Jer 15 | TukCyr16 | STEP | Соңра Реб маңа шейле дийди: «Хатда Муса билен Шамувел хузурымда дуруп ялбарсалар-да, йүрегим бу халка тарап өврүлмез. Халкымы хузурымдан ков, гой, гитсин!

‏ Jeremiah 15

Реб рехимдарлык этмейәр

1 Соңра Реб маңа шейле дийди: «Хатда Муса билен Шамувел хузурымда дуруп ялбарсалар-да, йүрегим бу халка тарап өврүлмез. Халкымы хузурымдан ков, гой, гитсин! 2 Олар сенден: „Биз нирә гидели?“дийип сорасалар, сен олара Реб шейле диййәр дий: „Гыргына хөкүм эдиленлери гыргына, гылыҗа хөкүм эдиленлери гылыҗа, ачлыга хөкүм эдиленлери ачлыга, сүргүне хөкүм эдиленлери сүргүне иберерин“». 3 «Оларың башындан дөрт хили бетбагтлык индерерин: өлдүрмек үчин – гылыҗы, дүйт-мүйт этмек үчин – итлери, ийип ёк этмек үчин – вагшы гушлар билен йыртыҗы хайванлары иберерин. Муны Реб айдяндыр. 4 Яхуда патышасы Хизкияның оглы Манашаның Иерусалимде эден ишлеринден яңа бүтин дүнйәниң патышалыкларыны ховп астына саларын.

5 Эй, Иерусалим, кимиң саңа йүреги авар? Сениң үчин ким аглар?
Хал-ягдайыңы сорамак үчин ёлундан совлуп,
ким сениң яныңа гелер?»
6 «Сен Мени рет этдиң, ыза тесдиң.
Мен хем элими саңа гаршы галдырып,
сени ёк эдерин.
Мерхемет этмекден халыс ядадым.

Муны Реб айдяндыр.
7 Юрдуң дервезелеринде
халкымы чаршак билен соврарын.
Перзентсиз гоюп, олары хеләк эдерин,
чүнки олар пис ёлларындан дәнмедилер.
8 Оларың дул аялларыны
деңиз чәгесинден-де көпелдерин.
Йигитлериң хем эҗелериниң үстүне
гүнорта чагы хеләклейҗи иберерин.
Эҗелерини дуйдансыз горкы
ве ховп астына саларын.
9 Еди чагалы аял
деми-демине етмән җан берди.
Онуң гүнеши гүндизиң гүни яшды,
ол утанҗа галып, масгара болды.
Галанларыны болса душманларының
өңүнде гылыҗа табшырарын».

Муны Реб айдяндыр.

Ермея Реббе шикаят эдйәр

10 «Вай мениң халыма! Вах, эҗем, сен мени бүтин дүнйә билен җеделлешсин хем дава этсин дийип догрупсың! Мен хич киме карз бермедим хем, алмадым хем. Шонда-да хеммелер маңа нәлет окаярлар».

11 Реб шейле дийди: «Мен ысрайыл халкыны диңе
ягшылык үчин гойберерин.
Бетбагтлык ве хасрат дөврүнде
душманыңы саңа табын эдерин.
12 Хич ким демир, онда-да демиргазык демри билен
бүрүнҗи дөвүп билмез.
13 Юрдуң әхли еринде эден гүнәлең үчин
талаңа берерин байлыгыңы ве хазынаңы.
14 Мен сени танамаян юрдуңда
душманларыңа гул эдерин ^{▼▼Юрдуңда душманларыңа гул эдерин – бу җүмле кәбир голязмаларда юрдуңа душманларың билен гөндерерин дийип душ гелйәр.},
газабым сизе гаршы от болуп туташып, эбедилик янар».

15 «Я Реб, Өзүң билйәрсиң.
Мени яда сал, ярдам эт маңа.
Мени ызарланлардан арымы алайын.
Олара сабыр-такатлы болма,
мени өлдүрмеклерине ёл берме.
Бу кемсидилмелере Сениң хатыраң үчин
чыдаяндыгымы билгин.
16 Сениң сөзлериңи тапып ийдим.
Сөзлериң маңа шатлык, йүрегиме бегенч берди.
Чүнки мен Сениң адың билен тутулдым,
эй, Реб Хөкмүрован Худай!
17 Кейп чекйәнлериң мейлисинде отурмадым,
шатланмадым мен.
Сениң элиң үстүмде болуп,
мени газапдан долдураның үчин
ялңыз өзүм отурдым,
18 Нечүн мениң агырым дынгысыз?
Нечүн яраларыма шыпа ёк?
Нечүн олары беҗерип болмаяр?
Сен мениң үчин сувы ыгтыбарсыз булак,
алдавчы бир чешме болҗакмы?»
19 Мунуң үчин Реб шейле диййәр:
«Эгер тоба этсең, сени ене кабул эдип,
хузурымда дурзарын.
Эгер бидерек сөзлери дәл-де,
гымматлы сөзлери айтсаң,
Мениң дилим билен гепләрсиң.
Бу халкың өзи саңа тарап өврүлер,
эмма сен олара тарап өврүлмерсиң.
20 Мен сени бу халк үчин
бүрүнчден берк дивар эдерин.
Олар сениң гаршыңа сөвешерлер,
эмма еңип билмезлер.
Халас этмек, өлүмден гутармак үчин
Мен сениң билендирин.

Муны Реб айдяндыр.
21 Сени эрбетлериң элинден азат эдерин,
рехимсизлериң пенҗесинден халас эдерин».