде амала ашыран ягшы ниетлери аркалы Өз ислегиниң сырыны бизе аян этди 10 Бу ниетиң амала ашырылмалы вагты геленде, Худай ердәки ве гөкдәки әхли затлары бир Баша, ягны Иса Месихе бирикдирер. 11 – 12 Хемме зады Өз ислегине лайыклыкда ерине етирйән Худай Өз ниетине гөрә бизи өңден белләп, Месих аркалы сайлап-сечди. Ол муны бизиң, ягны Иса Месихе илкинҗи болуп иман эденлериң Худайың шан-шөхратыны арша гөтермегимиз үчин амал этди. 13 Инди сиз хем хакыкат сөзүни, ягны халас болмак барадакы Хош Хабары эшидип, Месихе иман этдиңиз. Шоңа гөрә-де Худайың вада берен Мукаддес Рухы билен мөхүрлендиңиз. 14 Худая дегишли адамлар долы азат болянча, Мукаддес Рух бизиң мирасымызың кепилнамасыдыр. Буларың бары Худая шан-шөхрат гетирйәр.

15 – 16 Шоңа гөрә Реб Иса болан иманыңызы ве Худайың әхли халкына болан сөйгиңизи эшиделим бәри, сизиң үчин Худая дынгысыз шүкүр эдип, дога-дилеглеримде сизи дилимден дүшүремок. 17 Мен Худай – Реббимиз Иса Месихиң бейик Атасына сизиң үчин дилег эдйәрин. Гой, Ол сизе Оны хас оңат танап билмегиңиз үчин, сизе Мукаддес Рухуң акылдарлыгыны хем ылхамыны берсин. 18 – 19 – 20 Худайың Өз чагыранларына берен умыдына, халкына эчилен шөхратлы мирасының байлыгына ве биз иман эденлере гөркезен деңсиз-тайсыз гудратына гөз етирмегиңиз үчин, гой, Ол йүрегиңизиң гатыны нурландырсын дийип дилег эдйәрин. Бу гудрат Худайың Месихи дирелдип, гөкде Өз сагында отурдан гүйҗүне меңзешдир. 21 Худай Месихи әхли хөкүмдарлыкдан, ыгтыярлыкдан, гүйч-гудратдан ве агалыкдан, шейле хем диңе бу дөвүрде дәл, эйсем гелҗек дөвүрде-де тутулҗак хер бир атдан хас ёкары гойды. 22 Худай хемме зады Онуң аякларының астына табын эдип, иманлылар йыгнагының бәхбиди үчин Оны әхли зада баш этди. 23 Иманлылар йыгнагы Месихиң беденидир. Ол әхли зады Өзүнде җемлейән Месих билен долдурыландыр.