‏ Hosea 2

1«Сиз доганыңызы: „Мениң халкым“,
аял доганларыңызы: „Рехим эдиленлер“дийип чагырың».

Реб вепасыз Ысрайылы җезаландырар

2«Гыҗалат бериң эҗеңизе, гыҗалат,
чүнки ол Мениң аялым дәл;
Мен хем онуң әри дәл;
гой, йүзүнден гөрүнйән зынахорлыгы,
тенинден азгынлыгы айырсын.
3Айырмаса Мен оны эдил доглан вагтындакы ялы
чув-ялаңач эдерин.
Оны бош чөле, гуры топрага өврерин.
Тешнеликден өлдүрерин.
4Чагаларына-да рехим этмерин,
чүнки олар зынадан доглан.
5Чүнки оларың эҗеси зына этди
ве билинде чага галдырып, өзүни рысва этди.
Чүнки: „Маңа нан билен сувумы,
йүңүми, зыгыр матамы,
зейтун ягымы хем ичгими берйән
ойнашларымың ызындан гитҗек“дийди.
6Онуң ёлуна тикенли чәк чекерин,
өз ёдаларыны тапмаз ялы,
Онуң гаршысына дивар гурарын.
7Ол ойнашларының ызындан ковалар,
Йөне оларың ызындан етип билмез.
Олары гөзләр, йөне тапмаз.
Шонда ол айдар: „Илкинҗи әримиң янына доланарын,
чүнки өңки ягдайым хәзиркимден говуды“.
8Йөне ол билмеди,
галланы, тәзе шерабы, тәзеҗе ягы берен,
Багал бутуна харчлан алтыныны,
күмшүни бол эден Мен.
9Шонуң үчин берен галламы
өз вагтында Мен ызына аларын,
өз мөвсүминде тәзе шерабымы гайдып аларын.
Ялаңач беденини өртйән йүңүми,
зыгырымы ызына аларын.
10Инди ойнашларының өңүнде айыбыны ачарын,
хич ким оны Мениң элимден халас этмез.
11Онуң бар шадыянлыгыны, байрамларыны,
Тәзе Ай байрамыны ве Сабат гүнүни,
әхли дабараларыны тамам эдерин.
12Онуң: „Ойнашларымың маңа берен хакы“диен
үзүмлигини, инҗир багларыны вейран эдерин.
Мен олары җеңңеле өврерин,
хайванлара иймит боларлар.

13Багал бутуна түтетги якан гүнлери үчин,
оны җезаландырарын.
Шол вагт өзүни халкадыр йүзүклер билен безәп,
ойнашының ызындан ковалады.
Мени болса унутды».

Муны Реб айдяндыр.

Реббиң халка сөйгүси

14«Шонуң үчин хәзир оны ынандырып, чөле алып барарын,
онуң йүрегини авларын.

15Ол ерде Мен оңа үзүм багыны берерин.
Акор ▼

▼Акор – бу сөз бела диймеги аңладяр.

дересини Умыт гечелгесине өврерин.
Шонда яшлык гүнлеринде болшы ялы,
Мүсүр топрагындан чыканда болшы кимин,
айдымлар айдар.

16Шол гүн Мени „Әрим“дийип чагырар.
Мундан бейләк „Багалым“ ▼

▼Багал – еврейче бу сөз хоҗайын диймеги аңладяр. Сөзлүге серет.

дийип чагырмаз».

Муны Реб айдяндыр.

17«Дилинден Багал бутларың атларыны айрарын,
оларың атларыны гайдып тутмазлар.

18Шол гүн олар үчин
мейдандакы хайванлар, асмандакы гушлар,
топракда яшаян сүйрениҗилер билен әхт эдишерин.
Юртдан яйы, гылыҗы, сөвеш гошунларыны ёк эдерин.
Аман яшадарын олары.

19Ысрайыл, сени Өзүме хемишелик аялым хөкмүнде кабул эдерин.
Догрулык, адалатлылык хем садык сөйги,
рехимлилик билен Өзүме аларын.

20Мен сени вепадарлык билен аларын,
сен Мени Реб хөкмүнде танарсың.

21Шол гүн Мен җогап берерин»

Муны Реб айдандыр.
«Гөклере-де җогап берерин.
Олар хем ере җогап берерлер.

22Ер галла, тәзе шераба ве зейтуна җогап берерлер.
Олар хем Йизрегеле ▼

▼Йизрегел – бу сөз Худай экйәр диймеги аңладяр.

җогап берерлер.

23Халкымы топракда Өзүм үчин экерин.
„Рехим этмедиге“рехим эдерин.
„Халкым болмадыга“сен Мениң халкым диерин.
Ол болса „Сен мениң Худайымсың“диер».