Eph 3 | TukCyr16 | STEP | Шу себәпли Иса Месихиң угрунда туссаглыкда отуран мен-Павлус сиз яхуды дәллер үчин Худая дилег эдйәрин.

‏ Ephesians 3

Павлуса аян болан сыр

1 Шу себәпли Иса Месихиң угрунда туссаглыкда отуран мен-Павлус сиз яхуды дәллер үчин Худая дилег эдйәрин. 2 Өз мерхеметини сиз яхуды дәллере етирмек үчин, Худайың маңа айратын табшырык берендигини, элбетде, эшиденсиңиз. 3 Сизе өң гысгача язышым ялы, Худай маңа Өз сырыны аян этди. 4 Хатымы оканыңызда, Месихиң бу сырына мениң нәдереҗеде дүшүнйәндигими аңарсыңыз. 5 Худай бу сыры өңки несиллере аян этмән, эйсем хәзир Мукаддес Рух аркалы Өз мукаддес ресулларына, пыгамберлерине әшгәр этди. 6 Ине, Худайың сыры шудур: Хош Хабары кабул эдйән яхуды дәллер хем яхудылара берлен ялканыш вадасына, бир бедене, бир мираса дең дереҗеде шәрикдирлер. Себәби оларың хеммеси Иса Месихе дегишлидир.

7 Мен Худайың бейик гудраты ве пешгеш берен мерхемети аркалы Хош Хабарың хызматчысы болдум. 8 Мен Худайың халкының арасында иң әхмиетсизидим, эмма муңа гарамаздан Месихиң акыл етмез байлыгыны яхуды дәллере вагыз этмек җогапкәрчилигини Худай маңа берди. 9 Әхли зады ярадан Худай гечмишден бәри бу сыры Өз хузурында гизлин саклады, бу сырың манысының нәмедигини инди хер бир ынсана әшгәр этмеклик маңа берилди. 10 Өзүниң чуңңур бай акылдарлыгы иманлылар йыгнагы аркалы гөкдәки рухы хөкүмдарлара ве эрк-ыгтыярлылара билдирилсин дийип, Худай шейле этди. 11 Бу Худайың овал-башдан бәри мейилнамасы болуп, оны Реббимиз Иса Месих аркалы амала ашырды. 12 Иса Месих ве Оңа болан иманымыз аркалы биз Худайың хузурына улы ынам ве батыргайлык билен якынлашып билйәрис. 13 Шонуң үчин хем, угруңызда чекйән гайгы-хасратларым себәпли сизиң рухдан дүшмезлигиңизи хайыш эдйәрин. Гайтам, булар сизе шөхрат гетирйәндир.

Павлусың эфеслилер үчин Худая дилеги

14 – 15 Шейлеликде, ерде ве гөкде хер бир миллете ат берен Атамызың ^{▼▼Атамызың – кәбир голязмаларда Реббимиз Иса Месихиң Атасының.} хузурында мен дыза чөкйәрин. 16 Гой, Ол чәксиз шан-шөхраты билен Өз Рухы аркалы сизиң ички барлыгыңызы гудрат билен гүйчлендирсин. 17 – 18 Иса Месих иманыңыз аркалы йүреклериңизде яшасын. Шейле-де, мен сөйгиниң сизде көк уруп орнашмагыны, Месихиң сөйгүсиниң нәхили гиң, узын, белент ве чуңңурдыгына Худайың әхли халкы билен бирликде дүшүнмегиңизи Худайдан дилейәрин. 19 Хава, Худайың кәмиллигинден долуп билериңиз ялы, Месихиң аң-билим етерден үстүн болан бу сөйгүсине акыл етирип билмегиңизи Худайдан дилейәрин.

20 Бизде ишлейән гудратына гөрә, Худай хер бир хайышымыздан, ойланышымыздан хем хас ёкары затлары этмеги башаряндыр. 21 Иманлылар йыгнагы ве Иса Месих аркалы, гой, Худая несиллербойы эбедилик шан-шөхрат болсун! Омын.