Heb 6 | TukCyr16 | STEP | Шонуң үчин, гелиң, Иса Месих барадакы башлангыч таглымда сакланман өңе херекет эдип, иманда беркәлиң, ыза гайтмалың. Өлүме элтйән ишлере тоба этмек, Худая иман этмек,

‏ Hebrews 6

1 Шонуң үчин, гелиң, Иса Месих барадакы башлангыч таглымда сакланман өңе херекет эдип, иманда беркәлиң, ыза гайтмалың. Өлүме элтйән ишлере тоба этмек, Худая иман этмек, 2 сува чүмдүрилип пәкленмек, эл гоюп дилег этмек барада, шейле-де өлүлериң дирелиши ве эбеди хөкүм барада гайта-гайта эсасы таглым алмагымызың гереги ёк. 3 Худай ёл берсе, бизиң ишимиз илерләр.

4 – 5 – 6 Ким өң бир гезек Худайдан нурланып, гөгүң пешгешини аландан соңам, шейле хем Мукаддес Руха шәрик болуп, Худайың Хош Хабарының ягшылыгыны дадып, гелҗекки дөврүң гудратыны гөренден соңам, Худайдан йүз өврүп, ёлдан чыкса, оны тәзеден тоба гетирмек асла мүмкин дәл. Себәби ол адам Худайың Оглуны гайтадан хача чүйләп, иле рысва эдйәндир.

7 Ызыгидер яган ягышдан ганып, дайхана бол хасыл гетирйән топрага Худай берекет берйәндир. 8 Эмма акбашдыр яндак битйән ер дерексиздир, ол нәлетленендир ве ховп астындадыр. Ахырсоңы оны ода якарлар.

9 Эзиз достлар, биз шейле дийсек хем, сизиң бейле дәлдигиңизи билйәрис. Сизиң догры ёлдан йөрәп, халас болҗакдыгыңыза ынанярыс. 10 Худай адалатлыдыр. Ол сизиң битирен ишиңизи, Онуң халкына эден ве эдйән хызматыңыз билен Өзүне болан мәхир-мухаббетиңизи унутмаз. 11 Биз сизиң хер бириңизиң умыдыңызың амала ашмагының иң соңкы пурсадына ченли хызматда гайратлылык гөркезмегиңизи дилейәрис. 12 Ялталыга йүз урмаң, гайтам, иман хем сабыр-такат аркалы Худайың вадаларына говшанларың гөрелдесине эериң.

Худайың вадасы ыгтыбарлыдыр

13 Худай Ыбрайыма вада беренде, Өзүнден бейик хич кимиң ёкдугы үчин, Өз адындан касам этди. 14 ^aОл: «Мен, хакыкатданам, сени ялкап, сениң неслиңи сан-саҗаксыз көпелдерин» дийип ант ичди. 15 Шейлеликде, Ыбрайым сабыр-такат билен гарашып, берлен вада етди.

16 Адамлар өзүнден бейик бириниң адындан касам эдйәрлер. Касам айдылан зады тассыклап, әхли җеделлери чөзйәр. 17 Худай хем вадасыны кабул эдйәнлере Өз максадының үйтгевсиздигини субут этмек иследи. Шонуң үчин Ол муны касам билен тассыклады. 18 Шейлеликде, Худай бизе ики зат: хем вада берди, хем касам этди. Мунуң икиси хем үйтгевсиздир, себәби Худай хич вагт ялан сөзлемейәр. Шонуң үчин хем, биз Худайда пена тапып, өзүмизе берлен умыда берк япышып рухланярыс. 19 Бу умыт җанымызы берк хем ховпсуз саклаяндыр, ол гөклердәки чадырың тутусының аңырсына гечйәндир. 20 Иса бизе ёл ачмак үчин, ол ере илкинҗи болуп гирип, Мәликсадык дереҗесиндәки мүдимилик Баш Руханымыз болды.