Judg 10 | TukCyr16 | STEP | Абымелекден соң Ысрайылы халас этмек үчин ысакар тиресинден Додоның агтыгы, Пуваның оглы Тола аяга галды. Ол Эфрайым даглыгында ерлешйән Шамыр диен ерде эфрайымларың арасында яшады.

‏ Judges 10

Тола сердар

1 Абымелекден соң Ысрайылы халас этмек үчин ысакар тиресинден Додоның агтыгы, Пуваның оглы Тола аяга галды. Ол Эфрайым даглыгында ерлешйән Шамыр диен ерде эфрайымларың арасында яшады. 2 Ол йигрими үч йыл Ысрайыла сердар болды. Соңра ол дүнйәден өтди, оны Шамырда җайладылар.

Яйыр сердар

3 Ондан соң, Ысрайыла йигрими ики йыллап Гилгатлы Яйыр сердар болды. 4 Онуң отуз оглы барды; оларың херси бир эшек мүнүп, Гилгадың отуз галасына өз хөкүмлерини йөредйәрдилер. Хенизе ченли шол галалар Хавотяйыр ^{▼▼Хавотяйыр – бу сөз Яйырың обалары диймеги аңладяр.} дийлип атландырыляр. 5 Яйыр арадан чыканда, оны Камон галасында җайладылар.

Ысрайыллар ене Реббе ялбарярлар

6 Ысрайыллар ене Реббиң йигренйән ишлерини эдип башладылар. Ысрайыллар Багал билен Ашторет бутларына хем-де Сирияның, Сидоның, Мовабың, Аммоның, пилиштлилериң худайларына гуллук эдип башладылар. Олар Ребби терк эдип, Оңа гуллук этмедилер. 7 Шонуң үчин Реббиң Ысрайыла гахары гелди. Ол ысрайыллары пилиштлилериң ве аммонлыларың элине берди. 8 Шол йыл олар ысрайыллары даргадып, олара гаты азар бердилер. Иорданың гүндогарындакы Гилгатда, ягны аморларың еринде яшаян әхли ысрайыллара олар он секиз йыллап сүтем этдилер. 9 Иң соңунда яхуда, бенямин ве эфрайым тирелери билен урушмак үчин аммонлылар Иордандан гечдилер. Ысрайыллар улы гайгы-алада галдылар. 10 Олар Реббе йүзленип: «Биз Сениң өңүңде гүнә этдик, өз Худайымыз Сени терк эдип, Багал бутларына гуллук этдик» дийип эңрешдилер.

11 Реб ысрайыллара шейле дийди: «Сизи мүсүрлилериң хем, аморларың хем, аммонлыларың хем, пилиштлилериң хем элинден азат эден Мен дәлми? 12 Сидонлар, амалеклер ве моваплылар сизе сүтем эден вагты Мени чагыраныңызда, Мен сизи оларың элинден халас этдим. 13 Сиз Мени унутдыңыз ве башга худайлара гуллук этдиңиз, шонуң үчин Мен сизе инди рехим этҗек дәл. 14 Барың, өз сайлан худайларыңыза йүз тутуң, гысаҗа дүшениңизде, сизи, гой, шолар халас эдиберсинлер». 15 Ысрайыллар Реббе йүзленип: «Биз Сениң өңүңде гүнәли, бизе ислән җезаңы берип билерсиң, йөне бу гүн бизи халас эт!» дийдилер. 16 Шейдип, олар кесеки худайлардан йүз өврүп, ене Реббе гуллук эдип башладылар. Реб олара ене-де дөзмеди.

17 Аммонлылар үйшүп, Гилгатда дүшелге гурдулар. Ысрайыллар йыгнанып, Миспада дүшелге гурдулар. 18 Гилгат халкының тиребашылары бири-бирилерине: «Аммонлыларың гаршысына ким илкинҗи болуп урша башласа, шол адам Гилгадың тутуш илатына баштутан болар» дийдилер.