Eze 25 | TukCyr16 | STEP | Маңа Реббиң шу сөзи аян болды:

‏ Ezekiel 25

Аммон юрдуна гаршы пыгамберлик

1 Маңа Реббиң шу сөзи аян болды: 2 «Эй, ынсан оглы! Йүзүңи аммонлара тарап өвүр-де, оларың гаршысына пыгамберлик эт. 3 Хөкмүрован Реббиң сөзүни эшидиң! Хөкмүрован Реб шейле диййәр дий: „Мениң мукаддес өйүми харланларында, Ысрайыл юрдуны вейран эденлеринде ве яхуда халкыны сүргүн эденлеринде, сиз олар барада: ‘Пах-пах! Не аҗап!’ дийшип бегендиңиз. 4 Шонуң үчин, ине, Мен сизи мүлк хөкмүнде гүндогар халкларының элине берерин. Олар дүшелгелерини сизиң араңызда гурарлар, чадырларыны сизде дикерлер, олар сизиң мивелериңизи иерлер, сүйдүңизи ичерлер. 5 Раба галасыны дүелериң өрүсине ве Аммон юрдуны доварларың ятагына өврерин. Онсоң сиз Мениң Ребдигими билерсиңиз“». 6 Хөкмүрован Реб шейле диййәр: «Сиз эллериңизи чарпып, танс этдиңиз, Ысрайыл юрдуна болан йигренҗиңиз билен йүрекден шатландыңыз. 7 Шонуң үчин хем, ине, Мен элими сизиң гаршыңыза узатдым. Сизи миллетлере олҗа эдип берерин. Мен сизи халкларың арасындан согруп зыңарын, юртларың арасындан сүпүрип ташларын, сизи ёк эдерин. Онсоң сиз Мениң Ребдигими билерсиңиз».

Мовап юрдуна гаршы пыгамберлик

8 Хөкмүрован Реб шейле диййәр: «Мовап билен Сегир: „Яхуда халкы хем бейлеки миллетлер ялыдыр“дийдилер. 9 Шонуң үчин Мен Мовабың бир гапдалыны бөвсүп, юрдуң шөхраты болан серхет шәхерлерине Бейтешимода, Багалмегона ве Кирятайыма зарба урарын. 10 Мен Мовабы аммонлар билен бирликде гүндогар халкларының элине мүлк эдип берерин. Шейдип, аммонлар миллетлер арасында хич хачан ятланылмаз. 11 Моваба хөкүмлер чыкарарын, шонда олар Мениң Ребдигими билерлер».

Эдом юрдуна гаршы пыгамберлик

12 Хөкмүрован Реб шейле диййәр: «Эдом өч алмак билен яхуда халкының гаршысына херекет этди, олардан өч алып, агыр гүнә батды. 13 Шонуң үчин Хөкмүрован Реб шейле диййәр: „Мен элими Эдомың гаршысына узадып, ондан ынсаны-да, хайваны-да согруп ташларын ве оны харабачылыга өврерин. Олар Теймандан Дедана ченли аралыкда гылычдан хеләк боларлар. 14 Мен Эдомдан халкым Ысрайылың эли билен өч аларын. Олар Эдомда Мениң гахар-газабым боюнча херекет эдерлер, онсоң олар Мениң өҗүмиң нәмедигини билерлер“». Муны Хөкмүрован Реб айдяндыр.

Пилиштлилере гаршы пыгамберлик

15 Хөкмүрован Реб шейле диййәр: «Эбеди душманчылыгы болан пилиштлилер яхудалардан ар алдылар, йүреклериндәки йигренч зерарлы олары ер билен егсан эдип өч алдылар. 16 Мунуң үчин Хөкмүрован Реб шейле диййәр: „Ине, Мен элими пилиштлилериң гаршысына узадып, олардан керетлилери согруп ташларын, деңиз якасында галанларыны ёк эдерин. 17 Газаплы җезалар билен олардан агыр өч аларын. Шонда олар Мениң Ребдигими билерлер“».