‏ Isaiah 29

Иерусалим габавы

1Давудың месген тутан шәхери
Ариелиң ▼

▼Ариел – бу Иерусалимиң бейлеки адым.

дат гүнүне!
Йылың йылына
байрамларыңыз довам эдиберсин.
2Ариеле азап чекдирерин,
яс тутар, перят эдер ол,
Мениң үчин гурбанлык оҗагы ▼

▼Ариеле… гурбанлык оҗагы – еврейче Ариел ве гурбанлык оҗагы сөзлериниң айдылышы меңзешдир.

кимин болар.
3Даш-төверегиңде дүшелге гурарын,
төверегиңе габав диңлер гуруп, сени габарын,
гаршыңа беркитмелер дикерин.
4Сен песелдилип, ериң астындан гепләрсиң,
сөзлериң топрак ичинден гелер;
сесиң җының сеси дек ерден чыкар,
топрагың тейинден пышырдап эшидилер сөзлериң.
5Душманларыңың көпүси тоз дек болар,
залымларың соврулан саман чөпи дейиндир.
Бирденкә, дуйдансыз,
6Хөкмүрован Реб гөк гүррүлдиси билен,
ер титремеси, улы шовхун билен,
харасат ве тупан билен,
ялмаян одуң ялны билен гелер.
7Ариеле гаршы сөвешйән әхли миллетлер,
онуң ве галаларының гаршысына сөвешйәнлер,
оны гысянлар
дүйш кимин, гиҗеки гөрнүш кимин боларлар.
8Дүйшүнде нахар иен ач киши,
оянансоңам ач боляндыр,
дүйшүнде сув ичен тешне,
оянансоңам тешнедир.
Сион дагына гаршы сөвешйән
әхли миллетлер топары-да шу ахвала дүшер.

Надан халк

9Доңуп галың, гатап галың!
өзүңизи көр эдиң, гөречден галың,
серхош болуң, йөне шерапдан дәл,
энтирекләң, йөне чакырдан дәл.
10Реб сизи агыр ука батырды,
пыгамберлер гөзлериңизи юмдурды,
гөргүрлер башларыңызы өртди.

11Әхли гөрнүш сизиң үчин мөхүрли китабың сөзлери киминдир. Оны окап билйәнлере берип: «Шуны ока» дийсеңиз, олар: «Окап билмейәрис, ол мөхүрленен» диерлер. 12Окап билмейәнлере берип: «Шуны ока» дийсеңиз, олар: «Окап билмейәрис» диерлер.

13Реб шейле диййәр:
«Бу халк Маңа якынлашып,
дили, додаклары билен Мени хорматлаяр,
йөне йүреклери Менден узакдадыр.
Ынсан буйрукларына гөрә
Маңа ыбадат эдйәрлер олар.
14Муңа гөрә Мен ене
бу халкың арасында гудратлар,
гудрат үстүне гудрат гөркезерин.
Даналары даналыкдан махрум болар,
акыллылары акылдан айрылар».
15Өз ниетлерини Ребден гизлемәге
чалышянларың, дат гүнүне!
Ишлери гараңкылыкда болуп,
олар: «Бизи ким гөрйәр?
Бизи ким танаяр» диййәрлер.
16Сиз бар зады терсине өвүрйәрсиңиз,
күйзегәр тоюн билен дең хасапланармы?
Ясалан зат өзүни ясана:
«Ол мени ясамады» диерми?
Шекиллендирилен зат шекиллендирене:
«Онуң дүшүнҗеси ёк диерми?»

Гелҗеге умыт

17Ливан аз салымың ичинде
хасыллы мейдана өврүлмезми,
мес топраклы ер токай кимин гөрүнмезми?
18Шол гүн керлер
китабың сөзлерини эшидерлер,
түмлүк, гараңкылык ичинде
көрлериң гөзлери ачылар.
19Пукаралар ене Ребде шатлык тапарлар,
мәтәчлер Ысрайылың Мукаддесинде галкынарлар.
20Залымлар ёк боларлар,
масгаралайҗыларың соңуна чыкылар,
яманлык этмәге гарашянлар ёк эдилер.
21Олар ынсана төхмет атярлар,
каза дузак гурярлар,
шәхер дервезесинде.
Хаклыны адалатдан нәхак махрум эдйәрлер.
22Мунуң үчин Ыбрайымы халас эден Реб
Якубың несиллери хакда шейле диййәр:
«Якуп инди утанмаз,
Онуң йүзи гызармаз инди.
23Өз элим билен ярадан чагаларымы
өз араларында гөренлеринде,
адымы мукаддес саярлар;
Якубың Мукаддесини мукаддес саярлар,
Ысрайыл Худайындан горкарлар.
24Ёлундан азашанлар дүшүнерлер,
арз-шикаят эдйәнлер тәлим аларлар».