Ezr 7 | TukCyr16 | STEP

‏ Ezra 7

Эзра Иерусалиме гелйәр

1 – 2 – 3 – 4 – 5 – 6 Бу вакалардан соң Парс патышасы Артаксерксиң дөврүнде Эзра Бабылдан чыкды. Ол Сераяның оглуды. Серая Азаряның, Азаря Хилкияның, Хилкия Шаллумың, Шаллум Садогның, Сагдок Ахытубың, Ахытуп Амаряның, Амаря Азаряның, Азаря Мераёдың, Мераёт Зерахяның, Зерахя Узының, Узыны Букының, Букы Абышуваң, Абышува Пинехасың, Пинехас Элгазарың, Элгазар баш руханы Харуның оглуды. Ол Ысрайыл Худайы Реббиң Муса берен канунындан оңат баш чыкарян, өкде мүрзеди. Патыша оңа соран затларының хеммесини берди, чүнки Худайы Реб оны голдаярды. 7 Артаксеркс патышаның патышалыгының единҗи йылында ысрайыл халкының бир бөлеги, бирнәче руханылардыр левилер, ыбадатхана айдымчыларыдыр дервезебанлары ве хызматкәрлери Иерусалиме гайтдылар. 8 Эзра Артаксерксиң патышалыгының единҗи йылының бәшинҗи айында Иерусалиме гелди. 9 Эзра биринҗи айың биринҗи гүни Бабылдан чыкып гайдыпды. Худайының ялкамагы билен ол бәшинҗи айың биринҗи гүни Иерусалиме гелди. 10 Эзра Реббиң кануныны өвренип, оны берҗай этмеги, Ысрайылда онуң парзларыны, хөкүмлерини өвретмеги йүрегине дүвүпди.

Артаксеркс патышаның Эзра берен хаты

11 Артаксеркс патышаның Реббиң табшырыкларындан ве Онуң ысрайыл халкына берен парзларындан оңат баш чыкарян руханысы, Эзра мүрзә язан хатының нусгасы шейледир:

12 «Шаларың шасы Артаксерксден Гөгүң Худайының канунларыны язян Эзра рухана догайы салам!

13 Мен юрдумдакы ысрайыл халкындан я оларың руханыларындан, я-да левилерден өз мейли билен Иерусалиме гитмек ислейән хер бир адама ругсат берилсин дийип буюрярын. 14 Сен патыша ве онуң еди геңешчиси тарапындан Яхудада ве Иерусалимде элиңдәки Худайың канунының нәхили ерине етирилйәндигини барламак үчин, 15 патыша ве онуң геңешчилериниң Иерусалимде месген тутян Ысрайыл Худайына мейлетин берен алтындыр күмшүни әкитмек үчин, 16 бүтин Бабыл велаятындан тапҗак алтындыр күмшүңи ве өз Худайларының Иерусалимдәки өйи үчин руханыларың, халкың берен мейлетин садакаларыны алып гитмек үчин иберилйәрсиң. 17 Бу пуллар сересаплылык билен уланылып, оңа өкүзлер, гочлардыр гузулар, галла ве ичги садакалары сатын алнып, олар Худайыңызың Иерусалимдәки өйүниң гурбанлык сыпасында садака берилсин.
18 Галан алтындыр күмши өз доганларың билен Худайыңызың ислегине гөрә, нәме гөвнүңизе җай болса, шоңа уланып билерсиңиз. 19 Худайың өйүниң хызматы үчин өзүңе берлен гап-гачлары хем Иерусалимде месген тутян Худайыңың хузурына элтип гой. 20 Өз Худайыңың өйи үчин ене-де зат герек болса, шаның хазынасындан алып билерсиң.
21 Мен патыша Артаксеркс, Евфрат дерясының аңырсындакы әхли хазынадарлара буйрук берйәрин! Гөгүң Худайының кануныны язян Эзра рухана нәме герек болса, оны дессине берҗай эдиң. 22 Йүз етмиш батмана ^{▼▼Йүз етмиш батман – еврейче йүз киккар. Бу такм. 3,4 тонна деңдир.} ченли күмүш, еди йүз элли батмана ^{▼▼Еди йүз элли батман – еврейче йүз кор. Бу такм. 15 тонна деңдир.} ченли бугдай, отуз мешик ^{▼▼Отуз мешик – еврейче йүз бат. Бу такм. 2200 литре деңдир.} шерап, отуз хум ^{▼▼Отуз хум – еврейче йүз бат. Бу такм. 2200 литре деңдир.} яг хем-де хасапсыз дуз берилсин. 23 Патышаның ве онуң огулларының башына газап инмез ялы, Гөгүң Худайы тарапындан Худайың өйи барада нәме табшырык берилсе, ол долы берҗай эдилсин. 24 Шейле хем, сизе аян эдйәрис: руханылардыр левилериң, ыбадатхана айдымчыларыдыр дервезебанларың ве хызматкәрлериң, шейле хем Худайың бу өйүниң бейлеки хызматкәрлериниң хич биринден салгыт, пач, төлег алынмасын.
25 Сен болса, Эзра, Худайың саңа берен пәхим-пайхасына гөрә, Евфрат дерясының гүнбатарындакы велаятда, сениң Худайыңың канунларыны билйән бүтин халка хөкүмини йөредип билҗек казылары, хәкимлери белле. Кануны билмейәнлерине-де сен өврет. 26 Ким сениң Худайыңың кануныдыр патышаның канунына боюн эгмесе, оңа берк темми берилсин. Ол өлүме хөкүм эдилсин я-да сүргүн эдилсин, онуң эмләги элинден алынсын я-да ол зындана ташлансын!»

Эзра Ребби алкышлаяр

27 Реббиң Иерусалимдәки өйүне шөхрат гетирмек үчин патышаның калбына бу затлары салан аталарымызың Худайы Реббе алкыш болсун! 28 Ол патышаның, онуң геңешчилериниң ве әхли гүйчли бегзадаларының хузурында маңа мерхеметини эчди. Худайым Реббиң голдавындан рухланып, мениң билен Иерусалиме доланмаклары үчин Ысрайыл баштутанларыны йыгнадым.