Eze 26 | TukCyr16 | STEP | Сүргүнде болян вагтымызың он биринҗи йылының биринҗи айының бирине маңа Реббиң шу сөзи аян болды:

‏ Ezekiel 26

Сур галасына гаршы пыгамберлик

1 Сүргүнде болян вагтымызың он биринҗи йылының биринҗи айының бирине маңа Реббиң шу сөзи аян болды: 2 «Эй, ынсан оглы! Сур галасы Иерусалим хакда: „Бай-бай-ов, халкларың гапысы болан шәхер йыкылды, дервезелери мениң үчин ачылды. Ол вейран болды, инди мен байлыкдан доларын“дийди». 3 Шонуң үчин Хөкмүрован Реб шейле диййәр: «Эй, Сур! Мен саңа гаршыдырын. Деңиз толкунларының ёкары галшы ялы, Мен хем миллетлери сениң гаршыңа аяга галдырарын. 4 Олар Суруң диварларыны вейран эдерлер, онуң диңлерини йыкарлар. Мен онуң топрагыны сырып-сүпүрип, ялаңач гая өврерин. 5 Ол деңиз ортасында тор язылян ер болар. Хөкмүрован Реб: „Муны Мен айтдым“диййәр. Сур галасы миллетлере олҗа болар. 6 Олар Сур галасына гарашлы шәхерлерде яшаянлары гылычдан гечирерлер; онсоң олар Мениң Ребдигими билерлер».

7 Хөкмүрован Реб шейле диййәр: «Ине, Мен патышаларың патышасы болан Бабыл патышасы Небукаднесары атлар, сөвеш арабалары, атлылар, көп халклардан ыбарат әпет гошун билен бирликде демиргазыкдан Сур галасының үстүне гетирерин. 8 Эй, Сур галасы, олар саңа гарашлы шәхерлерде яшаянлары гылычдан гечирерлер, гаршыңа беркитмелер салып, диварыңа чыкмак үчин япгытлар гурарлар ве галканларыны сениң гаршыңа гоярлар. 9 Пүрслер билен диварларыңы оярлар, демир гураллары билен диңлериңи йыкарлар. 10 Атларының көплүгинден яңа сени тозан гапар; диварлары юмрулан бир гала гирилиши ялы, сениң дервезелериңден гиренде атлыларың, тигирлериң ве сөвеш арабаларының сесинден яңа диварларың сарсар. 11 Әхли көчелериңи атларының тойнагы билен басаларлар; халкыңы гылыч билен өлдүрерлер, уллакан сүтүнлериңи ер билен егсан эдерлер. 12 Байлыгыңы талап, мал-мүлкүңи басып аларлар, диварларыңы йыкып, гөзел җайларыңы вейран эдерлер. Дашларыңы, агачларыңы ве топрагыңы деңзе ташларлар. 13 Мен сениң айдымларыңың сесини кесерин, лираларыңың сеси гайдып эшидилмез. 14 Сени ялаңач гая өврерин, тор язылян ер боларсың. Инди сен хич хачан тәзеден беҗерилмерсиң, чүнки Хөкмүрован Реб: „Муны Мен-Реб айтдым“диййәр».

15 Хөкмүрован Реб Сур галасына шейле диййәр: «Йыкылышыңың гүрпүлдисинден, яралыларың иңңилдисинден, башыңдан инен элхенч мергиден кенарлардакы халклар титрешмезми? 16 Шонда деңиз боюндакы әхли хөкүмдарлар тагтларындан дүшүп, донларыны чыкарарлар, кешдели эшиклерини сыпырарлар. Горкы лыбасына гирип, ерде отурарлар ве дынувсыз сандырашып, саңа аңк-таңк боларлар. 17 Соңра олар сен хакда агы айдарлар: „Эй, деңизчилериң яшаян шәхери,
деңизде иң гүйчли мешхур шәхер!
Вах, сен ве сенде яшаянларың
барысы нәхили хеләк болды!
Сен деңзиң якасында
яшаянлара ^{▼▼Деңзиң якасында яшаянлара – я-да онуң әхли илатына.} ховп салдың!“

18 Сениң йыкылан гүнүң кенарлардакы халклар титрешерлер, деңиз кенарындакылар сениң хеләк болшуңа ховсала дүшерлер».

19 Хөкмүрован Реб шейле диййәр: «Сени илатсыз галан шәхерлер ялы харабачылыга өвренимден соң, чуңлугы үстүңе гетирип, көп сувлар билен бүрәнимден соң, 20 сени өлүлер дүнйәсине инйәнлер билен бирликде гадымы халкың янына индерерин. Илатсыз болар ялы, сени өлүлер дүнйәсине инйәнлер билен бирликде ериң тейинде, гадымдан бәри харабачылыга өврүлен ерлерде орнашдырарын; сен гайдып илатлы болмарсың я-да дирилериң яшаян юрдуны эелемерсиң ^{▼▼Дирилериң яшаян юрдуны эелемерсиң – бу җүмле кәбир голязмаларда Мен саңа шөхрат берерин дийип душ гелйәр.}. 21 Мен сени элхенч ховпа дучар эдерин, сен ёк боларсың. Сени гөзләрлер, эмма хич хачан тапмазлар». Муны Хөкмүрован Реб диййәр.