‏ Isaiah 10

1Адалатсыз парзлары чыкарянларың дат гүнүне!
зорлук перманыны язянларың вай халына!
2Эҗизлериң хакыны иййәрсиңиз,
ёксуллары адалатдан махрум эдйәрсиңиз,
дул хатынлары авлаярсыңыз,
етимлер олҗаңыз боляр.
3Җеза гүни,
узакдан бетбагтчылык геленде,
нәме эдеркәңиз?
Кимден көмек сораркаңыз,
ниреден җай тапаркаңыз байлыгыңыза?
4Есирлериң арасында дыза чөкмекден,
Җесетлере бүдрәп йыкылмакдан гайры
чәрәңиз болмаз сизиң.
Барыбир сөнмәнди Реббиң газабы,
җеза бермәге тайындыр
хенизем Онуң эли.

Реббиң Ашур барадакы хөкүми

5Дат гүнүңе, Ашур!
Ол гахарымың хасасыдыр!
Элиндәки таягыдыр газабым!
6Оны худайсыз миллетиң гаршысына,
газапланан халкымың гаршысына иберйәрин,
оңа таламагы, таланыны олҗа алмагы,
олары көчелериң палчыгы кимин
аяк астына алмагы буюрдым.
7Эмма Ашур патышасы бейле ниет эденок,
бейле пикир этмейәр ол;
йүрегинде көп миллетлери гырмак,
көки-дамары билен ёк этмек күйүндедир онуң.
8Ол шейле диййәр:
«Лешгербашыларымың әхлиси
патыша дәлми нәме?
9Кално шәхери Каркемиш кимин дәлми?
Арпат кимин дәлми Хамат?
Самария Дамаск кимин дәлми?
10Иерусалим билен Самарияныңкыдан-да бейик ойма бутлары болан
бутпараз патышалыклары эле салшым ялы,
11Самария ве онуң бутларына эдишим ялы,
Иерусалиме ве онуң бутларына-да шейле эдерин».

12Реб Сион дагында ве Иерусалимде әхли ишини гутаранда шейле диер: «Ашур патышасыны текепбир йүрегине, гедем бакышына гөрә җезаландырарын». 13Чүнки Ашур патышасы шейле диййәр: «Муны өз элимиң гүйҗи билен,
өз пайхасым билен газандым,
мен пайхаслыдырын.
Миллетлериң серхетлерини айырдым,
оларың хазыналарыны таладым,
тагтындан агдардым гүйчли шалары.
14Миллетлериң байлыгыны тапды элим,
хөвүртге тапан ялы;
терк эдилен юмуртгаларың
йыгналышы кимин,
бүтин дүнйәни йыгнадым.
Ганат какып, агзыны ачып,
сес чыкаран болмады».

15Палта өзүни ишледйәниң янында өвүнерми?
Бычгы өзүни уланяндан бейгелдерми өзүни?
Өзүни гөтерйәни гөтерерми таяк?
Өзүни галдыряны галдырармы хаса?
16Мунуң үчин Хөкмүрован Таңры Реб,
Ашурың семизлерине хорлук ёллар,
Онуң шөхратының астында от ялыны туташар.
17Ысрайылың Нуры от,
онуң Мукаддеси ялын болар,
ялын онуң тикенлеридир
чалыларыны бир гүнде якып-яндырар.
18Гөзел токайларыдыр,
мес топраклы ерлерини
бүтинлей ёк эдер Реб,
хеләк болар
агыр дерде ёлуган адам дей.
19Токайларында галан агачлар шейле аз велин,
чага-да санап, язып билер олары.

Ысрайылың аман галанлары

20Шол гүн Ысрайылың аман галанлары ве Якубың несиллериниң халас боланлары мундан бейләк өзлерине җеза берйәне дәл-де, эйсем түйс йүрекден Ысрайылың Мукаддесине бил багларлар. 21Аман галанлар, Якубың аман галанлары гудратлы Худая доланарлар. 22Халкың Ысрайыл деңиз якасындакы чәге дей көп болса-да, онуң диңе аман галанлары Худая доланарлар. Карар эдилен хеләкчилик догрулык билен амала ашырылар. 23Гудратыгүйчли-Хөкмүрован Реб хөкүм эдиши ялы, бүтин ер йүзүнде хеләкчилиги амала ашырар.

24Шонуң үчин Гудратыгүйчли-Хөкмүрован Реб шейле диййәр: «Эй, Мениң Сионда яшаян халкым! Мүсүрлилер кимин сизе гаршы хасасыны галдырып, таяк билен уранда, сиз ашурлылардан горкмаң. 25Ине, бираз вагтдан гахарым ятышар, газабым ашурлылары хеләк этмәге гөнүгер. 26Ореп гаясында мидянлары вейран эдиши кимин, Хөкмүрован Реб олара гаршы гамчы галдырар. Хасасыны Мүсүрде ёкары галдырышы кимин деңзиң үстүне узадар. 27Шол гүн ашурлыларың йүки сизиң гершиңизден, боюнтырыгы сизиң бойнуңыздан айрылар; семизлигиңизден яңа боюнтырык дөвлер».

28Аят шәхерине гелйәрлер олар,
Мигрондан гечйәрлер,
Микмашда йүклерини гойярлар.
29Гечелгеден гечйәрлер олар,
Гебада бир гиҗе дүшлейәрлер,
Рама шәхери лерзана гелйәр,
Шавулың Гибга шәхериниң илаты гачяр.
30Бар сесиңе гыгыр, эй, Галлым гызы!
Гулак гой, эй, Лайша!
Эй, гөргүли Анатот!
31Мадмена гачып гидйәр,
Гебимиң илаты пена агтаряр.
32Бу гүн душманлар Нопда галарлар,
Сион гызының дагына,
Иерусалимиң депесине юмрук ченәр.
33Ине, Хөкмүрован Таңры Реб
гудратлы гүйҗи билен кесер шахалары,
иң бейик агачлар чапылар,
белентликлери ере язылар.
34Токайың гүр ерлерини палта билен чапар,
Ливан Гудратлы Боланың өңүнде йыкылар.